DC vs KKR: దిల్లీ క్యాపిటల్స్తో జరిగిన మ్యాచ్లో కోల్కతా నైట్రైడర్స్ ఓడిపోయింది. 216 పరుగుల భారీ లక్ష్యంతో బరిలోకి దిగిన ఆ జట్టు.. 171కే ఆలౌటైంది. శ్రేయస్ అయ్యర్ (33 బంతుల్లో 54) ఒక్కడే అర్ధసెంచరీతో రాణించాడు. నితీశ్ రాణా(30) కాసేపు సహకారం అందించినా ఫలితం లేకపోయింది. దిల్లీ బౌలర్లు క్రమం తప్పకుండా వికెట్లు తీయడంలో విజయవంతమయ్యారు. ఓపెనర్లు రహానే(8), వెంకటేశ్ అయ్యర్(18) తక్కువ పరుగులే చేసి అవుటయ్యారు. గత మ్యాచ్ హీరో ప్యాట్ కమిన్స్ ఈసారి 4 రన్సే చేశాడు. కుల్దీప్ యాదవ్ 4 ఓవర్లలో 35 పరుగులు ఇచ్చి 4 వికెట్లు తీశాడు. ఖలీల్ అహ్మద్ 3, షార్దుల్ ఠాకుర్ 2 వికెట్లు పడగొట్టారు.
తొలుత టాస్ ఓడి బ్యాటింగ్కు దిగిన దిల్లీ క్యాపిటల్స్ భారీ స్కోరు చేసింది. నిర్ణీత 20 ఓవర్లలో 5 వికెట్లు కోల్పోయి 215 పరుగులు చేసింది. ఓపెనర్లు పృథ్వీ షా, వార్నర్ దూకుడుగా ఆడారు. వీరిద్దరూ కలిసి తొలి వికెట్కు 8.4 ఓవర్లలోనే 93 పరుగులు జోడించారు. 27 బంతుల్లోనే అర్ధసెంచరీ చేసిన షా 51 పరుగులకు అవుటయ్యాడు. ఇందులో 7 ఫోర్లు, 2 సిక్సర్లు ఉన్నాయి. ఆ తర్వాత వచ్చిన పంత్ 14 బంతుల్లోనే 2 ఫోర్లు, 2 సిక్సర్లతో 27 పరుగులు చేసి పెవిలియన్ చేరాడు. ఆ సమయంలో లలిత్ యాదవ్(1), పావెల్ను (8) వరుస ఓవర్లలో ఔట్ చేసి కోల్కతాను పోటీలోకి తీసుకొచ్చాడు నరైన్. మరుసటి ఓవర్లో వార్నర్ను 61(45 బంతుల్లో) ఉమేశ్ ఔట్ చేశాడు.
ఆఖర్లో షార్దుల్ ఠాకుర్, అక్షర్ పటేల్ ఫోర్లు, సిక్సర్లతో మైదానాన్ని హోరెత్తించారు. ఠాకుర్ 11 బంతుల్లోనే 29 పరుగులు చేశాడు. ఇందులో ఒక ఫోర్, 3 సిక్సర్లు ఉన్నాయి. అక్షర్ 2 ఫోర్లు, ఓ సిక్సర్తో 14 బంతుల్లోనే 22 రన్స్ చేశాడు. కోల్కతా బౌలర్లలో నరైన్ రెండు వికెట్లు తీయగా.. వరుణ్ చక్రవర్తి, ఉమేశ్ యాదవ్, రసెల్ తలో వికెట్ తీశారు. కమిన్స్ 4 ఓవర్లలో వికెట్ తీయకుండా 51 పరుగులు ఇచ్చాడు. ఉమేశ్, చక్రవర్తి కూడా ధారాళంగా పరుగులు సమర్పించుకున్నారు. నరైన్, రసెల్ మాత్రమే కాస్త పొదుపుగా బౌలింగ్ చేశారు. తొలుత టాస్ గెలిచిన కేకేఆర్.. దిల్లీకి బ్యాటింగ్ అప్పగించింది. దిల్లీలో నోర్జే స్థానంలో ఖలీల్ అహ్మద్ జట్టులోకి వచ్చాడు. కోల్కతా ఎలాంటి మార్పులు లేకుండానే బరిలోకి దిగింది.
ఇవీ చూడండి: ముంబయికి కలిసిరాని మెగా ఆక్షన్.. గతంలోనూ వరుస ఓటములు
