ఓ దొంగకు మరో ఇద్దరు దొంగలు మస్కా కొట్టారు. ఒకడు చోరి చేసిన సొమ్మును మరో ఇద్దరు గజదొంగలు ఎత్తుకెళ్లారు. గుజరాత్లోని సూరత్లో ఈ ఘటన జరిగింది. ఈ సన్నివేశం అంతా సీసీటీవీలో రికార్డ్ అయింది. పోలీసులు తెలిపిన వివరాల ప్రకారం.. లింబాయత్‌లోని ప్రతాప్‌నగర్కు చెందిన నూర్ జాన్ ముహమ్మద్ షేక్ అనే వ్యక్తికి చెందిన కిరాణా షాపులో ఈ దొంగతనం జరిగింది. షుగర్‌నగర్ సమీపంలో ఈ కిరాణా దుకాణం ఉంది. మొదట షాపులోకి ప్రవేశించిన ఓ దొంగ.. కొంత సామానును మూటగట్టుకున్నాడు. అనంతరం షాపులో ఉన్న రూ.70వేలను తీసుకుని పారిపోయేందుకు ప్రయత్నించాడు.
అదే సమయంలో షాపు బయటే ఉన్న మరో ఇద్దరు దొంగలు.. చోరీ చేసి ఎత్తుకెళుతున్న రూ.70వేలను మొదటి దొంగ నుంచి లాగేసుకున్నారు. ఈ ఘటన మొత్తం సీసీటీవీలో రికార్డైయింది. ఉదయం వచ్చి షాపును చెక్ చేసిన యజమాని.. వెంటనే పోలీసులకు ఫిర్యాదు చేశాడు. ఘటనపై కేసు నమోదు చేసుకున్న పోలీసులు.. విచారణ చేస్తున్నట్లు తెలిపారు. తాను బ్యాంకులో డిపాజిట్ చేయాలనుకున్న సొమ్మును.. దొంగలు చోరీ చేశారని షాపు ఓనర్ వాపోయాడు.
