Atul Bora replied: কৃষিত দুৰ্নীতি চলিয়েই আছে বুলি মনে নধৰে অতুল বৰাৰ
গোলাঘাট কৃষি বিষয়াৰ কাৰ্যালয়ত ব্যাপক অনিয়ম (scam in agriculture department) হোৱা বুলি কৃষকৰ পৰা অভিযোগ পাই কাৰ্যালয়টোত চাডেন ভিজিট কৰিছিল খুমটাই সমষ্টিৰ বিধায়ক মৃণাল শইকীয়াই ৷ এগৰাকী কৰ্মচাৰীৰ বিৰুদ্ধে ধন বিচৰাৰ অভিযোগ উত্থাপন হোৱাত জেপত পাঁচশ টকা গুজি দি কেমেৰাৰ সমুখতে কৃষকৰ কাগজত চহী কৰি দিবলৈ কৈছিল বিধায়কজনে (Mrinal Saikia suddent visit)৷ লগতে এনে ধৰণৰ অনিয়ম হোৱাতকৈ দুবছৰমানৰ বাবে কৃষি বিভাগ বন্ধ কৰি দিবলৈও তেওঁ আহ্বান জনায় ৷ কোনো বিভাগত দুৰ্নীতি আদি পোহৰলৈ আনিলে বিভাগৰ মন্ত্ৰীয়ে ইতিকিংহে কৰে বুলি কৃষিমন্ত্ৰীক কটাক্ষ কৰে মৃণাল শইকীয়াই (Mrinal Saikia on agriculture scam)। বিধায়ক থকাৰ কোনো অৰ্থ নাই বুলিও তেওঁ উল্লেখ কৰে । বিধায়কগৰাকীৰ এই বিষোদগাৰৰ প্ৰত্যুত্তৰ দিছে কৃষিমন্ত্ৰী অতুল বৰাই ৷ মন্ত্ৰীগৰাকীয়ে কয় যে, পি এম কিষাণ আঁচনি প্ৰৱৰ্তনৰ সময়ত যি দুৰ্নীতিৰ অভিযোগ উঠিছিল তাৰ বিৰুদ্ধে কঠোৰ ব্যৱস্থা গ্ৰহণ কৰা হৈছিল ৷ গতিকে বৰ্তমান বিভাগটোৰ বিষয়া-কৰ্মচাৰীয়ে দুৰ্নীতি কৰিবলৈ ইমান সাহস নকৰে ৷ তথাপিও যদি তেনে ঘটনা ঘটিছে, তাৰ তদন্ত কৰা হ’ব বুলি তেওঁ কয় ৷ সাধাৰণ লোকেই হওক বা এগৰাকী বিধায়কেই হওক, এনে অভিযোগ উত্থাপন কৰিছে যেতিয়া বিষয়টো গুৰুত্ব সহকাৰে লোৱা হ’ব বুলি মন্ত্ৰীয়ে আশ্বাস দিয়ে ৷