Google Removed 17 Apps : తక్కువ వడ్డీకే లోన్ ఇస్తామని వినియోగదారులను బురిడీ కొట్టిస్తున్న 17 మోసపూరిత ఆండ్రాయిడ్ ఆన్లైన్ రుణ యాప్లను ప్లేస్టోర్ నుంచి తొలగించింది ప్రముఖ టెక్ దిగ్గజం గూగుల్. స్లోవాక్ సాఫ్ట్వేర్ కంపెనీ ESET ఇచ్చిన నివేదిక ఆధారంగా ఈ నిర్ణయం తీసుకుంది. డిసెంబర్ 5న ఈ హానికరమైన అప్లికేషన్లను ఆండ్రాయిడ్ డివైజుల్లో గుర్తించింది గూగుల్. SpyLoanగా పేర్కొనే ఈ రకమైన యాప్స్ను ఈ ఏడాది దాదాపు 1.2 కోట్ల మంది యూజర్స్ ప్లేస్టోర్ నుంచి డౌన్లోడ్ చేసుకున్నారు.
ఈ స్పైలోన్ యాప్లు చట్టబద్ధమైన పర్సనల్ లోన్ సర్వీసెస్ అప్లికేషన్లుగా చెప్పుకుంటూ ఫండ్స్ను త్వరగా మరింత సులభతరంగా యాక్సెస్ చేసుకోవచ్చనే నమ్మకాన్ని యూజర్స్కు కలిగిస్తున్నాయని రిపోర్ట్ నివేదించింది. అంతేకాకుండా రకరకాల ఆకర్షణీయమైన ఆఫర్స్తో పాటు మార్కెట్ వడ్డీ రేటు కంటే తక్కువ శాతం వడ్డీలను ప్రకటిస్తూ వినియోగదారులను తప్పుదోవ పట్టిస్తున్నాయని సాఫ్ట్వేర్ సంస్థ ESET వెల్లడించింది. చివరకు బాధితుల బ్యాంక్ వివరాలు వంటి వ్యక్తిగత సమాచారాన్ని లోన్ యాప్లు సేకరించి వారి నుంచి పెద్ద మొత్తంలో నగదును దండుకుంటున్నాయని నివేదికలో చెప్పింది.
ప్లేస్టోర్ నుంచి గూగుల్ తొలగించిన SpyLoan యాప్స్ ఇవే(Google Play Store Removed Apps List)
- AA Kredit
- Amor Cash
- GuayabaCash
- EasyCredit
- Cashwow
- CrediBus
- FlashLoan
- PréstamosCrédito
- Préstamos De Crédito-YumiCash
- Go Crédito
- Instantáneo Préstamo
- Cartera grande
- Rápido Crédito
- Finupp Lending
- 4S Cash
- TrueNaira
- EasyCash
ఈ రుణ యాప్లు ప్రధానంగా ఆగ్నేయాసియా, ఆఫ్రికా, లాటిన్ అమెరికాలోని వినియోగదారులను లక్ష్యంగా చేసుకుని మోసాలకు పాల్పడుతున్నాయని రిపోర్ట్ స్పష్టం చేసింది.
స్పైలోన్ యాప్లు అంటే ఏమిటి?
ఈ యాప్లు ఆండ్రాయిడ్ యూజర్స్కు వ్యక్తిగత రుణాలను అందిస్తాయి. ఇవి తమను తాము ఓ చట్టబద్ధత కలిగిన ఆర్థిక సేవలందించే వాటిగా చిత్రీకరించుకుంటాయి. మార్కెట్లో ఉన్న దానికంటే అతి తక్కువ వడ్డీ రేట్లకే పర్సనల్ లోన్స్ను ఇస్తామని వినియోగదారులను నమ్మబలికిస్తాయి. వీటితో పాటు అనేక ఆకర్షణీయమైన ఆఫర్లను ప్రకటిస్తాయి. ఇలా రుణం మంజూరు చేశాక తమ విశ్వరూపాన్ని బాధితులపై ప్రదర్శిస్తాయి. యూజర్స్కు సంబంధించిన ఆర్థికపరమైన వివరాలను సేకరించి బ్లాక్మెయిల్ చేయడం మొదలుపెడతాయి.
వీటిని యాక్సెస్ చేస్తాయి
'ఈ స్పైలోన్ యాప్ల ద్వారా సదరు వ్యక్తి రుణం పొందాలంటే ముందుగా అప్లికేషన్ అడిగే అన్నీ వివరాలను సమర్పించాల్సి ఉంటుంది. లేదంటే లోన్ మంజూరు అవ్వదు. దీనినే ఆసరాగా చేసుకుని వందలకొద్దీ యాప్స్ వినియోగదారుల వ్యక్తిగత సమాచారాన్ని సులువుగా సేకరిస్తున్నాయి. తద్వారా వాటి సాయంతో బెదిరింపులకు పాల్పడుతున్నాయి' అని స్లోవాక్ సాఫ్ట్వేర్ కంపెనీ ESET ప్రచురించింది. ఈ సమాచారాన్ని కాల్ లాగ్స్, క్యాలెండర్ ఈవెంట్స్, డివైజ్ ఇన్ఫో, ఇన్స్టాల్డ్ యాప్స్, వై-ఫై నెట్వర్క్ ఇన్ఫో, డివైజ్లోని ఫైల్స్కు చెందిన సమాచారం, కాంటాక్ట్ లిస్ట్, లొకేషన్ డేటా, SMS సందేశాల ద్వారా యాక్సెస్ చేస్తాయి. కాగా, గూగుల్ ఇప్పటివరకు 200కుపైగా ఇలాంటి యాప్స్ను ప్లేస్టోర్ నుంచి తొలగించింది.
బ్యాటరీ సేవర్ మోడ్ ఆన్ చేసి ఉంచడం లాభమా? నష్టమా?
జియో e-సిమ్తో బోట్ స్మార్ట్వాచ్ - ఇక మొబైల్తో పనే లేదు! ధర ఎంతంటే?
