গুৱাহাটী,17 নৱেম্বৰ: ক্ৰমাৎ ৰাজ্যত বৃদ্ধি পাইছে হস্তী-মানৱ সংঘাত ৷ ৰাজ্যৰ ভিন্ন প্ৰান্তৰ লগতে বিগত সময়ছোৱাত গুৱাহাটী মহানগৰীতো এনে সংঘাত বৃদ্ধি পোৱা পৰিলক্ষিত হৈছে । সমান্তৰালভাৱে বনাঞ্চল ধ্বংসৰ বাবেও বিভিন্ন কাৰণত বহু বন্যহস্তী মৃত্যুমুখত পৰিছে ৷ দেওবাৰে নাৰেংগী অঞ্চলত সংঘটিত হয় এক কৰুণ ঘটনা ৷ ঘটনা অনুসৰি বনাঞ্চলৰ পৰা জনাঞ্চললৈ পোৱালি সহ ওলাই অহা এটা হাতী অঞ্চলটোৰে এটা ঘৰত পানী ৰখা টেংকিত পৰি যায় । যদিও লগে লগে জেচিবিৰ সহায়ত বহু চেষ্টাৰ অন্তত বন কৰ্মীসকলে পোৱালী সহ হাতীটোক উদ্ধাৰ কৰিবলৈ সক্ষম হয় ৷ পাছত বনকৰ্মীসকলে হাতী আৰু হাতীৰ পোৱালিটোক পুনৰ সংস্থাপনৰ ব্যৱস্থা কৰে । এই সন্দৰ্ভত হাতীটোক সময়মতে উদ্ধাৰ নকৰা হ'লে হাতীৰ জাকটো অঞ্চলটোত আক্ৰমণাত্মক হৈ পৰাৰ সম্ভাৱনাও আছিল বুলি বনবিভাগৰ লোকে মন্তব্য কৰে ।
উল্লেখ্য যে বৰ্তমান সময়ত যিসমূহ অঞ্চল লোকে লোকাৰণ্য হৈ পৰিছে ৫০-৬০ বছৰ আগলৈকে সেইবোৰ আছিল হাতী তথা আন বন্যপ্ৰাণীৰ বিচৰণস্থলী । এনে পৰিপ্ৰেক্ষিতত হাতী জনাঞ্চললৈ খাদ্য বিচাৰি ওলাই অহাৰ বাবেই এনে ধৰণৰ সংঘাত সংঘটিত হৈছে বুলি বিশেষজ্ঞ সকলে মত ব্যক্ত কৰিছে ৷
