మంచు తుపానులతో పాశ్చాత్య దేశాలు గజగజ

యూకేలో మంచు తుపాను ధాటికి ప్రజా రవాణా స్తంభించింది. టీకా పంపిణీని కూడా రద్దు చేశారు. ఈ తుపాను జర్మనీపైన కూడా ఉండటం వల్ల ఆ దేశంలో కూడా ఇదే పరిస్థితి నెలకొంది. అమెరికాలోని ఈశాన్య రాష్ట్రాల్లో ఆదివారం భారీగా మంచు కురిసింది.

అమెరికా, జర్మనీ, యూకే దేశాల్లో మంచు తుపాను వణికిస్తోంది. తుపాను ధాటికి పలు చోట్ల రవాణాను నిలిపి వేయగా.. పలు ప్రాంతాల్లో కొవిడ్​ టీకా పంపిణీని తాత్కాలికంగా రద్దు చేశారు.

యూకేలో..

తూర్పు యూకేలో డార్సీ మంచు తుపాను తీవ్ర ప్రభావం చూపుతోంది. రష్యా నుంచి వచ్చిన ఈ తుపాను కారణంగా కనిష్ఠ ఉష్ణోగ్రతలు నమోదయ్యాయి. తుపాను ధాటికి రవాణా స్తంభించింది. రైళ్ల సేవలను నిలిపివేయగా, ప్రమాదకరంగా మారిన పలు రోడ్డు మార్గాలపై అధికారులు హెచ్చరికలు జారీ చేశారు. ఈ ప్రభావం టీకా పంపిణీ మీద కూడా పడింది. పలు చోట్ల ఎలాంటి ముందస్తు సమాచారం ఇవ్వకుండానే కేంద్రాలను మూసేశారు. బుధవారం వరకు యూకే వాసులు అప్రమత్తంగా ఉండాలని ఆ దేశ వాతావరణ శాఖ హెచ్చరించింది. తుపాను ప్రభావం యూకే సహా జర్మనీ, నెదర్లాండ్స్​ దేశాల మీద కూడా పడింది.

యూకేలో : వ్యాక్సిన్​ కేంద్రం మూసివేసినట్టు ప్రకటన

జర్మనీలో..

యూకే పరిస్థితే జర్మనీ కూడా ఎదుర్కొంటోంది. శనివారం రాత్రి ప్రారంభమైన మంచు తుపాను ధాటికి పలు రోడ్డు ప్రమాదాలు జరిగాయి. విద్యుత్​ సరఫరా నిలిచిపోయింది. కనిష్ఠ ఉష్ణోగ్రతల కారణంగా జర్మనీలో పలు ప్రాంతాల్లో ప్రమాదస్థాయి హెచ్చరికలు జారీ చేశారు. ప్రజా రవాణా వ్యవస్థను నిలిపేసిన అధికారులు.. ప్రజలు ఎవరూ కార్లలో ప్రయాణించవద్దని విజ్ఞప్తి చేశారు.

స్తంభించిన జర్మనీ

నార్త్​రైన్ -​ వెస్ట్​ఫేలియా రాష్ట్రంలో శనివారం మధ్యాహ్నం నుంచి ఆదివారం పొద్దున్న మధ్య 222 రోడ్డు ప్రమాదాలు జరిగాయని అధికారులు వెల్లడించారు. వీరిలో 26 మంది తీవ్రంగా గాయపడగా, పలువురికి స్వల్ప గాయాలు అయ్యాయని పేర్కొన్నారు. ఈశాన్య ప్రాంతాల్లో మైనస్​ 20 డిగ్రీల ఉష్ణోగ్రత, 20 నుంచి 40 సెంటిమీటర్ల మధ్య మంచు నమోదయ్యాయి. గంటకు 70 కిలీమీటర్ల వేగంతో గాలులు వీస్తున్నాయి. ఈ తుపాను ప్రభావం మరో వారం వరకు కొనసాగుతుందని అంచనా వేస్తున్నారు.

అగ్రరాజ్యంలో..

అమెరికాలో ఇటీవల కాలంలో మంచు తుపానుల ప్రభావం తీవ్రంగా ఉంది. తాజాగా ఈశాన్య రాష్ట్రాల మీద ఆ ప్రభావం పడింది. ఈశాన్య న్యూజెర్సీ, వాయువ్య న్యూయార్క్, నైరుతి కనెక్టికట్ ప్రాంతాల్లో 5 నుంచి 7 అంగుళాల మేర హిమపాతం నమోదైంది. అత్యధికంగా పశ్చిమ ఫిలడెల్​ఫియాలో 9 అంగుళాలు మేర మంచు కురిసింది. స్థానికులంతా బయటకు వచ్చి, మంచులో ఆడుతూ ఆహ్లాదంగా మారిన వాతావరణాన్ని ఆస్వాదించారు.

అమెరికాలో ఇలా..

ఆదివారం కురిసిన మంచుపై న్యూయార్క్ నగర మేయర్​ స్పందించారు. టీకా పంపిణీకి ఎలాంటి ఆటంకం కలగదన్నారు. ఇదివరకు సంభవించిన తుపాను కారణంగా టీకా పంపిణీ రద్దు చేసిన నేపథ్యంలో మేయర్ ఈ విధంగా పేర్కొన్నారు.

ఇదీ చదవండి : అమెరికా జైలులో ఖైదీల విధ్వంస కాండ