ওদালগুৰি, 18 নৱেম্বৰ: ওদালগুৰি জিলাৰ ভাৰত-ভূটান সীমান্ত অঞ্চল সমূহত অব্যাহত আছে হাতী-মানুহৰ সংঘাত । দেওবাৰে নিশা জিলাখনত বন্যহস্তীৰ আক্ৰমণত পুনৰ এজন লোকৰ মৃত্যু হোৱাৰ লগতে গুৰুতৰভাৱে আহত হ'ল ৩ জনলৈ লোক । জানিব পৰা মতে দেওবাৰে নিশা 10 মান বজাত জিলা খনৰ ভূটান সীমান্তৱৰ্তী ২ নং ছেগুনবাৰীত 7 জনীয়া এটা যুৱকৰ দলে বন্যহস্তীৰ উপদ্ৰৱৰ পৰা খেতি পথাৰৰ লগতে গাঁওবাসীক ৰক্ষা কৰিবলৈ পহৰা দিয়াত ব্যস্ত আছিল। তেনে সময়তে গাঁও খনত প্ৰৱেশ কৰে ১০ টা বন্যহস্তীৰ এটা জাকে। জাকটো খেতি পথাৰত প্ৰৱেশ কৰোতেই পহৰা দি থকা যুৱক কেইজনে জাকটো খেদি পঠিয়াবলৈ চেষ্টা কৰে কিন্তু তেনে সময়তে জাকৰ মাজৰ পৰা এটা হাতী ফালৰি কাটি আহি যুৱক কেইজনক আক্ৰমণ কৰে।
এই আক্ৰমণৰ ফলত থিতাতে মৃত্যু হয় মাংগা মুণ্ডা (৩১) নামৰ যুৱকজনৰ। আক্ৰমণটোত গুৰুতৰভাৱে আহত হয় ফুলজেন মুণ্ডা,চানিকা মুণ্ডা আৰু কণজিৎ ৰাজবংশী । পিছত আহত আটাইকেইজনকে স্থানীয় ৰাইজে উদ্ধাৰ কৰি ততাতৈয়াকৈ টংলা প্ৰাথমিক চিকিৎসালয়লৈ প্ৰেৰণ কৰে । উল্লেখ্য যে,ওদালগুৰি জিলাত চলিত বৰ্ষতে হাতীৰ আক্ৰমণত 22 জনকৈ লোকৰ মৃত্যু হৈছে যদিও হাতী-মানুহৰ সংঘাত ৰোধত চূড়ান্ত ব্যৰ্থ হৈছে বিয়াগোম বন বিভাগ।
লগতে চাওকঃজলাশয় বুলি পানী টেংকিত সোমাল হাতী পোৱালি
