ଭୁବନେଶ୍ବର: ରାଜ୍ୟ ପ୍ରଶାସନରେ 5ଟିକୁ ମୁଖ୍ୟମନ୍ତ୍ରୀଙ୍କର ଗୁରୁମନ୍ତ୍ର ଭାବରେ ପ୍ରଶାସନିକ ସ୍ତରରେ କାର୍ଯ୍ୟକାରୀ କରାଇବାକୁ ବ୍ୟାପକ ପ୍ରଚାର କରାଯାଉଛି । ଏହି 5ଟି ଏକ ମୁଖ୍ୟ ସ୍ଲୋଗାନ ଯାହା ପ୍ରଶାସନରେ ବ୍ୟାପକ ସ୍ବଚ୍ଛତା ରକ୍ଷା କରାଯାଉଛି । ଏହା କେବଳ ପ୍ରଚାର କରିବା ପାଇଁ ଉଦ୍ଦିଷ୍ଟ ଅଟେ ବୋଲି ରାଜ୍ୟ ସୂଚନା ଅଧିକାର ଅଭିଯାନ ଅଭିଯୋଗ କରିଛି ।
୨୦୦୫ ମସିହାରୁ ସ୍ବଚ୍ଛତା ଏବଂ ଉତ୍ତରଦାୟିତ୍ବ ରଖିବା ପାଇଁ ସୂଚନା ଅଧିକାର ଆଇନ କାର୍ଯ୍ୟକାରୀ ହୋଇଆସୁଛି । ଏହି ଆଇନର ଧାରା ୪(୧) (ବି) ଅନୁଯାୟୀ ସମସ୍ତ ସରକାରୀ ବିଭାଗରେ ସ୍ବେଚ୍ଛାକୃତ ଭାବେ ୭ ପ୍ରକାରର ତଥ୍ୟ ସ୍ଥାନୀୟ ଭାଷା ଅର୍ଥାତ ଓଡ଼ିଆ ଭାଷାରେ ପ୍ରକାଶ କରିବେ । ଏହି ସବୁ ତଥ୍ୟ ପ୍ରତିବର୍ଷ ପ୍ରତି ବିଭାଗ ବା କର୍ତ୍ତୃପକ୍ଷ ଦ୍ବାରା ନବୀକରଣ ହେବା କଥା ।
ହେଲେ ରାଜ୍ୟ ସରକାର ଏହା କରୁନାହାନ୍ତି । ଖାଲି ମିଛ ପ୍ରଚାର କରି ଜନସାଧାରଣଙ୍କୁ ଭଣ୍ଡାଉଛନ୍ତି ବୋଲି କହିଛନ୍ତି ଓଡିଶା ସୂଚନା ଅଧିକାର ଅଭିଯାନ ରାଜ୍ୟ ମୁଖ୍ୟ ପ୍ରଦୀପ ପ୍ରଧାନ । ଶନିବାର ଭୁବନେଶ୍ବରରେ ଏକ ସାମ୍ବାଦିକ ସମ୍ମିଳନୀରେ ସରକାରଙ୍କ ଉପରେ ବର୍ଷିଛନ୍ତି ପ୍ରଦୀପ ।
ଓଡିଶା ସୂଚନା ଅଧିକାର ସଂଶୋଧନ ନିୟମାବଳୀ ୨୦୦୬ ଅନୁଯାୟୀ ପ୍ରତି ସରକାରୀ କାର୍ଯ୍ୟାଳୟରେ ଏକ ରେଜିଷ୍ଟର ରହିବା କଥା । ଯେଉଁ ନାଗରିକମାନେ ଉକ୍ତ ତଥ୍ୟ ହାସଲ କରିବାକୁ ଯିବେ ସେମାନଙ୍କର ସବିଶେଷ ବିବରଣୀ ରହିବା କଥା । କିନ୍ତୁ ରାଜ୍ୟ ସରକାର ତାହା ନକରି ସୂଚନା ଆଇନରେ ଏହି ବ୍ୟବସ୍ଥାକୁ ନଷ୍ଟ କରିଦେବାକୁ ଚକ୍ରାନ୍ତ କରିଛନ୍ତି ବୋଲି ପ୍ରଦୀପ କହିଛନ୍ତି ।
ରାଜ୍ୟ ସରକାର ଅନଲାଇନରେ ସୂଚନା ପାଇଁ ଆବେଦନ କରିବା ପାଇଁ ବ୍ୟବସ୍ଥା କରିଛନ୍ତି । କିନ୍ତୁ ଏହି ବ୍ୟବସ୍ଥା ଦୀର୍ଘ ବର୍ଷ ଧରି ଅକାମୀ ହୋଇପଡିଛି । ତେଣୁ ସ୍ବଚ୍ଛ ଶାସନ ବା ସ୍ବଚ୍ଛତା କଥା କହିଲେ ସୂଚନା ଆଇନର ଵିଧି ବ୍ୟବସ୍ଥାକୁ କଡାକଡ଼ି ଭାବେ କାର୍ଯ୍ୟକାରୀ କରାଇଲେ ସମ୍ଭବ ହେବ ବୋଲି ସୂଚନା ଅଧିକାର କର୍ମୀମାନେ ସରକାରଙ୍କୁ ପରାମର୍ଶ ଦେଇଛନ୍ତି । ନହେଲେ ଅଯଥା ସ୍ବଚ୍ଛତାର ମିଥ୍ୟା ସ୍ଲୋଗାନ ଏବଂ ମିଥ୍ୟା ପ୍ରଚାରରୁ ନିବୃତ ରହିବାକୁ ପ୍ରଦୀପ ପ୍ରଧାନ ମୁଖ୍ୟମନ୍ତ୍ରୀଙ୍କୁ ନିବେଦନ କରିଛନ୍ତି ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ