ମାଡ୍ରିଡ୍: ରାଜତନ୍ତ୍ରକୁ ଅପମାନିତ କରିବା ଏବଂ ଆତଙ୍କବାଦକୁ ପ୍ରୋତ୍ସାହିତ କରିବା ପାଇଁ ଦିନକ ପୂର୍ବରୁ ହେପାଜତରେ ଥିବା ରାପ୍ ଗାୟକ ପାବଲୋ ହାସେଲଙ୍କୁ ପୋଲିସ ଗିରଫ କରିଥିଲା । ତେବେ ଏହାକୁ ବିରୋଧ କରି ମଙ୍ଗଳବାର ସନ୍ଧ୍ୟାରେ କାଟାଲୋନିଆର ଭିକ୍ ସହରରେ ବିକ୍ଷୋଭକାରୀମାନେ ପୋଲିସ ଷ୍ଟେସନକୁ ଭଙ୍ଗାରୁଜା କରିଥିବା ଦେଖିବାକୁ ମିଳିଛି ।
ଆନ୍ଦୋଳନକାରୀମାନେ ପୋଲିସ ଷ୍ଟେସନକୁ ପଥର ଫିଙ୍ଗି ଭଙ୍ଗାରୁଜା କରିଥିବା ଦେଖିବାକୁ ମିଳିଥିଲା । ଦୁର୍ବୃତ୍ତଙ୍କ ଏହି ଆକ୍ରମଣରେ 11 ଜଣ ପୋଲିସ କର୍ମଚାରୀ ଆହତ ହୋଇଥିବା କାଟାଲୋନିଆର ଆଞ୍ଚଳିକ ପୋଲିସ ମୋସୋସ୍ ଡିସ୍କାଡ୍ରା କହିଛନ୍ତି । ପୋଲିସ ତଦନ୍ତ କରି ଭିକ୍ରେ ଅତି କମ୍ରେ 4 ଜଣଙ୍କୁ ଅଟକ ରଖିଛି ।
ପୋଲିସ୍ ଏବଂ ସ୍ପେନର ରାପର ପାବଲୋଙ୍କ ମଧ୍ୟରେ ବିବାଦ ଆରମ୍ଭ ହୋଇଥିବା ବେଳେ ମଙ୍ଗଳବାର ଦିନ ଦଙ୍ଗା ବିରୋଧୀ ଅଧିକାରୀମାନେ ତାଙ୍କୁ ଏକ ବିଶ୍ୱବିଦ୍ୟାଳୟରୁ ଗିରଫ କରିଥିଲେ । ରାଜତନ୍ତ୍ରକୁ ଅପମାନିତ କରିବା ଏବଂ ଆତଙ୍କବାଦକୁ ପ୍ରୋତ୍ସାହିତ କରିଥିବାରୁ ସେ 9 ମାସର ଦଣ୍ଡ ଭୋଗିବାକୁ ଯାଉଥିବା ସୂଚନା ମିଳିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ