ప్రపంచవ్యాప్తంగా కోట్లాది మంది యూజర్లు ఉన్న వాట్సాప్ ఎప్పటికప్పుడు కొత్త ఫీచర్లను ప్రవేశపెడుతూ ఉంటుంది. సింపుల్గా ఉంటూనే.. ఆకట్టుకునే ఫీచర్లన్నీ ఉండటం దీని ప్రత్యేకత. ఎండ్ టు ఎండ్ సెక్యూరిటీ ఉండటం దీనికి అదనపు బలం. అందుకే సందేశాలు పంపుకునేందుకు ఎక్కువ మంది వాట్సాప్నే ఉపయోగిస్తూ ఉంటారు. ఇప్పటికే అనేక అప్డేట్లతో ముందుకొచ్చిన వాట్సాప్.. తాజాగా మరో కొత్త ఫీచర్ను యూజర్లకు పరిచయం చేసింది. సొంతంగా రికార్డ్ చేసిన ఆడియో క్లిప్లను స్టేటస్లుగా పెట్టుకునే వీలు కల్పిస్తోంది. వాటిని వాట్సాప్ కాంటాక్టులతో షేర్ చేసుకునే అవకాశం ఇస్తోంది.
వాట్సాప్లో ఇప్పటికే ఇమేజ్, వీడియో, టెక్ట్స్ స్టేటస్లు పెట్టుకునే అవకాశం ఉంది. వీటికి అదనంగా వాయిస్ స్టేటస్ వచ్చినట్లైంది. వాయిస్ స్టేటస్ ద్వారా.. యూజర్ల మధ్య ఎంగేజ్మెంట్ మరింత మెరుగుపడే అవకాశం ఉంది. వ్యక్తిగత ఆలోచనలు, భావాలను వ్యక్తం చేసేందుకు ఇది మంచి ఆప్షన్ అవుతుంది. స్టేటస్లకు యూజర్లు పర్సనల్ టచ్ ఇచ్చుకోవచ్చనే ఉద్దేశంతో ఈ అప్డేట్ తీసుకొచ్చినట్లు వాట్సాప్ చెబుతోంది. మరి.. ఆండ్రాయిడ్ ఫోన్లో వాయిస్ స్టేటస్ను ఎలా షేర్ చేసేందుకు ఈ కింది స్టెప్స్ను ఫాలో అవ్వండి.
- ముందుగా వాట్సాప్ లేటెస్ట్ వెర్షన్ను ఇన్స్టాల్ చేసుకోవాలి.
- ఆండ్రాయిడ్ ఫోన్లో వాట్సాప్ను ఓపెన్ చేయాలి. తర్వాత స్టేటస్ ట్యాబ్ను క్లిక్ చేయాలి.
- స్క్రీన్పై కింద కనిపించే 'పెన్సిల్' సింబల్పై క్లిక్ చేయాలి.
- అప్పుడు టెక్ట్స్ స్టేటస్ విండో ఓపెన్ అవుతుంది. అదే స్క్రీన్పై కింది భాగంలో కుడి వైపున మైక్రోఫోన్ ఐకాన్ కనిపిస్తుంది.
- దానిపై ట్యాప్ చేసి రికార్డింగ్ మొదలు పెట్టాలి.
- మెసేజ్ రికార్డ్ చేస్తున్నంతసేపు మైక్రోఫోన్ బటన్ను నొక్కి పట్టుకోవాలి.
- 30 సెకన్ల వరకు ఆడియోను రికార్డు చేసుకోవచ్చు.
- మెసేజ్ రికార్డ్ చేసిన తర్వాత ప్రివ్యూ ఆప్షన్ కూడా అందుబాటులో ఉంటుంది. ప్లే బటన్పై క్లిక్ చేయడం ద్వారా రికార్డైన సందేశాన్ని విని చెక్ చేసుకోవచ్చు.
- వాయిస్ స్టేటస్ మెసేజ్ ఓకే అనిపిస్తే.. సెండ్ బటన్పై క్లిక్ చేయాలి.
- వెంటనే అది స్టేటస్గా మారిపోతుంది. మన కాంటాక్టుల్లోని వారందరికీ వాయిస్ స్టేటస్ కనిపిస్తుంది.
ఐఫోన్లో వాయిస్ స్టేటస్ ఇలా..
- ఐఫోన్లో వాట్సాప్ ఓపెన్ చేయాలి.
- స్టేటస్ ట్యాబ్లోని టాప్ రైట్ కార్నర్లో ఉన్న "+" ఐకాన్పై క్లిక్ చేయాలి.
- అక్కడ మైక్రోఫోన్ సింబల్ కనిపిస్తుంది. దానిపై క్లిక్ చేసి.. వాయిస్ రికార్డ్ చేసుకోవచ్చు.
- రికార్డ్ చేసిన వాయిస్ను చెక్ చేసుకొని, అవసరమైతే టెక్ట్స్ యాడ్ చేసుకోవచ్చు.
- చివరకు, సెండ్ బటన్ను టచ్ చేస్తే.. కాంటాక్టులకు వాయిస్ స్టేటస్ వెళ్లిపోతుంది.
అవసరమైతే వాయిస్ స్టేటస్కు టెక్ట్స్ను సైతం జోడించవచ్చు. ఇందుకోసం స్టేటస్ మెసేజ్ రికార్డ్ చేసే స్క్రీన్పై 'యాడ్ ఎ క్యాప్షన్' బటన్ ఉంటుంది. ఇతర స్టేటస్ల మాదిరిగానే.. వాయిస్ స్టేటస్ను సైతం నచ్చినవారికే కనిపించేలా పెట్టుకోవచ్చు. స్టేటస్ ప్రైవసీ ఆప్షన్ను సెట్ చేసుకొని.. ఎవరికి కావాలంటే వారికే కనిపించేలా సెట్టింగ్స్ మార్చుకోవచ్చు.
