Retired out in IPL: ఐపీఎల్ చరిత్రలో రిటైర్డ్ ఔట్ అయిన తొలి ఆటగాడిగా అశ్విన్ నిలిచాడు. రాజస్థాన్ ఇన్నింగ్స్ 19వ ఓవర్లో అతడు ఇలా వెనుదిరిగాడు. అలసిపోయి షాట్లు ఆటలేకపోతుండటం వల్ల అశ్విని వెనుదిరిగి ఉండొచ్చని అంతా భావించారు. రిటైర్డ్ ఔట్ అనేది ఓ వ్యూహాత్మక ఎత్తుగడ. మెరుగైన ముగింపు కోసం రాజస్థాన్ జట్టు మేనేజ్మెంట్ ఈ నిర్ణయం తీసుకుని ఉండొచ్చు. రిటైర్డ్ హర్ట్ అయిన బ్యాటర్లో.. రిటైర్డ్ ఔట్ అయిన బ్యాటర్ తిరిగి బ్యాటింగ్ రావడానికి వీల్లేదు. అశ్విన్ స్థానంలో క్రీజులోకి వచ్చిన రియాన్ పరాగ్ ఓ సిక్స్ కొట్టాడు. ఈ మ్యాచ్లో అశ్విన్ 23 బంతులు ఎదుర్కొని 2 సిక్సర్లతో 28 పరుగులు చేశాడు.
చివరి ఓవర్లో అశ్విన్ మైదానం వీడటంపై క్రికెట్ అభిమానులు ఆశ్చర్యానికి గురయ్యారు. ఈ అశంపై ట్విట్టర్ వేదికగా చర్చించారు. ఐపీఎల్లో తొలిసారి ఈ సంఘటనను చూశానని ఓ అభిమాని పోస్ట్ చేయగా.. ఇది వ్యూహంలో భాగమని మరో అభిమాని పేర్కొన్నాడు. అశ్విన్ స్థానంలో రియాన్ పరాగ్ రావటం.. గొప్ప వ్యూహంగా పలువురు పేర్కొన్నారు. మరో అభిమాని ఓ అడుగు ముందుకేసి రోహిత్ శర్మ కంటే అశ్విన్ మెరుగైన ప్రదర్శన చేసినట్లు తెలిపాడు.
ఆర్ఆర్ కెప్టెన్ ఏమన్నాడంటే?: అశ్విన్ రిటైర్డ్ ఔట్గా వెళ్లటంపై మ్యాచ్ అనంతరం వివరణ ఇచ్చాడు రాజస్థాన్ రాయల్స్ కెప్టెన్ సంజూ శాంసన్. డెత్ ఓవర్లలో అశ్విన్ను రిటైర్డ్ ఔట్గా వెనక్కి పిలిపించటం.. జట్టు యాజమాన్యం తీసుకున్న నిర్ణయమని స్పష్టం చేశాడు. మ్యాచ్ పరిస్థితిని అనుసరించి ఈ వ్యూహాన్ని అమలు చేశారని తెలిపాడు. తాము ఎప్పుడు కొత్త కొత్త ప్రయోగాలు చేసేందుకు ప్రయత్నిస్తున్నామని, రిటైర్డ్ ఔట్ గురించి ముందే చర్చించినట్లు వెల్లడించాడు.
చాహల్ అరుదైన ఘనత: ఐపీఎల్లో భాగంగా ముంబయి వాంఖడే మైదానంలో లఖ్నవూ సూపర్ జెయింట్స్తో జరిగిన మ్యాచ్లో 3 పరుగుల తేడాతో విజయం సాధించింది రాజస్థాన్ రాయల్స్. ఈ మ్యాచ్లో ఆర్ఆర్ 166 పరుగుల లక్ష్యాన్ని ఎల్ఎస్జీ ముందు ఉంచింది. అయితే.. లక్ష్య ఛేదనలో సూపర్ జెయింట్స్ను నాలుగు వికెట్లు తీసి కోలుకోలేని దెబ్బకొట్టాడు యుజువేంద్ర చాహల్. అరుదైన రికార్డును సొంతం చేసుకున్నాడు. దుష్మంత చమీరాను ఓట్ చేయటం ద్వారా చాహల్ ఐపీఎల్లో 150వ వికెట్ సాధించాడు. తద్వారా ఐపీఎల్లో 150 వికెట్ల మైలురాయిని అందుకున్న ఆరో ఆటగాడిగా చరిత్ర సృష్టించాడు. చాహల్ కంటే ముందు డ్వేన్ బ్రావో 173, లసిత్ మలింగ్ 170, అమిత్ మిశ్రా 166, పియూష్ చావ్లా 157 వికెట్లతో ముందు వరుసలో ఉన్నారు. తాజాగా చాహల్ 150 వికెట్లతో భజ్జీ సరసన చేరాడు.
రాజస్థాన్ జట్టులోనే ఆరెంజ్, పర్పుల్ క్యాప్స్: లఖ్నవూ సూపర్ జెయింట్స్తో ఉత్కంఠ పోరులో విజయం సాధించి పాయింట్ల పట్టికలో టాప్లోకి దూసుకెళ్లింది రాజస్థాన్ రాయల్స్. 4 మ్యాచ్లు ఆడిన ఆర్ఆర్ మూడింటిలో విజయం సాధించి 6 పాయింట్లతో తొలిస్థానంలో ఉంది. మంచి ఫామ్లో ఉన్న రాయల్స్ బ్యాటర్ జోస్ బట్లర్ 218 పరుగులతో ఆరెంజ్ క్యాప్ను సొంతం చేసుకున్నాడు. ఎల్ఎస్జీ మ్యాచ్లో 4 వికెట్లు పడగొట్టిన యుజ్వేందర్ చాహల్.. ఉమేశ్ యాదవ్, కుల్దీప్ యాదవ్లను వెనక్కి నెట్టి పర్పుల్ క్యాప్ను అందుకున్నాడు. ప్రస్తుతం తొలిస్థానంలో ఉన్న ఆర్ఆర్ జట్టులోనే అత్యధిక పరుగులు, అత్యధిక వికెట్ల ఆటగాళ్లు ఉండటం విశేషం. చాహల్ 4 మ్యాచుల్లో 6.5 ఎకానమితో 11 వికెట్లు పడగొట్టాడు.
ఇదీ చూడండి: IPL 2022: లఖ్నవూకు షాక్.. ఉత్కంఠ పోరులో రాజస్థాన్ విజయం
