ଅନୁଗୋଳ: ଜିଲ୍ଲାରେ ଏବେ କୋରୋନା ଆତଙ୍କ ବଢାଉଛନ୍ତି ଗଞ୍ଜାମ ଫେରନ୍ତା । ଜିଲ୍ଲାରେ ମଙ୍ଗଳବାର 15 ନୂଆ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ମୋଟ ଆକ୍ରାନ୍ତ ସଂଖ୍ୟା 154ରେ ପହଞ୍ଚିଛି । ସଦ୍ୟ ଚିହ୍ନଟ ଆକ୍ରାନ୍ତଙ୍କ ମଧ୍ୟରେ ଜିଲ୍ଲାର ଶିଳ୍ପ ସଂସ୍ଥାରୁ 4, ଗଞ୍ଜାମ ଫେରନ୍ତା 4 ଜଣ ରହିଥିବା ବେଳେ ଅନ୍ୟମାନେ କଟକ ଓ ଭୁବନେଶ୍ବର ମେଡିକାଲ ଫେରନ୍ତା ବୋଲି ଜଣା ପଡିଛି । ଏନେଇ ସୂଚନା ଦେଇଛି ଜିଲ୍ଲା ପ୍ରଶାସନ ।
ସୂଚନା ମୁତାବକ ଜିଲ୍ଲାରେ ଚିହ୍ନଟ 15 ଆକ୍ରାନ୍ତଙ୍କ ମଧ୍ୟରେ 4 ଜଣ ବଅଁରପାଳ ବ୍ଲକରେ ଥିବା ବୃହତ ରାଷ୍ଟ୍ରାୟତ ଉଦ୍ୟୋଗରେ କାର୍ଯ୍ୟରତ । ସେହିପରି ସେହି ବ୍ଲକରୁ ଦୁଇ ଜଣ ବିହାର ଓ ପୁଣେ ଫେରନ୍ତା ମଧ୍ୟ ପଜିଟିଭ ଚିହ୍ନଟ ହୋଇଛନ୍ତି । ଉଭୟେ ହୋମ କ୍ବାରେଣ୍ଟାଇନରେ ରହିଥିବା ବେଳେ ସେମାନଙ୍କ ସ୍ବାବ ନମୂନା ପରୀକ୍ଷା କରାଯାଇଥିଲା । ସମାନ ଭାବେ ଶିଳ୍ପ ସଂସ୍ଥାରୁ ଚିହ୍ନଟ ଆକ୍ରାନ୍ତଙ୍କ ମଧ୍ୟରୁ 2 ଜଣ ଗଞ୍ଜାମ ଫେରନ୍ତା ବୋଲି ଜଣାପଡିଛି ।
କିଶୋର ନଗର ବ୍ଲକ ଅଞ୍ଚଳରୁ 6 ଜଣ ପଜିଟିଭ ଚିହ୍ନଟ ହୋଇଥିବା ବେଳେ ସେମାନଙ୍କ ମଧ୍ୟରୁ 4 ଜଣ ଗଞ୍ଜାମ ଫେରନ୍ତା ବୋଲି ଜଣା ପଡିଛି । ଏଥିସହ ଅନ୍ୟ ଦୁଇ ଜଣ କଟକ ଏସସିବି ଫେରନ୍ତା ବୋଲି ସ୍ପଷ୍ଟ ହୋଇଛି । ସେହିପରି ତାଳଚେର ବ୍ଲକରୁ ଚିହ୍ନଟ 2 ଜଣ କଟକ ବଡ ମେଡିକାଲରୁ ଆକ୍ରାନ୍ତ ହୋଇଥିବା ଜଣା ପଡିଛି । ଅନ୍ୟପଟେ ପାଲଲହଡା ବ୍ଲକରୁ ଚିହ୍ନଟ ଆକ୍ରାନ୍ତ ଭୁବନେଶ୍ବରର ଏକ ଘରୋଇ ହସ୍ପିଟାଲରେ ଚିକିତ୍ସାତ ହୋଇ ଫେରିଥିଲେ । ଏନେଇ ସୂଚନା ଦେଇଛି ଜିଲ୍ଲା ସୂଚନା ଓ ଲୋକ ସମ୍ପର୍କ ବିଭାଗ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
