ସୁବର୍ଣ୍ଣପୁର: ଚଳିତ ଖରିଫ ଋତୁ ଧାନ ସଂଗ୍ରହ ପାଇଁ ଜିଲ୍ଲାରେ ଆୟୋଜିତ ହୋଇଯାଇଛି ଜିଲ୍ଲାସ୍ତରୀୟ ପ୍ରସ୍ତୁତି ବୈଠକ । ଅତିରିକ୍ତ ଜିଲ୍ଲାପାଳ ଶରତ ଚନ୍ଦ୍ର ପଣ୍ଡାଙ୍କ ଅଧ୍ୟକ୍ଷତାରେ ଏହି ବୈଠକ ଅନୁଷ୍ଠିତ ହୋଇଛି । ଆୟୋଜିତ ବୈଠକରେ ଜିଲ୍ଲାର ଉଭୟ ବିଧାୟକ ତଥା ଅର୍ଥ ମନ୍ତ୍ରୀ ନିରଞ୍ଜନ ପୂଜାରୀ ଓ ପରିବହନ ମନ୍ତ୍ରୀ ପଦ୍ମନାଭ ବେହେରା ସାମିଲ ହୋଇଥିଲେ । ବୈଠକରେ ଉପସ୍ଥିତ ମନ୍ତ୍ରୀ ଓ ବିଧାୟକ ଚାଷୀଙ୍କ ସମସ୍ୟା ଶୁଣି ସମାଧାନ ପାଇଁ ଜିଲ୍ଲା ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି ।
ଚଳିତ ବର୍ଷ 64ଟି ସେବା ସମବାୟ ସମିତି ସହ 17ଟି ଆରଏମସି କ୍ରୟ କେନ୍ଦ୍ର ମାଧ୍ୟମରେ ଧାନ ସଂଗ୍ରହ ପାଇଁ ପ୍ରଶାସନ ନିଷ୍ପତ୍ତି ନେଇଛି । ସେହିପରି ଚଳିତ ବର୍ଷ ଖରିଫରେ 1 ଲକ୍ଷ 46 ହଜାର 300 କ୍ବିଣ୍ଟାଲ ଚାଉଳ ପାଇଁ ଧାନ ସଂଗ୍ରହ କରିବାକୁ ନିଷ୍ପତ୍ତି ହୋଇଛି । ଏଥିସହିତ ଚାଷୀଙ୍କୁ ଚଳିତ ଥର ସାଧାରଣ ଧାନ କ୍ବିଣ୍ଟାଲ ପିଛା 1815 ଟଙ୍କା ଓ ଗ୍ରେଡ-1 ଧାନ 1835 ଟଙ୍କାରେ ଦିଆଯିବା ନେଇ ହୋଇଥିବା ସରକାରୀ ନିଷ୍ପତ୍ତିକୁ ବୈଠକରେ ଘୋଷଣା କରାଯାଇଛି । ଆଗାମୀ 15 ତାରିଖରୁ ଜିଲ୍ଲାର ସମସ୍ତ 6 ଗୋଟି ବ୍ଲକର ପ୍ରତ୍ୟେକ ପଞ୍ଚାୟତରୁ ଚାଷୀଙ୍କ ପାଖରୁ ସିଧାସଳଖ ଧାନ ସଂଗ୍ରହ ପାଇଁ ବୈଠକରେ ନିଷ୍ପତ୍ତି ହୋଇଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
