তিনিচুকীয়া,12আগষ্ট : গাঁওবুঢ়া নিযুক্তিৰ নামত কেলেংকাৰীৰ অভিযোগ ৷ এইবাৰ ঘটনাৰ স্থান তিনিচুকীয়া ৷ বৃহস্পতিবাৰে তিনিচুকীয়া জিলাৰ উপায়ুক্তৰ কাৰ্যালয়ৰ সন্মুখত এক প্ৰতিবাদী কাৰ্যসূচী ৰূপায়ন কৰে স্থানীয় ৰাইজে ৷ ঘটনা অনুসৰি টেঙাপানী, ৰবৰবাৰী, টিংৰাই, হেবেদা গাঁৱৰ নৱ নিযুক্ত গাঁওবুঢ়া হিচাপে দায়িত্বভাৰ গ্ৰহণ কৰিছিল ৰাজীৱ বাইলুঙে ৷
কিন্তু একাংশ ৰাইজে ৰাজীৱ বাইলুঙে দায়িত্বভাৰ গ্ৰহণ কৰা প্ৰক্ৰিয়াটোক সহজভাবে গ্ৰহণ কৰিব পৰা নাই ৷ কিয়নো চৰকাৰী গাঁওবুঢ়াজনৰ ওপৰত স্থানীয় গাঁৱৰ ৰাইজে দীৰ্ঘ দিনৰ পৰা কেতবোৰ অভিযোগ উত্থাপন কৰি আহিছে ৷
উল্লেখযোগ্য যে, বিজ্ঞাপনত উল্লেখিত আবেদনকাৰী অৰ্থাৎ ৰাজীৱ বাইলুঙৰ নিজৰ নামত থকা স্থাৱৰ সম্পত্তিৰ প্ৰমাণ পত্ৰ গাঁওবুঢ়া এলেকাৰ অন্তৰ্গত গাঁও কেইখনত নাই ৷ লগতে গাঁও কেইখনৰ স্থানীয় বাসিন্দাৰ প্ৰমাণ পত্ৰ নাই বুলি বহু দিনৰ পূৰ্ৱে স্থানীয় ৰাইজে সংবাদ মাধ্যমৰ আগত অভিযোগ উত্থাপন কৰি আহিছিল ।
লগতে পঢ়কঃ বৰুণ দেৱতাক সন্তুষ্ট কৰিবলৈ ডিব্ৰুগড়ৰ ৰাইজে পাতিলে ভেকুলীৰ বিয়া
একেদৰে জিলা উপায়ুক্তকো এই বিষয়ে অৱগত কৰিছিল যদিও কোনো ধৰণৰ বিহিত ব্যৱস্থা গ্ৰহণ কৰা নাছিল জিলা উপায়ুক্ত গৰাকীয়ে ৷ সেয়েহে বৃহস্পতিবাৰে উপায়ন্তৰ হৈ স্থানীয় ৰাইজে তিনিচুকীয়া জিলা উপায়ুক্তৰ কাৰ্যালয়ৰ সন্মুখত এক প্ৰতিবাদী কাৰ্যসূচী ৰূপায়ণ কৰে ।
স্থানীয় ৰাইজে সংবাদ মাধ্যমৰ আগত উল্লেখ কৰা মতে, টেঙাপানী, ৰবৰবাৰী, টিংৰাই, হেবেদা গাঁৱৰ চৰকাৰী গাঁওবুঢ়া নিযুক্তি প্ৰক্ৰিয়াৰ বাবে ৫ গৰাকী ব্যক্তিয়ে আবেদন কৰিছিল । তাৰে ৪ গৰাকী টেঙাপানী,ৰবৰবাৰী,টিংৰাই,হেবেদা গাঁৱৰ স্থায়ী বাসিন্দা আছিল ।
কিন্তু অতিপৰিতাপৰ কথা যে, উক্ত চাৰিগৰাকীৰ এগৰাকী স্থানীয় বাসিন্দাক নিযুক্তি নিদি স্থানীয় বাসিন্দা নোহোৱা এজনক নিয়ুক্তি দিয়াৰ পাছতে সম্প্ৰতি জাঙুৰ খাই উঠিছে স্থানীয় ৰাইজ ৷
আজিৰ প্ৰতিবাদী কাৰ্যসূচীৰ জৰিয়তে স্থানীয় ৰাইজে উক্ত ৪ গৰাকী স্থানীয় বাসিন্দাৰ ভিতৰত এজনক নিযুক্তি দিবলৈ দাবী জনাইছে ৷ লগতে নৱ নিযুক্ত গাঁওবুঢ়া ৰাজীৱ বাইলুংক অতিশীঘ্ৰে নিলম্বন কৰিবলৈ জিলা উপায়ুক্তৰ জৰিয়তে মুখ্যমন্ত্ৰীলৈ এখন স্মাৰক পত্ৰ প্ৰেৰণ কৰে প্ৰতিবাদকাৰী স্থানীয় ৰাইজে ।
লগতে পঢ়কঃ আজি বিশ্ব হস্তী দিৱস
