ବରଗଡ: ଜିଲ୍ଲାରେ କ୍ୟାନସର ହସ୍ପିଟାଲ ଦାବୀ ନେଇ ଆନ୍ଦୋଳନ ତ୍ୱରାନ୍ୱିତ କରିବାକୁ ୟୁନାଇଟେଡ ଫୋରମ୍ ଫର୍ କ୍ୟାନସର ହସ୍ପିଟାଲ୍ ପକ୍ଷରୁ ନିଷ୍ପତି ନିଆଯାଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବରଗଡରେ କ୍ୟାନସର ହସ୍ପିଟାଲ ନିର୍ମାଣ କରାଯିବ ବୋଲି 2ଥର ଘୋଷଣା କଲାପରେ ମଧ୍ୟ ଏହି ଦିଗରେ କୌଣସି ପଦକ୍ଷେପ ନିଆଯାଉନାହି । ମିଛ ପ୍ରତିଶୃତି ଓ ମିଛ ଘୋଷଣାକୁ ଭଲଭାବରେ ବୁଝିପାରିଥିବା ବରଗଡବାସୀ ଏବେ କିନ୍ତୁ ଆଉ ଭରଷା କରୁନାହାନ୍ତି ସରକାରଙ୍କୁ ଏବଂ ବିରାଟ ଆନ୍ଦୋଳନପାଇଁ ନେଇସାରିଛନ୍ତି ନିଷ୍ପତ୍ତି |
ତେବେ ଏଥର କେବଳ ବରଗଡ ସହରରେ ନୁହେଁ ବରଂ ଗାଁ ଗାଁ ମାନଙ୍କରେ ହେବ ଆନ୍ଦୋଳନ | ମହାମାରୀ ପାଇଁ ବନ୍ଦ କରାଯାଇଥିବା କ୍ୟାନସର ହସ୍ପିଟାଲ୍ ସ୍ଥାପନ ଆନ୍ଦୋଳନକୁ ପୁଣି ଜୋରଦାର ଓ ଉଗ୍ର କରାଯିବାକୁ ନିଷ୍ପତ୍ତି ହୋଇଥିବା ବେଳେ ଆସନ୍ତା 19 ତାରିଖ ସକାଳ 10 ଘଣ୍ଟା ସମୟରେ ସ୍ଥାନୀୟ ମା ଶ୍ୟମା କାଳୀ ମନ୍ଦିର ସମ୍ମୁଖରୁ ଏକ ଶୋଭାଯାତ୍ରା ବାହାରି ଜିଲ୍ଲାପାଳଙ୍କ ଅଫିସରେ ପହଞ୍ଚି ଜିଲ୍ଲାରେ ନକଲି କୀଟନାଶକ ବ୍ୟବହାରକୁ ବନ୍ଦ କରିବା ଓ ବରଗଡ଼ ଜିଲ୍ଲାରେ ଯଥାଶୀଘ୍ର କ୍ୟାନସର ହସ୍ପିଟାଲ୍ ସ୍ଥାପନ କରିବାକୁ ଦାବିପତ୍ର ଦିଆଯିବ ।
ବରଗଡରୁ ରାଜେଶ ସରାପ, ଇଟିଭି ଭାରତ
