పాక్ తన వక్రబుద్ధిని మరోసారి ప్రదర్శించింది. సరిహద్దులో కాల్పుల విరమణ ఒప్పందాన్ని మళ్లీ ఉల్లంఘించింది. జమ్ముకశ్మీర్ కథువా జిల్లాలోని అంతర్జాతీయ సరిహద్దు వెంబడి ఉన్న గ్రామాలపై పాక్ సైన్యం కాల్పులకు తెగబడినట్లు అధికారులు వెల్లడించారు.
పాక్ ఆకస్మిక దాడులకు భారత సరిహద్దు రక్షణ దళాలు దీటుగా బదులిచ్చాయి. హీరానగర్, చక్ర గ్రామంలో తెల్లవారుజామున 4 గంటలకు మొదలైన కాల్పులు సుమారు రెండున్నర గంటలపాటు కొనసాగాయి. పాకిస్థాన్ రేంజర్లు డజన్ల కొద్ది ఫిరంగులతో దాడి చేశారని తెలిపారు అధికారులు.
ఈ ఘటనలో భారతీయ జవాన్లు, గ్రామస్థులకు ఎలాంటి ప్రమాదం వాటిల్లలేదని స్పష్టం చేశారు.
శుక్రవారం పూంచ్ జిల్లా, షాపూర్ సెక్టార్లోని నియంత్రణ రేఖ వద్ద జరిగిన కాల్పుల్లో.. ఓ గ్రామస్థుడు మృతి చెందగా.. నలుగురు గాయపడ్డారు. ఈ ఘటన జరిగి ఒక్క రోజు కూడా గడవకముందే.. పాక్ మరోసారి కాల్పుల విరమణను ఉల్లంఘించింది.
