దేశవ్యాప్తంగా సంచలనం సృష్టించిన హథ్రాస్ గ్యాంగ్రేప్ ఘటనను నిరసిస్తూ రంగారెడ్డి జిల్లా పరిధిలోని జిల్లెలగూడలో కాంగ్రెస్ పార్టీ ఆధ్వర్యంలో సత్యాగ్రహ నిరసన తెలియజేశారు. బాధితులకు మద్ధతు తెలిపి.. ఘటనపై ప్రశ్నించిన రాహుల్ గాంధీ, ప్రియాంక గాంధీలపై పోలీసుల దాడిని తీవ్రంగా ఖండిస్తున్నట్టు జిల్లా పార్టీ అధ్యక్షులు చల్లా నర్సింహరెడ్డి తెలిపారు.
దేశంలో మహిళలకు రక్షణ లేకుండా పోతుందని కాంగ్రెస్ నాయకులు ఆవేదన వ్యక్తం చేశారు. మొయినాబాద్లో మైనారిటీ యువతిపై తెరాస నాయకుడు అత్యాచారానికి పాల్పడితే.. చర్యలెందుకు తీసుకోలేదని ప్రశ్నించారు. కేంద్ర, రాష్ట్ర ప్రభుత్వాలు మహిళా రక్షణ మీద దృష్టి పెట్టాలని డిమాండ్ చేశారు. ఈ కార్యక్రమంలో మాజీ ఎంపీలు పొన్నం ప్రభాకర్, కొండా విశ్వేశ్వర్ రెడ్డి, మాజీ ఎమ్మెల్యే మల్రెడ్డి రంగారెడ్డి తదితరులు పాల్గొన్నారు.
ఇదీ చదవండి: 'ఎవరూ డబ్బులు కట్టకండి... ఉచితంగా క్రమబద్ధీకరణ చేస్తాం'
