ପାରାଦ୍ବୀପ: ଜଗତସିଂହପୁର ଜିଲ୍ଲା ପାରାଦ୍ବୀପ ବନ୍ଦରରେ ସନ୍ଦେହଜନକ ଭାବେ ଋଷୀୟ ଇଞ୍ଜିନିୟରଙ୍କ ମୃତ୍ୟୁ ଘଟଣା(Russian Engineer Suspicious death in Paradip Port)। ଆଜି ଏହି ଘଟଣାରେ ପ୍ରତିକ୍ରିୟା ରଖିଛନ୍ତି ନୂଆ କରି ଜଗତସିଂହପୁର ଆରକ୍ଷୀ ଅଧୀକ୍ଷକ ଭାବେ ଯୋଗଦେଇଥିବା ପି.ଆର ରାହୁଲ । ସେ କହିଛନ୍ତି ଯେ ଆଦର୍ଶ ଥାନା ନିକଟରୁ ଋଷୀୟ ନାଗରିକଙ୍କ ମୃତହେହ ଜବତ ହୋଇଛି । ତେବେ ବ୍ୟବଚ୍ଛେଦ ରିପୋର୍ଟ ଆସିବା ପରେ କିଛି କୁହାଯାଇପାରିବ ବୋଲି ସେ କହିଛନ୍ତି ।
ଆଜି ନୂତନ ଭାବେ କାର୍ଯ୍ୟରେ ଯୋଗ ଦେଇଛନ୍ତି ଏସପି ପି. ଆର ରାହୁଲ । ଏହାପରେ ଘଟଣା ନେଇ ପ୍ରତିକ୍ରିୟାରେ କହିଛନ୍ତି, "ଗତକାଲି ଆଦର୍ଶ ଥାନା ପାଖରୁ ମୃତଦେହକୁ ଜବତ କରାଯାଇ ମାଜିଷ୍ଟ୍ରେଟଙ୍କ ସମ୍ମୁଖରେ ବ୍ୟବଚ୍ଛେଦ କରାଯାଇଥିଲା । ଏହାପରେ ମୃତଦେହକୁ ସଂରକ୍ଷିତ ଗୃହରେ ରଖାଯାଇଛି । ପୋଲିସ ବନ୍ଦରରେ ୨୨ଜଣ କ୍ରୁ ମେମ୍ବରଙ୍କଠାରୁ ତଥ୍ୟ ସଂଗ୍ରହ କରିଛି । ବ୍ୟବଚ୍ଛେଦ ରିପୋର୍ଟ ଆସିଲା ପରେ କିଛି କୁହାଯାଇପାରିବ।" ଅନ୍ୟପକ୍ଷରେ ବାଂଲାଦେଶୀ ଜାହାଜ ପାରାଦ୍ବୀପ ବନ୍ଦରରେ ଥିବା ସମସ୍ତ କ୍ରୁ ମେମ୍ବରଙ୍କୁ ବନ୍ଦର ପକ୍ଷରୁ ଗେଷ୍ଟ ହାଉସରେ ରଖାଯାଇଛି । ବନ୍ଦର କର୍ତ୍ତୃପକ୍ଷ ଏ ଘଟଣାକୁ ନେଇ ଜାହାଜ ଚଳାଚଳ ମନ୍ତ୍ରଣାଳୟକୁ ଅବଗତ କରାଯାଇଛି । ବ୍ୟବଚ୍ଛେଦ ରିପୋର୍ଟ ଆସିବା ପରେ ସମ୍ପୂର୍ଣ୍ଣ ଘଟଣା ସାମ୍ନାକୁ ଆସିବ ବୋଲି କୁହାଯାଇଛି ।
ଏହା ବି ପଢନ୍ତୁ- ସରିଲା ଋଷୀୟ ଇଞ୍ଜିନିୟରଙ୍କ ମୃତଦେହ ବ୍ୟବଚ୍ଛେଦ, ଷ୍ଟେଟ ଫରେନ୍ସିକ ଲ୍ୟାବକୁ ଗଲା ନମୁନା
ସୂଚନା ଥାଉ କି ଗତ ସୋମବାର ବିଳମ୍ବିତ ରାତିରେ ଋଷୀୟ ଚିଫ୍ ଇଞ୍ଜିନିୟରଙ୍କ ସନ୍ଦେହଜନକ ମୃତ୍ୟୁ ଘଟିଥିଲା । ପାରାଦ୍ବୀପ ବନ୍ଦରଠାରୁ ସମୁଦ୍ରର ପ୍ରାୟ ୧୦ କିଲୋମିଟର ଦୂରରେ ଅଟକି ରହିଥିବା ଜାହାଜରୁ ଏହି ଋଷୀୟ ନାଗରିକଙ୍କ ମୃତେଦହକୁ ଉଦ୍ଧାର କରାଯାଇଥିଲା । ରବିବାର ମୃତଦେହ ବ୍ୟବଚ୍ଛେଦ ହୋଇଥିବା ବେଳେ ଏହି ସମୟର ଦୃଶ୍ୟକୁ ଭିଡିଓ ରେକର୍ଡିଂ କରାଯାଇଥିବା ସହ ଭିସେରା ଟେଷ୍ଟ (Viscera Test) ପାଇଁ ଶରୀର ପ୍ରମୁଖ ଅଙ୍ଗର ନମୁନା ସଂଗ୍ରହ କରାଯାଇଛି । ଏହାକୁ ଭୁବନେଶ୍ବରସ୍ଥିତ ରାଜ୍ୟ ଫରେନ୍ସିକ ଲ୍ୟାବକୁ ପଠାଯାଇଛି ।
ଏହା ବି ପଢନ୍ତୁ- ରହସ୍ୟରେ ଋଷୀୟ ଇଞ୍ଜିନିୟରଙ୍କ ମୃତ୍ୟୁ, ଆଜି ହେବ ପୋଷ୍ଟମର୍ଟମ
ଏହି ଘଟଣା ପର୍ବରୁ ରାୟଗଡ଼ା ଜିଲ୍ଲାରେ ମଧ୍ୟ ୨ ଋଷୀୟ ପର୍ଯ୍ୟଟକଙ୍କ ମୃତ୍ୟୁ ଘଟିଥିଲା । ସେମାନଙ୍କ ମଧ୍ୟରୁ ଜଣେ ଋଷ ପର୍ଯ୍ୟଟକ ପାଭେଲ ଆଣ୍ଟୋଭ ଋଷର ସାଂସଦ ଥିଲେ । ତେବେ ସେମାନେ ମୋଟ ୪ଜଣ ଓଡ଼ିଶା ଆସିଥିବା ବେଳେ ସେମାନଙ୍କ ମଧ୍ୟରୁ ୨ଜଣଙ୍କର ମୃତ୍ୟୁ ଘଟିଥିଲା । ଏହାପରେ ପୋଲିସର ତନାଘନା ଆରମ୍ଭ ହୋଇଥିଲା । ୨ ମୃତ ଋଷୀୟ ପର୍ଯ୍ୟଟକ ହେଉଛନ୍ତି ପାଭେଲ ଆଣ୍ଟୋଭ ଓ ଅନ୍ୟ ଜଣେ ଭ୍ଲାଦିମିର । ସେମାନଙ୍କ ସହିତ ଥିବା ଅନ୍ୟ ୨ ପର୍ଯ୍ୟଟକ ତଥା ଋଷୀୟ ଦମ୍ପତିଙ୍କୁ ପୋଲିସ ପଚରାଉଚରା କରିଥିଲା । ସେମାନଙ୍କ ମୃତ୍ୟୁ ହତ୍ୟା ନା ଆତ୍ମହତ୍ୟା ସେ ନେଇ ପୋଲିସ ତଦନ୍ତ ଜାରି ରଖିଛି ।
ଇଟିଭି ଭାରତ, ଜଗତସିଂହପୁର
