ମୁମ୍ବାଇ: ଦଳ ବିରୋଧରେ ବିଦ୍ରୋହ କରି ଭାରତୀୟ ଜନତା ପାର୍ଟି ନେତୃତ୍ବାଧୀନ ଶାସକ ମେଣ୍ଟରେ ସାମିଲ ହୋଇ ନାଟକୀୟ ଢଙ୍ଗରେ ଉପମୁଖ୍ୟମନ୍ତ୍ରୀ ହୋଇଥିବା ଅଜିତ ପାଓ୍ବାରଙ୍କ ସହ ଦାଦା ତଥା ରାଷ୍ଟ୍ରବାଦୀ କଂଗ୍ରେସ ପାର୍ଟି (ଏନସିପି) ମୁଖ୍ୟ ଶରଦ ପାୱାରଙ୍କ ଭଲ ସମ୍ପର୍କ ରହିଛି । ଦଳୀୟ ବିଦ୍ରୋହ ପରେ ମଧ୍ୟ ଦୁହେଁ ଏକାଧିକ ଥର ସାକ୍ଷାତ କରିଛନ୍ତି । ଯାହା ଶରଦଙ୍କ ଭୂମିକା ଓ ରାଜନୈତିକ ଆଭିମୁଖ୍ୟକୁ ମଧ୍ୟ ସନ୍ଦେହ ଘେରକୁ ଟାଣିଛି । ଏହାରି ମଧ୍ୟରେ ଗତକାଲି ପୁଣେରେ ଅଜିତଙ୍କ ସହ ଶରଦଙ୍କ ଭେଟଘାଟକୁ ନେଇ ମଧ୍ୟ ଚର୍ଚ୍ଚା ଆରମ୍ଭ ହୋଇଥିବା ବେଳେ ଏଥିରେ ପୂର୍ଣ୍ଣଚ୍ଛେଦ ପକାଇଛନ୍ତି ନିଜେ ଶରଦ । ଅଜିତଙ୍କ ସହ ଆଲୋଚନା କୌଣସି ଗୁପ୍ତ ଆଲୋଚନା ନଥିଲା, କିମ୍ବା ଭାରତୀୟ ଜନତା ପାର୍ଟିରେ NCP ରେ କଦାପି ସାମିଲ ହେବ ନାହିଁ ବୋଲି ଶରଦ ସ୍ପଷ୍ଟ କରିଛନ୍ତି ।
ଶରଦ ଆଜି ଗଣମାଧ୍ୟମ ପ୍ରତିନିଧିଙ୍କ ପ୍ରଶ୍ନରେ କହିଛନ୍ତି, "ଏନସିପିର ଜାତୀୟ ସଭାପତି ଭାବରେ ମୁଁ ସ୍ପଷ୍ଟ କରୁଛି ଯେ, ମୋ ଦଳ (ଏନସିପି) ବିଜେପି ମେଣ୍ଟରେ ସାମିଲ ହେବ ନାହିଁ । ଭାରତୀୟ ଜନତା ପାର୍ଟି ସହିତ ଏନ୍ସିପିର ରାଜନୈତିକ ବିଚାରଧାରାର କୌଣସି ସାମଞ୍ଜସ୍ୟ ନାହିଁ । କିଛି ଶୁଭେଚ୍ଛୁ ମତେ ଏ ଦିଗରେ ମନାଇବା ପାଇଁ ଚେଷ୍ଟା କରୁଛନ୍ତି, କିନ୍ତୁ ଭାରତୀୟ ଜନତା ପାର୍ଟି ସହ ଏନ୍ସିପି କଦାପି ମେଣ୍ଟ କରିବ ନାହିଁ ।"
ତେବେ ଶରଦଙ୍କ ଏହି ସ୍ପଷ୍ଟୀକରଣ ପରେ ମଧ୍ୟ ଚର୍ଚ୍ଚା ଥମିବାର ନାଁ ନେଉନାହିଁ । କାରଣ ଯଦି ଏପରି କିଛି ଆଲୋଚନାର ବିଷୟ ନାହିଁ, ତେବେ ଦଳ ବିରୋଧରେ ବିଦ୍ରୋହ କରିଥିବା ଅଜିତ ଗୋଷ୍ଠୀ ବିରୋଧରେ କାର୍ଯ୍ୟାନୁଷ୍ଠାନ ଚେତାବନୀ ଦେଇଥିବା ଶରଦ କାହିଁକି ବାରମ୍ବାର ସାକ୍ଷାତ ଓ ଆଲୋଚନା କରୁଛନ୍ତି । ଗତମାସ (ଜୁଲାଇ)-2 ତାରିଖରେ ଅତି ନାଟକୀୟ ଢଙ୍ଗରେ ବିଜେପି ନେତୃତ୍ବାଧୀନ ମେଣ୍ଟରେ ଅଜିତଙ୍କ ସହ ଏନସିପିର କିଛି ବରିଷ୍ଠ ନେତା ସାମିଲ ହୋଇଥିଲେ । ଏହି ଗୋଷ୍ଠୀରେ ଶରଦଙ୍କ ବେଶ ଘନିଷ୍ଠ ପ୍ରଫୁଲ୍ଲ ପଟେଲ ଓ ଛଗନ ଭୁଜବଳ ମଧ୍ୟ ସାମିଲ ଥିଲେ । ସେହିଦିନ ଅଜିତ ପାଓ୍ବାରଙ୍କୁ ଉପମୁଖ୍ୟମନ୍ତ୍ରୀ ଓ ଅନ୍ୟ 8 ବିଧାୟକଙ୍କୁ ମଧ୍ୟ ମନ୍ତ୍ରୀ ପଦର ଶପଥ ଗ୍ରହଣ କରାଇଥିଲେ ରାଜ୍ୟପାଳ ।
ଏହା ମଧ୍ୟ ପଢନ୍ତୁ :-Maharashtra politics: NCP ଦୁଇଫାଳ, ଶରଦଙ୍କ କାର୍ଯ୍ଯାନୁଷ୍ଠାନକୁ ଅପେକ୍ଷା
ଏହାପରେ ଆରମ୍ଭ ହୋଇଥିଲା ଏନ୍ସିପିର ଦଳୀୟ ଅସ୍ଥିତ୍ୱ ଯୁଦ୍ଧ । ଶରଦ କ୍ୟାମ୍ପ ଅଜିତ ଗୋଷ୍ଠୀ ବିରୋଧରେ କାର୍ଯ୍ୟାନୁଷ୍ଠାନ ଚେତାବନୀ ଦେଇଥିବା ବେଳେ ଅଜିତ କ୍ୟାମ୍ପ ନିଜକୁ ମୁଖ୍ୟ ଏନ୍ସିପି ଦାବି କରି ଦଳର ମାନ୍ୟତା ପାଇଁ ନିର୍ବାଚନ କମିଶନଙ୍କ ଦ୍ବାରସ୍ଥ ହୋଇଥିଲା । ହେଲା ଏହା ପରେ ଅଜିତ ଓ ଶରଦଙ୍କ ମଧ୍ୟରେ ଏକାଧିକ ଥର ବୈଠକ ମଧ୍ୟ ହେଲାଣି । ଯାହା ଶରଦଙ୍କ ଭୂମିକାକୁ ସନ୍ଦେହକୁ ଟାଣୁଛି । ଏହାରି ମଧ୍ୟରେ ଶରଦ କିନ୍ତୁ ବିଜେପି ମେଣ୍ଟରେ ସାମିଲ ଚର୍ଚ୍ଚାତୁ ସମ୍ପୂର୍ଣ୍ଣ ଖଣ୍ଡନ କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
