ମୁମ୍ବାଇ: ସାଉଥ୍ ସୁପରଷ୍ଟାର ରାମ ଚରଣ ଅକ୍ଟୋବର 3ରେ ଏକ ବିଜ୍ଞାପନ ସୁଟିଂ ପାଇଁ ମୁମ୍ବାଇରେ ପହଞ୍ଚିଥିଲେ । ଗୋଟିଏ ଦିନ ପରେ ସେ ମୁମ୍ବାଇର ପ୍ରସିଦ୍ଧ ସିଦ୍ଧିବିନାୟକ ମନ୍ଦିରରେ ଭଗବାନଙ୍କୁ ପୂଜା କରୁଥିବା ଦେଖିବାକୁ ମିଳିଥିଲା । ସେ ତାଙ୍କ ଟିମ୍ ସହିତ ଏକ ସ୍ୱତନ୍ତ୍ର ଦର୍ଶନ କରିଛନ୍ତି, ତାଙ୍କ ଆଗମନ ଖବର ପାଇବା ପରେ ପ୍ରଶଂସକମାନେ ତାଙ୍କ ଝଲକ ପାଇବା ପାଇଁ ମନ୍ଦିର ବାହାରେ ଏକତ୍ରିତ ହୋଇଥିଲେ । 48 ଦିନିଆ ଆୟାପ୍ପା ଦୀକ୍ଷା ଆରମ୍ଭ ପରେ ସେ କଳା କପଡା ପିନ୍ଧି ଖାଲି ପାଦରେ ଚାଲୁଥିବାର ନଜର ଆସିଥିଲେ ।
ରାମ ଚରଣ ବର୍ତ୍ତମାନ ତାଙ୍କର ଆଗାମୀ ଚଳଚ୍ଚିତ୍ର 'ଗେମ୍ ଚେଞ୍ଜର'ର ସୁଟିଂରୁ ବିରତି ନେଇଛନ୍ତି ଏବଂ ସେ ମୁମ୍ବାଇରେ ଏକ ବିଜ୍ଞାପନ ପାଇଁ ସୁଟିଂ କରୁଛନ୍ତି । ଉଲ୍ଲେଖନୀୟ ଯେ, ରାମ ଚରଣ ପ୍ରତିବର୍ଷ 48 ଦିନିଆ ଆୟାପ୍ପା ଦୀକ୍ଷା ନେଇଛନ୍ତି । ରାମ ଚରଣ ପ୍ରତିବର୍ଷ ଏହି ରୀତିନୀତି ପାଳନ କରନ୍ତି । କେରଳର ସାବରିମାଳା ମନ୍ଦିରରେ ପ୍ରବେଶ କରିବା ପୂର୍ବରୁ ଜଣେ ବ୍ୟକ୍ତିଙ୍କୁ ଏହାକୁ ପାଳନ କରିବାକୁ ପଡେ। ଏଥିପାଇଁ ଭକ୍ତମାନଙ୍କୁ ୪୧ଦିନ ଉପବାସ କରିବା ସହ ଖାଲି ପାଦରେ ଚାଲିବାକୁ ଏବଂ ତଳେ ଶୋଇବାକୁ ପଡେ । ରାମ ଚରଣ ଆୟାପ୍ପା ଦୀକ୍ଷା ନେଇଥିବାରୁ ୪୧ଦିନ ଉପବାସ କରିଛନ୍ତି । ଏହା ସହ ଖାଲି ପାଦରେ ଚାଲୁଛନ୍ତି ।
ତାଙ୍କୁ ଦେଖିବା ପାଇଁ ତାଙ୍କ ପ୍ରଶଂସକମାନେ ବାହାରେ ଏକାଠି ହୋଇଥିଲେ । ରାମ ଚରଣ ମଧ୍ୟ କଡା ସୁରକ୍ଷା ଭିତରେ ଏଠାକୁ ଆସିଥିଲେ । ବାପ୍ପାଙ୍କ ଦର୍ଶନ ପରେ ବାହାରକୁ ଯିବାବେଳେ ତାଙ୍କୁ ହାଲୁକା ନୀଳ ଶାଲ ଘୋଡାଇଥିବାର ଦେଖିବାକୁ ମିଳିଥିଲା । ସେ କପାଳରେ ଚନ୍ଦନ ଏବଂ ତିଲକ ଲଗାଇ ବାହାରକୁ ଆସିଥିଲେ । ଲୋକମାନେ ତାଙ୍କୁ ଚତୁର୍ଦ୍ଦିଗରୁ ଘେରି ରହିଥିଲେ। ଗଣମାଧ୍ୟମ ମଧ୍ୟ ତାଙ୍କ ସାମ୍ନାରେ ମାଇକ୍ ରଖିବାକୁ ଚେଷ୍ଟା କରିଥିଲା କିନ୍ତୁ ସେ କଥା ହୋଇପାରିଲେ ନାହିଁ । କେବଳ ହାତ ଯୋଡି ସମସ୍ତଙ୍କୁ ବିଦାୟ ଜଣାଇଲେ ।
ରାମ ଚରଣ କିଆରା ଆଡଭାନୀଙ୍କ ସହ 'ଗେମ୍ ଚେଞ୍ଜର'ରେ ନଜର ଆସିବେ । ଏହି ଚଳଚ୍ଚିତ୍ର ଆସନ୍ତା ବର୍ଷ ମୁକ୍ତିଲାଭ କରିବ। ତେବେ 2019ରେ ବିନୟ ବିଧୈୟ ରାମା ସାଉଥ ଫିଲ୍ମରେ କିଆରା ଏବଂ ରାମ ଚରଣ ଏକାଠି କାମ କରିବା ପରେ ପୁଣି ଗେମ୍ ଚେଞ୍ଜରରେ ଉଭୟଙ୍କୁ ନଜର ଆସିବେ । ଏସ ଶଙ୍କରଙ୍କ ଦ୍ବାରା ନିର୍ମିତ ଗେମ୍ ଚେଞ୍ଜର 3ଟି ଭାଷାରେ ଯଥା-ତେଲୁଗୁ, ତାମିଲ୍ ଏବଂ ହିନ୍ଦୀରେ ରିଲିଜ ହେବ । ଏହି ଫିଲ୍ମରେ ଏସ.ଜେ ସୂର୍ଯ୍ୟ, ଜୟରାମ, ଅଞ୍ଜଳି ଏବଂ ଶ୍ରୀକାନ୍ତ ମଧ୍ୟ ଅଭିନୟ କରିଛନ୍ତି ।
