రాజస్థాన్లో దారుణం జరిగింది. కారు, లారీ ఢీకొని ఐదుగురు ప్రాణాలు కోల్పోయారు. మరో వ్యక్తి తీవ్రంగా గాయపడ్డాడు. గాయపడ్డ వ్యక్తిని ఆస్పత్రికి తరలించారు. హనుమాన్ గఢ్ జిల్లా పల్లూ పోలీస్ స్టేషన్ పరిధిలో ఆదివారం ఉదయం ఈ ఘటన జరిగింది.
ఇదీ జరిగింది.. ఇటుకల లోడుతో వస్తున్న లారీ.. బిస్రాసర్ అనే గ్రామ సమీపంలో బలంగా కారును ఢీకొట్టింది. దీంతో అందులో ఉన్న ముగ్గురు అక్కడికక్కడే ప్రాణాలు కోల్పోయారు. మరో ఇద్దరు ఆస్పత్రికి తీసుకెళ్తుండగా చనిపోయారు. ఘటన జరిగిన తర్వాత లారీ డ్రైవర్ అక్కడ నుంచి పరారయ్యాడు. తీవ్రంగా గాయపడిన మరో వ్యక్తిని సమీపంలోని ఆస్పత్రికి తరలించారు.
ఈ ఘటనపై కేసు నమోదు చేసుకుని దర్యాప్తు ప్రారంభిస్తామని పోలీసులు తెలిపారు. పరారీలో ఉన్న డ్రైవర్ కోసం గాలిస్తున్నట్లు చెప్పారు. మృతుల కుటుంబ సభ్యులు వచ్చిన తర్వాత.. మృతదేహాలకు పోస్టుమార్ట పరీక్షలు నిర్వహిస్తామని తెలిపారు.
ఓల్డేజ్ హోమ్లో మంటలు.. ఇద్దరు మృతి
ఓల్డేజ్ హోమ్లో అగ్నిప్రమాదం జరిగింది. మూడో అంతస్థులో ఉన్న ఇద్దరు వ్యక్తులు సజీవదహనం అయ్యారు. ఈ ఘటన దక్షిణ దిల్లీలోని గ్రేటర్ కైలాశ్ ప్రాంతంలో ఆదివారం జరిగింది. గాయపడిన దాదాపు డజను మందిని ఆస్పత్రికి తరలించారు. కాగా, ఈ ఘటన గురించి ఉదయం 5.14 గంటల సమయంలో సమాచారం అందుకున్న పోలీసులు, అగ్నిమాపక సిబ్బంది.. ఐదు ఫైరింజన్లతో మంటలను అదుపులోకి తీసుకొచ్చారు.
మంటలు అదుపులోకి తీసుకొచ్చిన తర్వాత.. మూడో ఫ్లోర్లో పూర్తిగా కాలిపోయిన రెండు మృతదేహాలు లభ్యమయ్యాయని పోలీసులు వెల్లడించారు. క్రైం, ఫోరెన్సిక్ బృందాలు కూడా ఘటనా స్థలానికి చేరుకున్నాయని చెప్పారు. ఈ ఘటనకు సంబంధించిన దర్యాప్తు కొనసాగుతోందని తెలిపారు.
