జల్సాలకు అలవాటుపడి, డబ్బుల కోసం అడ్డదారులు తొక్కుతున్నారు కొందరు యువకులు. వాటి ద్వారా ఎదురయ్యే పరిణామాలను సైతం లెక్క చేయటం లేదు. గుజరాత్కు చెందిన ఓ యువకుడు.. చదివింది పదో తరగతే అయినా మత్తుపదార్థాల్ని తయారు చేసేందుకు ఏకంగా ఓ మినీ ల్యాబ్నే ఏర్పాటు చేశాడు. చివరకు కటకటాలపాలయ్యాడు.
యూట్యూబ్లో చూసి..
సూరత్లోని(Gujarat Surat News) వరచ్చా ప్రాంతంలో నివసించే జైమన్ సావనీ.. పదో తరగతి పాస్ అయ్యాడు. లాక్డౌన్లో అతడు మత్తుపదార్థాలకు అలవాటు పడ్డాడు. సులభంగా డబ్బులు సంపాదించేందుకు డ్రగ్స్ తయారు చేసి, అమ్మాలనుకున్నాడు. దాంతో యూట్యూబ్లో చూసి, గుట్టుగా ఓ మినీ ల్యాబ్ను(Lab for drugs) ఏర్పాటు చేశాడు. అయితే.. సూరత్ ఎస్ఓజీ అధికారులు అతని ల్యాబ్పై దాడులు చేసి అరెస్టు చేశారు.
సర్తానాలోని రాజ్వీర్ కాంప్లెక్స్లో సావనీ కార్యాలయంపై పోలీసు బృందం దాడులు జరిపింది. డ్రగ్స్ తయారు చేసేందుకు వినియోగించే ల్యాబ్ పరికరాలు, ముడి పదార్థాలను స్వాధీనం చేసుకుంది.
"సావనీని అతని స్వస్థలమైన భావ్నగర్ జిల్లాలో అరెస్టు చేసి, సూరత్కు తీసుకువచ్చాం. తాను మత్తుపదార్థాలకు బానిసయ్యానని సావనీ అంగీకరించాడు. సులభంగా డబ్బులు సంపాదించేందుకు అతడు మత్తుపదార్థాలను విక్రయించడం ప్రారంభించాడు. ఆ తర్వాత సొంతంగా మెథాంఫేటమిన్ అనే డ్రగ్ తయారు చేసేందుకుగాను అతడు తన ఆఫీసులో ఓ మినీ ల్యాబ్ను ఏర్పాటు చేశాడు.యూట్యూబ్లో చూసి సావనీ.. డ్రగ్స్ తయారు చేయడం నేర్చుకున్నాడు. రాజస్థాన్కు చెందిన కొందరు డ్రగ్స్ వ్యాపారుల ఈ విషయంలో అతనికి సాయం చేశారు. ఆన్లైన్లో అతడు తన ల్యాబ్కు కావాల్సిన పరికరాల కొనుగోలు చేశాడు"
-అజయ్ తోమర్, సూరత్ ఎస్పీ
ఈ రాకెట్లో ఇంకా ఎవరెవరి హస్తం ఉంది? రసాయన పదార్థాలను ఎక్కడి నుంచి కొనుగోలు చేశాడు? అన్న కోణంలో దర్యాప్తు చేపట్టామని పోలీసులు తెలిపారు.
ఇదీ చూడండి: ఇద్దరు ఉద్యోగస్థులను కిడ్నాప్ చేసిన నక్సలైట్లు!
