KTR US Tour : అమెరికాలో కేటీఆర్ టూర్.. పెట్టుబడులతో క్యూ కడుతున్న ప్రముఖ కంపెనీలు
Published: May 21, 2023, 5:42 PM
KTR US Tour : అమెరికాలో కేటీఆర్ టూర్.. పెట్టుబడులతో క్యూ కడుతున్న ప్రముఖ కంపెనీలు
Published: May 21, 2023, 5:42 PM
KTR Agreement With Famous Companies In America : తెలంగాణకు పెట్టుబడులు వరదలా వెల్లువెత్తుతున్నాయి. మంత్రి కేటీఆర్ అమెరికా పర్యటనతో రాష్ట్రానికి కంపెనీలు క్యూ కడుతున్నాయి. ఆ దేశ పర్యటనలో ఉన్న మంత్రి ఆదివారం వివిధ రంగాల్లో అగ్రగామి సంస్థల ప్రతినిధులతో సమావేశమయ్యారు. ఈ సమావేశాల్లో పలు కంపెనీలతో ఐటీ, పరిశ్రమల శాఖ మంత్రి అవగాహన ఒప్పందాలు కుదుర్చుకున్నారు. ఈ భేటీల్లో మంత్రితో పాటు ఐటీ ప్రధాన కార్యదర్శి జయేశ్ రంజన్, ఎన్ఆర్ఐ అఫైర్స్ ప్రత్యేక కార్యదర్శి విష్ణువర్ధన్ రెడ్డి పాల్గొన్నారు.
KTR Agreement With Famous Companies In America : అమెరికాలో ఐటీ, పరిశ్రమలశాఖ మంత్రి కేటీఆర్ చేస్తున్న ప్రయత్నాలతో.. రాష్ట్రంలో పెట్టుబడులు పెట్టేందుకు మరిన్ని సంస్థలు ముందుకొచ్చాయి. హైదరాబాద్‌లో 10 వేల మందితో ఉపాధి కేంద్రం ఏర్పాటు చేయనున్నట్లు VXI గ్లోబల్ సొల్యూషన్స్ ప్రకటించింది. ఈ మేరకు మంత్రి కేటీఆర్‌తో.. VXI గ్లోబల్ చీఫ్ హెచ్ఆర్ ఎరికా బోగర్ కింగ్ సమావేశమై.. సంస్థ నిర్ణయాన్ని వెల్లడించారు. 1998లో నెలకొల్పిన ఆ సంస్థకు ప్రస్తుతం ఉత్తర అమెరికా, ఆసియా, యూరప్‌, కరేబియన్‌ దేశాల్లోని.. 42 కేంద్రాల్లో 40 వేల మంది ఉద్యోగులు పనిచేస్తుండగా ఇప్పుడు హైదరాబాద్‌లో పదివేల మందితో కొత్త కేంద్రం ఏర్పాటు చేయనున్నట్లు తెలిపింది.
ప్రముఖ మాండీ, రేవ్ గేర్స్ సంస్థల పెట్టుబడులు : హైదరాబాద్‌లో టెక్నాలజీ సెంటర్‌ ఆఫ్‌ ఎక్సలెన్స్‌ ఏర్పాటుకు.. ప్రముఖ పర్యాటక సంస్థ మాండీ ముందుకొచ్చింది. ఆ కేంద్రంతో 2వేల మందికి ఉద్యోగ అవకాశాలు కలుగుతాయని కేటీఆర్‌తో సమావేశం తర్వాత.. మాండీ ఛైర్మన్‌ ప్రసాద్‌ గుండుమోగుల తెలిపారు. ప్రముఖ గేర్ల ఉత్పత్తి సంస్థ.."రేవ్ గేర్స్" రాష్ట్రంలో ఉత్పత్తి కేంద్రం ఏర్పాటు చేసేందుకు ఆసక్తి చూపుతున్నట్లు ప్రకటించింది. ఈ మేరకు అమెరికా పర్యటనలో ఉన్న కేటీఆర్ను కలిసిన.. రెవ్‌గేర్స్‌ ప్రతినిధి బృందం తమ ఆకాంక్షను వ్యక్తం చేసింది.
సెల్ఫ్ స్టోరేజ్ సంస్థ స్టోరెబుల్ : అమెరికా, కెనడా, ఆస్ట్రేలియా, ఐరోపాలో సెల్ఫ్ స్టోరేజి పరిశ్రమలో.. సేవలు అందిస్తున్న స్టోరెబుల్ సంస్థ.. ఇప్పుడు హైదరాబాద్‌లో 100 మంది సాఫ్ట్‌వేర్‌ డెవలపర్లను నియమించుకొని విస్తరణ ప్రణాళికపై దృష్టిసారించనున్నట్లు తెలిపింది. ఆ విస్తరణతో.. పరిశోధన, అభివృద్ధి రంగం మరింత అభివృద్ధి చెందుతుందని, మరిన్ని ఉపాధి అవకాశాలు కల్పించగలమని సంస్థ తెలిపింది. ఈ మేరకు రాష్ట్ర అకాడమీ ఫర్‌ స్కిల్‌ అండ్‌ నాలెడ్జి- టాస్క్తో కలిసి పనిచేయనున్నట్లు తెలిపింది.
ప్రముఖ డిజిటల్ సొల్యూషన్స్ సంస్థ పెట్టుబడులు : డిజిటల్ సొల్యూషన్స్ రంగంలో అగ్రగామి సంస్థ రైట్‌ సాఫ్ట్‌వేర్‌ రాష్ట్రంలోని ప్రముఖ విద్యాసంస్థలకు సహకరిస్తూ కొత్త అభివృద్ధి కేంద్రాన్ని ఏర్పాటు చేయనున్నట్లు తెలిపింది. జూన్ 30న హైదరాబాద్‌లో ఏర్పాటు చేయనున్న కేంద్రాన్ని పరిశ్రమల శాఖ మంత్రి కేటీఆర్ ప్రారంభిస్తారని సంస్థ ప్రకటించింది. ఈ కేంద్రంలో ప్రత్యక్షంగా 500 మందికి ఉపాధి లభిస్తుందని పేర్కొంది. ప్రముఖ గ్లోబల్ సప్లై చెయిన్‌, డిజిటల్ సొల్యూషన్స్ సంస్థ చెక్‌జెన్స్‌ హైదరాబాద్‌లో అడ్వాన్స్‌ టెక్నాలజీ కేంద్రాన్ని ఏర్పాటు చేయనున్నట్లు ప్రకటించింది. అమెరికా పర్యటనలో ఉన్న.. కేటీఆర్ని కలిసిన చెక్‌జెన్స్‌ అధ్యక్షుడు లక్ష్మీ ఎనిగెల్ల, సీఈవో రఘు కొమ్మరాజు.. ఈ మేరకు ప్రకటించారు.
ఇవీ చదవండి :
