road accident: అప్పటి వరకు ఆ చిన్నారి ఇంట్లోనే ఆడుకుంది... సమీపంలో పనిచేస్తున్న తల్లి వద్దకు బయలుదేరింది. అంతలోనే కారు రూపంలో మృత్యువు ఆ బాలికను బలిగొంది. కరీంనగర్ జిల్లా చిగురుమామిడి మండలం ఇందుర్తి గ్రామానికి చెందిన లోకిని జంపయ్య, రాజేశ్వరి దంపతులు తిమ్మాపూర్‌ రాజీవ్‌ రహదారి పక్కనే ఓ ఇంట్లో నివసిస్తున్నారు. రాజేశ్వరి రహదారి పక్కన ఉన్న ఓ సంచార హోటల్‌లో పనిచేస్తోంది. అయిదో తరగతి పూర్తి చేసిన వారి కుమార్తె శివాని (10)ని ఆరో తరగతిలో చేర్చేందుకు ఆ దంపతులు ప్రయత్నిస్తున్నారు.
శుక్రవారం మధ్యాహ్నం తల్లి పనిచేసే చోటకు వెళ్దామని శివాని ఇంటి నుంచి బయలుదేరింది. రోడ్డుకు ఎడమవైపునే నడుస్తూ వెళ్తుండగా.. సంతోష్‌కుమార్‌ అనే వ్యక్తి కారును అతివేగంగా నడుపుతూ వెనుక నుంచి శివానిని ఢీకొట్టాడు. ఆ ధాటికి చిన్నారి గాల్లో సుమారు 30 మీటర్ల మేర ఎగిరి పడింది. ఆమెను ఆస్పత్రికి తరలిస్తుండగా దారిలోనే మృతిచెందింది. ఈ ప్రమాదంపై కేసు నమోదు చేసి దర్యాప్తు చేస్తున్నట్లు ఎల్‌ఎండీ ఎస్సై ప్రమోద్‌ రెడ్డి తెలిపారు. కారులో ఉన్న ముగ్గురూ మద్యం తాగి ఉన్నారని, ప్రమాదం తర్వాత కూడా సమీపంలోని వైన్స్‌కు వెళ్లి మద్యం తాగి పారిపోయారని స్థానికులు చెబుతున్నారు. పరారీలో ఉన్న నిందితుల కోసం గాలిస్తున్నామని ఎస్సై తెలిపారు.
ఇదీ చదవండి: లోన్యాప్స్‌ వేధింపులకు మరో యువకుడు బలి
స్కూల్కు తల్వార్తో విద్యార్థి తండ్రి.. యూనిఫాం డబ్బులు ఎందుకు ఇవ్వలేదంటూ...
