భారత సైన్యాధినేత మనోజ్ ముకుంద్ నరవాణే.. 5 రోజుల పర్యటన కోసం బంగ్లాదేశ్కు చేరుకున్నారు. తొలి రోజు పర్యటనలో భాగంగా.. 1971 స్వాతంత్రోద్యమంలో అమరులైన సైనికులకు శిఖా అనిర్బన్ వద్ద పూలమాలలు వేసి నివాళులర్పించారు. అనంతరం.. సేన్కుంజ్ వద్ద గార్డ్ ఆఫ్ హానర్ అవార్డు అందుకున్నారు నరవాణే.
భారత్, బంగ్లాదేశ్ల వ్యూహాత్మక సమస్యలు సహా ఇరు దేశాల మధ్య సహకారం, ద్వైపాక్షిక సంబంధాల బలోపేతమే లక్ష్యంగా.. ఏప్రిల్ 8 నుంచి 12 వరకు నరవాణే పర్యటన కొనసాగనుంది. రెండు దేశాల సైన్యాల మధ్య సంబంధాలను ముందుకు తీసుకెళ్లేలా సైన్యాధినేత చర్చలు జరపనున్నారని ఆర్మీ ప్రతినిధి కర్నల్ అమన్ ఆనంద్ తెలిపారు.
భారత ప్రధాని నరేంద్ర మోదీ బంగ్లా పర్యటన ముగిసిన రెండు వారాలకే.. నరవాణే అక్కడ పర్యటన చేపట్టటం ప్రాధాన్యం సంతరించుకుంది.
రెండో రోజు పర్యటనలో భాగంగా.. ఆ దేశ త్రివిధ దళాల ప్రముఖులతో సమావేశం కానున్నారు నరవాణే.
ఈనెల 11న ఆ దేశ విదేశాంగ మంత్రి ఏకే అబ్దుల్ మొమెన్తోనూ ఆయన భేటీ కానున్నారు.
చివరి రోజు(ఈ నెల 12న) పర్యటనలో భాగంగా.. ఐక్యరాజ్య సమితి శాంతి పరిరక్షణ దళాల కమాండర్లు, భూటాన్ ఆర్మీ చీఫ్ ఆపరేషన్స్ అధికారితోనూ నరవాణే సమావేశం కానున్నారని ఆనంద్ తెలిపారు.
ఇదీ చదవండి:ఉత్తరాఖండ్ను కమ్మేసిన మంచు- ప్రజల ఇక్కట్లు
