ନୂଆଦିଲ୍ଲୀ: ଜାତୀୟ ନ୍ୟାୟିକ ଡାଟା ଗ୍ରୀଡ(NJDG) ଉପଲବ୍ଧ ହେଲା ସର୍ବୋଚ୍ଚ କୋର୍ଟଙ୍କ କାର୍ଯ୍ୟାବଳୀର ସମ୍ପୂର୍ଣ୍ଣ ତଥ୍ୟ । NJDG ଓ୍ବେବ୍ସାଇଟରେ ସର୍ବୋଚ୍ଚ କୋର୍ଟ ଓ ଦେଶର ଅନ୍ୟ ସମସ୍ତ ସ୍ତରର କୋର୍ଟରେ ଶୁଣାଣି ପ୍ରକ୍ରିୟା ମଧ୍ୟରେ ଥିବା ଓ ଶୁଣାଣି ଶେଷ ହୋଇ ରାୟ ପ୍ରକାଶ ପାଇସାରିଥିବା ମାମଲା ସମ୍ପର୍କିତ ସମସ୍ତ ତଥ୍ୟ ମିଳିପାରିବ । ଆଜି ପ୍ରଧାନ ବିଚାରପତି ଜଷ୍ଟିସ ଡି.ଓ୍ବାଇ ଚନ୍ଦ୍ରଚୂଡ଼ ଏହି ଘୋଷଣା କରିବା ସହ ଏହାକୁ ନ୍ୟାୟିକ ବ୍ୟବସ୍ଥାରେ ଐତିହାସିକ ଦିନ ବୋଲି କହିଛନ୍ତି ।
ଆଜି(ଗୁରୁବାର) ସର୍ବୋଚ୍ଚ କୋର୍ଟରେ ଏକ ମାମଲାର ଶୁଣାଣି କରିବା ପୂର୍ବରୁ ପ୍ରଧାନ ବିଚାରପତି ଚନ୍ଦ୍ରଚୂଡ଼ ଏହି ଘୋଷଣା କରିବା ସହ ଖୁସି ବ୍ୟକ୍ତ କରିଥିଲେ । ଭାରତୀୟ ନ୍ୟାୟିକ ବ୍ୟବସ୍ଥାରେ ଆଜିର ଦିନକୁ ଐତିହାସିକ ବୋଲି ଦର୍ଶାଇଥିଲେ । ରିୟଲ-ଟାଇମ ଆଧାରରେ ଏହି ଶୁଣାଣି ସମ୍ପର୍କିତ ସମସ୍ତ ଡାଟା(NJDG)ର ଓ୍ବେବ୍ସାଇଟରେ ଅପ୍ଲୋଡ୍ ହେବ । ଏହି ସିଷ୍ଟମକୁ NIC ଓ ସୁପ୍ରିମକୋର୍ଟର ଇନ-ହାଉସ ଟିମ୍ ମିଳିତ ଭାବେ ବିକଶିତ କରିଛନ୍ତି । ଏବେ ଶୁଣାଣି ଜାରି ରହିଥିବା ଓ ସମାଧାନ ହୋଇ ରାୟ ପ୍ରକାଶ ପାଇଥିବା ମାମଲାର ସବିଶେଷ ତଥ୍ୟ ଗୋଟିଏ କ୍ଲିକରେ ମିଳିପାରିବ । ସେହିପରି ବାର୍ଷିକ ପେଣ୍ଡିଂ ମାମଲା, ପଞ୍ଜୀକୃତ ହୋଇଥିବା ମାମଲା, ଶୁଣାଣି ପାଇଁ ସୂଚୀଭୁକ୍ତ ହୋଇଥିବା ମାମଲା ସମ୍ପର୍କରେ ମଧ୍ୟ ବିସ୍ତୃତ ତଥ୍ୟ ମିଳିପାରିବ ।
ଏହି ବ୍ୟବସ୍ଥା ସାଧାରଣ ଲୋକଙ୍କୁ ଭାରତୀୟ ନ୍ଯାୟିକ ବ୍ୟବସ୍ଥାର କାର୍ଯ୍ୟପ୍ରଣାଳୀ ସମ୍ପର୍କରେ ତଥ୍ୟ ଦେବା ସହ ଟ୍ରାଏଲ ପ୍ରକ୍ରିୟାରେ ମଧ୍ୟ ପାରଦର୍ଶିତା ଓ ଉତ୍ତରଦାୟିତ୍ବକୁ ବୃଦ୍ଧି କରିବା ନେଇ ପ୍ରଧାନ ବିଚାରପତି ଆଶାବ୍ୟକ୍ତ କରିଛନ୍ତି । ବର୍ତ୍ତମାନ ସୁଦ୍ଧା 583 ମାମଲା ସର୍ବୋଚ୍ଚ କୋର୍ଟର 3ଜଣିଆ ଖଣ୍ଡପୀଠ ନିକଟରେ ପେଣ୍ଡିଂ ରହିଛି । ସେହିପରି 288 ମାମଲା 5ଜଣିଆ ବା ସାମ୍ବିଧାନିକ ଖଣ୍ଡପୀଠ ନିକଟରେ ଓ 21 ଗମ୍ଭୀର ମାମଲା 7ଜଣିଆ ଖଣ୍ଡିପୀଠ ନିକଟରେ ଓ 135ଟି ଅତି ଗମ୍ଭୀର ମାମଲା ବୃହତ୍ତର ବା 9ଜଣିଆ ସାମ୍ବିଧାନିକ ଖଣ୍ଡପୀଠ ନିକଟରେ ପେଣ୍ଡିଂ ରହିଥିବା ପ୍ରଧାନ ବିଚାରପତି ଚନ୍ଦ୍ରଚୂଡ଼ ସୂଚନା ଦେଇଛନ୍ତି ।
ଏହା ମଧ୍ୟ ପଢନ୍ତୁ :- ଠିକା ଅଧ୍ୟାପକଙ୍କ ଭରସାରେ ଯୋଧପୁର ଜାତୀୟ ଆଇନ ବିଶ୍ବବିଦ୍ୟାଳୟ ! ସୁପ୍ରିମକୋର୍ଟଙ୍କ ଉଦବେଗ
ତଥ୍ୟ ଅନୁଯାୟୀ, ଚଳିତ ବର୍ଷ ସୁପ୍ରିମକୋର୍ଟରେ ମୋଟ 37,777 ମାମଲା ରୁଜୁ ହୋଇଛି । ସେଥିମଧ୍ୟରୁ ଏପର୍ଯ୍ୟନ୍ତ 36,164 ଟି ମାମଲା ସମାଧାନ ହୋଇସାରିଛି । ତଥ୍ୟରେ ଆହୁରି ମଧ୍ୟ ଦର୍ଶାଯାଇଛି ଯେ, ଗତ ମାସରେ ସର୍ବୋଚ୍ଚ ଅଦାଲତରେ 5,412ଟି ମାମଲା ଦାୟର କରାଯାଇଥିଲା । ସେଥିମଧ୍ୟରୁ 5,033 ମାମଲା ସମାଧାନ କରାଯାଇ ସାରିଛି । ସେହିପରି ଏବେ ସୁଦ୍ଧା ମୋଟ ପଞ୍ଜୀକୃତ ମାମଲାଗୁଡ଼ିକ ମଧ୍ୟରୁ 64,854 ମାମଲା ଏବଂ ଅଣପଞ୍ଜୀକୃତ ମାମଲାଗୁଡ଼ିକ ମଧ୍ୟରୁ 15,490ଟି ସର୍ବୋଚ୍ଚ କୋର୍ଟରେ ପେଣ୍ଡିଂ ରହିଛି । ଏବେ ଏହି ପ୍ରକାର ସମସ୍ତ ତଥ୍ୟ NJDG ଓ୍ବେବସାଇଟ୍ରେ ଉପଲବ୍ଧ ହେବାକୁ ଯାଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
