Serena Williams Retirement: అమెరికా టెన్నిస్ దిగ్గజం సెరెనా విలియమ్స్ రిటైర్మెెంట్ గురించి కీలక వ్యాఖ్యలు చేసింది. టెన్నిస్కు మెల్లమెల్లగా దూరమవుతున్నట్లు ప్రకటించింది. 23 గ్రాండ్స్లామ్ టైటిళ్లు సాధించానని, టెన్నిస్ నుంచి తప్పుకోవడానికి సిద్ధమేనని ఆమె రాసిన ఓ వ్యాసాన్ని వోగ్ మ్యాగజైన్ విడుదల చేసింది. ఈ సందర్భంగా రిటైర్మెంట్ అనే పదం తనకు ఇష్టం లేదని.. టెన్నిస్కు దూరంగా ఉంటూ తనకిష్టమైన ఇతర విషయాల పట్ల దృష్టి సారిస్తానని ఆమె చెప్పింది. మరో బిడ్డ, ఇతర వ్యాపారాలు చూసుకుంటానని వివరించింది.
''నాకు ఈ సెప్టెంబర్లో 41 ఏళ్లు వస్తాయి. ఇంకా ఏదో ఇవ్వాలి.'' అని సెరెనా పేర్కొంది. విలియమ్స్ ప్రస్తుతం సుదీర్ఘ విరామం తర్వాత.. టోరంటో నేషనల్ బ్యాంక్ ఓపెన్లో ఆడుతోంది. ఆ తర్వాత సీజన్ చివరి గ్రాండ్ స్లామ్ యూఎస్ ఓపెన్లో ఆడనుంది. ఆగస్టు 29న న్యూయార్క్లో ఈ ఈవెంట్ ప్రారంభం కానుంది. బహుశా తన సొంత దేశంలోనే సెరెనా తన చివరి మ్యాచ్ ఆడే అవకాశం ఉన్నట్లు తెలుస్తోంది.
ప్రస్తుత ప్రొఫెషనల్(ఓపెన్ ఎరా) శకంలో అత్యధిక గ్రాండ్స్లామ్ టైటిళ్లు గెలిచింది సెరెనా విలియమ్స్. ఈ ఘనత మరే టెన్నిస్ క్రీడాకారుడికి కూడా సాధ్యం కాలేదు. రికార్డు స్థాయిలో 23 గ్రాండ్స్లామ్లు సొంతం చేసుకుంది అమెరికా నల్లకలువ. ఆల్టైమ్ అత్యధిక గ్రాండ్స్లామ్ టైటిళ్లు సాధించిన రికార్డు మార్గరెట్ కోర్ట్(ఆస్ట్రేలియా) పేరిట ఉంది. ఆమె మొత్తం 24 టైటిళ్లు గెల్చుకుంది. పురుషుల సింగిల్స్లో స్పెయిన్ బుల్ రఫెల్ నాదల్ 22 గ్రాండ్స్లామ్ టైటిళ్లతో ముందుండగా.. సెర్బియా స్టార్ నొవాక్ జకోవిచ్(21), స్విస్ దిగ్గజం రోజర్ ఫెదరర్(20) వరుసగా రెండు, మూడు స్థానాల్లో ఉన్నారు.
