Army helicopter crash: తమిళనాడులోని కోయంబత్తూర్-కూనూర్ మధ్యలో హెలికాప్టర్ ప్రమాదానికి గురై భారత త్రిదళాధిపతి(సీడీఎస్) జనరల్ బిపిన్ రావత్ దుర్మరణం చెందారు. వెల్లింగ్టన్ సైనిక కళాశాలలో జరిగే ఓ కార్యక్రమంలో పాల్గొనేందుకు వెళ్లున్న సమంయంలో ఈ ప్రమాదం జరిగింది. ఆ సైనిక కళాశాలలోనే జనరల్ బిపిన్ రావత్ విద్యనభ్యసించటం గమనార్హం. చదువుకున్న కళాశాలకు వెళ్తూనే.. అనంతలోకాలకు వెళ్లటం బాధాకరం.
ఈ ప్రమాదం జరిగిన తీరు ఇలా..
- తమిళనాడు, వెల్లింగ్టన్లోని సైనిక కళాశాలలో జరిగే కార్యక్రమానికి సీడీఎస్ బిపిన్ రావత్, ఆయన భార్య, పలువురు ఆర్మీ అధికారులు ఉదయం 8.47 గంటలకు దిల్లీ నుంచి కే-3602 అనే విమానంలో సులూరుకు బయలుదేరారు.
- సూలూర్ వైమానిక స్థావరానికి ఉదయం 11.34 గంటల ప్రాంతంలో చేరుకున్న రావత్.. అక్కడి నుంచి ఆర్మీ హెలికాప్టర్ ఎంఐ-17వీ5లో వెల్లింగ్టన్కు 11 గంటల 48 నిమిషాలకు బయలుదేరారు. అక్కడి కళాశాలలో ఆయన మధ్యాహ్నం 2.45కి ప్రసంగించాల్సి ఉందని సమాచారం.
- వెల్లింగ్టన్కు చేరుకునే కొద్దిసేపటి ముందు మధ్నాహం 12.22 గంటల ప్రాంతంలో కూనూర్ సమీపంలో హెలికాప్టర్ ప్రమాదానికి గురైంది. నీలగిరి జిల్లాలోని కొండ ప్రాంతాల్లో శిథిలాలు పడిపోయాయి.
- సమాచారం అందుకున్న సైనిక అధికారులు.. సంఘటనా స్థలానికి చేరుకుని సహాయక చర్యలు చేపట్టారు. 80 శాతానికిపైగా కాలిన ఇద్దరిని ఆసుపత్రికి తరలించారు. మిగిలిన వారి కోసం గాలింపు చేపట్టారు.
- సీడీఎస్ జనరల్ బిపిన్ రావత్తో పాటు ఆయన భార్య, డిఫెన్స్ అసిస్టెంట్, సెక్యూరిటీ కమాండోలు, ఐఏఎఫ్ పైలట్లు.. మొత్తం 14 మంది చాపర్లో ఉన్నట్లు మధ్యాహ్నం 1.50 ప్రాంతంలో భారత వాయుసేన ప్రకటించింది. ప్రమాదానికి గల కారణాలను తెలుసుకునేందుకు విచారణకు ఆదేశించింది.
- ప్రమాదంపై మధ్యాహ్నం 2.30 గంటల ప్రాంతంలో కేంద్ర మంత్రివర్గం అత్యవసరంగా భేటీ అయింది. ప్రమాదంపై ప్రధాని మోదీకి రక్షణ మంత్రి రాజ్నాథ్ సింగ్ వివరించారు. సంఘటనా స్థలంలోని పరిస్థితులను పర్యవేక్షిస్తున్నట్లు అధికారులు తెలిపారు.
- సాయంత్రం 6.20 గంటల ప్రాంతంలో జనరల్ బిపిన్ రావత్ దంపతులు దుర్మరణం చెందినట్లు అధికారులు ప్రకటించారు. మరో 11 మంది కూడా చనిపోయినట్లు వెల్లడించారు. పైలట్ వరుణ్ మాత్రం గాయాలతో సైనిక ఆస్పత్రిలో చికిత్స పొందుతున్నారని చెప్పారు.
ఇదీ చూడండి: Army chopper crash: ఆర్మీ హెలికాప్టర్ క్రాష్ లైవ్ వీడియో!
