ନିଆଳି: ପ୍ରାର୍ଥୀଙ୍କ ପାଇଁ ଟେନସନ ସାଜିଛି ଟାଣ ଖରା । ରାଜ୍ୟରେ ପ୍ରବଳ ଗ୍ରୀଷ୍ମ ପ୍ରବାହ ଯୋଗୁ ଦିନରେ ବେଳା ପ୍ରଚାର କଷ୍ଟସାଧ୍ୟ ହୋଇପଡୁଛି । ଯେଉଁଥିପାଇଁ ସନ୍ଧ୍ୟାରେ ଘର ଘର ବୁଲି ପ୍ରଚାର କାର୍ଯ୍ୟ ଚଳାଉଛନ୍ତି ନେତା ଓ କର୍ମୀମାନେ । ଭୁବନେଶ୍ୱର ସଂସଦୀୟ କ୍ଷେତ୍ର ଅନ୍ତର୍ଗତ ଜୟଦେବ ବିଧାନସଭା ଆସନ ପାଇଁ ଆସନ୍ତା ୨୫ ତାରିଖରେ ଭୋଟ ଗ୍ରହଣ ହେବ । ମତଦାନକୁ ଆଉ ଏକ ମାସରୁ କମ ସମୟ ଥିବା ବେଳେ ଗ୍ରୀଷ୍ମ ପ୍ରବାହ ଯୋଗୁ ପ୍ରଭାବିତ ହେଉଛି ପ୍ରଚାର ।
ରବିବାର ରାତିରେ ବିଜେପି ଭୁବନେଶ୍ୱର ସାଂସଦ ପ୍ରାର୍ଥୀ ଅପରାଜିତା ଷଡ଼ଙ୍ଗୀ ଏବଂ ବିଜେପି ନେତା ସତ୍ୟପ୍ରିୟ ବେହେରା ଭିନ୍ନ ଭିନ୍ନ ସ୍ଥାନରେ ନିର୍ବାଚନ ପ୍ରଚାର କରିଛନ୍ତି । ସାଂସଦ ପ୍ରାର୍ଥୀ ଅପରାଜିତା ଷଡ଼ଙ୍ଗୀ ଖୋର୍ଦ୍ଧା ଜିଲ୍ଲା ବାଲିଅନ୍ତା ବ୍ଲକ ବେଣ୍ଟପୁର ପଞ୍ଚାୟତସ୍ଥିତ ଓଡିଆ ଆଦର୍ଶ ବିଦ୍ୟାଳୟ ନିକଟରେ କର୍ମୀ ସମ୍ମିଳନୀ କରି ସ୍ଥାନୀୟ ଭୋଟରଙ୍କୁ ନିଜ ସପକ୍ଷରେ ଭୋଟ ଭିକ୍ଷା କରିଛନ୍ତି । ଏଥିସହ ବିଗତ ପାଞ୍ଚ ବର୍ଷ ମଧ୍ୟରେ ତାଙ୍କ କାର୍ଯ୍ୟକାଳରେ ଜୟଦେବରେ କ'ଣ ସବୁ ବିକାଶ ହୋଇଛି ଏବଂ ଆଗକୁ କ'ଣ ସବୁ ବାକି ରହିଛି ତା'ର ସମାଧାନ କିପରି ହେବ ଏ ନେଇ ଉପସ୍ଥିତ ଭୋଟରଙ୍କୁ ହିସାବ ଦେଇଥିଲେ ।
ଏହି ଅବସରରେ ଅପରାଜିତା ଷଡଙ୍ଗୀ କହିଛନ୍ତି, " ଜନ ସମ୍ପର୍କ ଓ ଲୋକସେବା ରାଜନୀତିର ଆଧାର । ବଞ୍ଚିଥିବା ଯାଏ ଭୁବନେଶ୍ୱର ଲୋକସଭା ଆସନ କ୍ଷେତ୍ରରେ କାମ କରୁଥିବି । ଗରିବର ବିକାଶ ହେଉ, ସମସ୍ତଙ୍କ ମୁହଁରେ ହସ ଫୁଟୁ ।"
ସେହିପରି ବିଜେପି ନେତା ତଥା ସିଦ୍ଧି ବିନାୟକ ଚାରିଟେବୁଲ ଟ୍ରଷ୍ଟ ଅଧ୍ୟକ୍ଷ ସତ୍ୟପ୍ରିୟ ବେହେରା ବାଲିଅନ୍ତା ବ୍ଲକ ମଝିଗଡ ଏବଂ ବାଲିପାଟଣା ବ୍ଲକ ମଝିହରା ଅଞ୍ଚଳରେ କର୍ମୀ ସମ୍ମିଳନୀ ମାଧ୍ୟମରେ ନିଜର ପ୍ରଚାର ଆରମ୍ଭ କରିଛନ୍ତି । ଜୟଦେବର ବିକାଶ ପାଇଁ ଭୋଟର ଠିକ ପ୍ରାର୍ଥୀ ବାଛିବାକୁ କହିଛନ୍ତି ସତ୍ୟପ୍ରିୟ । ଟାଣ ଖରା ଯୋଗୁ ରାତିରେ ପ୍ରଚାର କରାଯାଉଥିବା କହିଛନ୍ତି ସତ୍ୟପ୍ରିୟ । ଅଭିନେତ୍ରୀ ବିଦ୍ଯୁସ୍ମିତା ସତ୍ୟପ୍ରିୟ ବେହେରାଙ୍କ ପାଇଁ ପ୍ରଚାର ଚଳାଇଛନ୍ତି ।
ଏଠାରେ ସୂଚନାଯୋଗ୍ୟ ଯେ ସତ୍ୟପ୍ରିୟ ବେହେରା ବିଜେପି ଟିକେଟ ପାଇଁ ଚେଷ୍ଟା କରି ବିଫଳ ହେବା ପରେ ସ୍ବାଧିନ ପ୍ରାର୍ଥୀ ଭାବରେ ଲଢିବା ପାଇଁ ସିଧ ସଳଖ ଖୋଲା ଖୋଲି ଆହ୍ୱାନ ଦେଇଛନ୍ତି । କର୍ମୀ ସମ୍ମିଳନୀ ମାଧ୍ୟମରେ ଜୟଦେବ ଭୋଟରଙ୍କ ନିକଟତର ହେବା ସହିତ ଆର୍ଶୀବାଦ ଭିକ୍ଷା କରୁଥିବା ନେଇ ସୂଚନା ମିଳିଛି । ତେବେ ଜୟଦେବ ବିଧାନସଭା ଆସନରେ ବିଜେଡି, ବିଜେପି ଓ କଂଗ୍ରେସ ବିଧାୟକ ପ୍ରାର୍ଥୀ ଘୋଷଣା ପରେ ବି ସତ୍ୟପ୍ରିୟ ବେହେରା ସ୍ବାଧିନ ପ୍ରାର୍ଥୀ ଭାବରେ ଲଢିବା ପାଇଁ ଆହ୍ବାନ ଦେବା ପରେ ବିଜେପି ପାଇଁ ଅଡୁଆ ହୋଇପାରେ ବୋଲି ଜୟଦେବରେ ଚର୍ଚ୍ଚା ହେଉଛି । ଜୟଦେବରେ ବିଜେପି ଭୋଟ ଭାଗ ଭାଗ ହେବାର ସମ୍ଭାବନା ମଧ୍ୟ ସୃଷ୍ଟି ହୋଇଛି । ତେବେ ନାମାଙ୍କନ ପତ୍ର ଦାଖଲ ପରେ ସ୍ପଷ୍ଟ ହେବ ଜୟଦେବ ଗତି କେଉଁ ଆଡ଼କୁ ଯାଉଛି ।
ଇଟିଭି ଭାରତ, ନିଆଳି
