ବୌଦ୍ଧ: ହରଭଙ୍ଗା ବ୍ଲକ ଅନ୍ତର୍ଗତ ଲୁଣିବାହାଲ ପଞ୍ଚାୟତର ବାରବାଣୀ ଓ ଖଲିଆପାଲି ଗ୍ରାମ । ଏହି ଗାଁ ଦୁଇଟି ଜାତୀୟ ରାଜପଥ ନିକଟରେ ଥିଲେ ମଧ୍ୟ ଦୀପତଳ ଅନ୍ଧାର ଭଳି ଗାଁକୁ ପକ୍କା ରାସ୍ତା ଖଣ୍ଡେ ନାହିଁ । ଦୁଇ ଗ୍ରାମ ଆଦିବାସୀ ଅଧ୍ୟୁଷିତ ହୋଇଥିବା ବେଳେ ଅଧିକାଂଶ ପରିବାର ଆବାସ ଯୋଜନାରୁ ବଞ୍ଚିତ । ଖାଲି ଆବାସ ଘର ନୁହେଁ ପାନୀୟ ଜଳର ମଧ୍ୟ ଉତ୍କଟ ସମସ୍ୟା ରହିଛି । ସେପଟେ ଏଠାରେ ଜଳସେଚନର କୌଣସି ସୁବିଧା ନଥିବାରୁ ସରକାରୀ ଅର୍ଥ ଦଶ ଲକ୍ଷ ଟଙ୍କାରେ ଏକ ପୋଖରୀ ଖନନ କରାଯାଇଛି । କିନ୍ତୁ ସେଠାରେ ପାଣିର ଘୋର ଅଭାବ ପରିଲକ୍ଷିତ ହୋଇଛି ।
ଅନ୍ୟ ପୋଖରୀର ମଧ୍ୟ ଉନ୍ନତି କରଣ ନାଁରେ ସରକାରୀ ଅର୍ଥ କେବଳ ହଡପ ହେଉଥିବାବେଳେ ଏହା କେବଳ ଠିକାଦାର ପୋଷିବା ପାଇଁ ହୋଇଥିବା ଗ୍ରାମବାସୀ ଅଭିଯୋଗ କରିଛନ୍ତି । ସରକାର ରାସ୍ତା, ପୋଖରୀ ପାଇଁ ପର୍ଯ୍ୟାପ୍ତ ଅର୍ଥ ଯୋଗାଇ ଦେଇଥିଲେ ମଧ୍ୟ ଏଠାରେ ବିକାଶ କେବଳ ସୂଚନା ଫଳକରେ ସୀମିତ ରହିଥିବା ଅଭିଯୋଗ ହୋଇଛି । ତୁରନ୍ତ ଏଦିଗରେ ଜିଲ୍ଲା ପ୍ରଶାସନ ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ଗ୍ରହଣ ପାଇଁ ଦାବି ହୋଇଛି ।