কলিয়াবৰ, 4 মে’ : পূৰ্বতকৈ আৰু অধিক টোলটেক্স দিবলৈ আপুনি সাজু হওক ৷ কিয়নো অসমত নিৰ্মীয়মান অৱস্থাত আছে আৰু এখন নতুন টোলগেটৰ কাম৷ যুদ্ধংদেহী ৰূপত এতিয়া কলিয়াবৰ-তেজপুৰ সংযোগী পথৰ চুলুঙত সাজু কৰি তোলা হৈছে এই টোলগেট৷
নিত্য ব্যৱহাৰ্য সামগ্ৰীকে ধৰি সকলো সামগ্ৰীৰে আকাশলংঘী মূল্যবৃদ্ধিয়ে ৰাজ্যবাসীক কৰি তুলিছে জুৰুলা ৷ সমান্তৰালকৈ ৰাজ্যৰ বিভিন্ন প্ৰান্তত স্থাপিত টোলগেটসমূহেও আন এক মাধমাৰ দি আহিছে সাধাৰণ জনতাক ৷ ইয়াৰ মাজতে এইবাৰ আন এখন টোলগেট স্থাপনেৰে অৰ্থ সংগ্ৰহৰে জনতাক অধিক মাধমাৰৰ পৰিকল্পনা কৰিছে চৰকাৰে৷ ৰাজ্যৰ উত্তৰ আৰু দক্ষিণপাৰ সংযোগী দ্বিতীয়খন কলিয়াভোমোৰা দলঙৰ নিৰ্মাণ সম্পূৰ্ণ হ'লেই আৰম্ভ হ'ব এই নতুন টোলগেটত টোল টেক্স সংগ্ৰহৰ কাম (Construction of new toll gate at Kaliabor) ৷
কলিয়াবৰ মহকুমাৰ অন্তৰ্গত চুলুঙত এই নতুন টোলগেট নিৰ্মাণৰ কাম ইতিমধ্যে দ্ৰুত গতিত চলি আছে । নিৰ্মাণ হৈ থকা চাৰিলেনযুক্ত কলিয়াবৰ তিনিআলিৰ পৰা তেজপুৰ সংযোগী পথৰ চুলুঙত স্থাপন কৰা হৈছে এই টোলগেটখন ৷
নগাঁৱৰ কলিয়াবৰ হৈ আপুনি যদিহে তেজপুৰ বা ৰাজ্যৰ উত্তৰপাৰলৈ যাব খুজিছে, তেন্তে সাজু হওক সোণাপুৰ আৰু ৰহা টোলগেটত দি অহা টোলটেক্সৰ উপৰিও চুলুঙত নিৰ্মিয়মান অৱস্থাত থকা টোলগেটত অধিক ধন ভৰিবলৈ । প্ৰাপ্ত তথ্য অনুসৰি, ব্ৰহ্মপুত্ৰৰ ওপৰত থকা কলিয়াভোমোৰা দলঙৰ গাতে নিৰ্মাণৰত অৱস্থাত থকা আনখন দলঙৰ কাম সম্পূৰ্ণ হোৱাৰ পাছতে এই নতুন টোলগেটত টোল টেক্স আদায়ৰ পিছতহে উত্তৰপাৰলৈ যাব পাৰিব আপুনি ৷ অনুৰূপ ধৰণে দক্ষিণপাৰত উপস্থিত হৈ চুলুঙত টোল টেক্স দিহে আন স্থানলৈ যাব পাৰিব জনসাধাৰণ ।
উল্লেখ্য যে, 1987 চনতে জনসাধাৰণৰ বাবে মুকলি কৰি দিয়া কলিয়াভোমোৰা দলঙৰ সমীপৰ চুলুঙত স্থাপন কৰা হৈছিল এখন টোলগেট ৷ অৱশ্যে পৰৱৰ্তী সময়ত সেইখন টোলগেট বন্ধ কৰি দিয়া হৈছিল যদিও পুনৰ এতিয়া একেটা স্থানতে স্থাপন কৰা টোলগেটখনে অনাগত সময়ত যে সাধাৰণ ৰাইজৰ বাবে কৰৰ বোজা অধিক কৰি তুলিব সেয়া নিশ্চিত ৷
লগতে পঢ়ক : Bogibeel Bridge Tollgate : মুকলিৰ দিশে বগীবিলৰ সমীপৰ টোলগেট
