মৰিগাঁও,১০ আগষ্ট: মৰিগাঁৱৰ ৰাজপথত আজৱ দৃশ্য । বিধায়ক ৰমাকান্ত দেউৰীৰ বিৰুদ্ধে বিভিন্ন হৰ্ডিং আৰিলে বীৰ লাচিত সেনা মৰিগাঁও জিলা সমিতিয়ে । দীৰ্ঘদিন ধৰি এচোৱা পথৰ দুৰাৱস্থাই জ্বলা-কলা খুৱাই আহিছে মৰিগাঁৱৰ এটা অঞ্চলৰ ৰাইজক । সেয়ে অতিষ্ঠ হৈ বিধায়কৰ বিৰুদ্ধে বীৰ লাচিত সেনাই এইদৰেই সাব্যস্ত কৰে প্ৰতিবাদ ।
লক্ষণীয়ভাৱে মৰণফান্দত পৰিণত হৈছে মৰিগাঁৱৰ ৰাজপথ । পথৰ মাজত বৃহৎ বৃহৎ গাঁত । পথ নহয় যেন পুখুৰীহে । একাধিক দুৰ্ঘটনাত পতিত হৈছে চাইকেল তথা মটৰচাইকেল আৰোহী । আহত হৈছে পথচাৰী, আহত হৈছে ছাত্ৰ-ছাত্ৰী । মৰিগাঁও চহৰৰ মাজমজিয়াৰ সোই শোচনীয় তথা ব্যস্ততাপূৰ্ণ পথেৰে আহযাহ কৰে মন্ত্ৰী-বিধায়ক । নিতৌ আহে মৰিগাঁও লোক নিৰ্মাণ বিভাগৰ বিষয়া-কৰ্মচাৰী । আনকি এই পথেৰে আহ যাহ কৰে জিলা আয়ুক্তইয়ো ।
লগতে পঢ়ক: AJP protest at Dighalipukhuri: মূল্যবৃদ্ধিৰ বিৰুদ্ধে দীঘলীপুখুৰী পাৰত জাতীয় মহিলা শক্তিৰ গৰ্জন
কিন্তু তাৰপাছতো কানসাৰ নাই জন প্ৰতিনিধি তথা বিভাগীয় কৰ্তৃপক্ষৰ । যাৰ বাবে এতিয়া মৰিগাঁও চহৰৰ অলিয়ে-গলিয়ে অসম চৰকাৰ হায় হায় , মই অকৰ্মন্য বিধায়ক, ভোট বিচাৰিলে নহব উন্নয়নমূলক কাম কৰিব লাগিব আদি পোষ্টাৰ লগাই প্ৰতিবাদ সাব্যস্ত কৰে বীৰ লাচিত সেনা অসমৰ মৰিগাঁও জিলা সমিতিৰ বিষয় ববীয়াই ।
আনহাতে মৰিগাঁও চহৰৰ মাজমজিয়াৰ এই শোচনীয় পথৰ উন্নয়নৰ দাবী জনাই লোকনিৰ্মাণ বিভাগৰ মন্ত্ৰীগৰাকীক কঠোৰ ভাষাৰে সমালোচনা কৰে প্ৰতিবাদকাৰীসকলে । শীঘ্ৰে পথচোৱাৰ উন্নয়ন নকৰিলে মৰিগাঁও লোক নিৰ্মাণ ক্ষেত্ৰীয় বিভাগ, বিধায়ক ৰমাকান্ত দেউৰীয়ে তীব্ৰ গণ আন্দোলনৰ সন্মুখীন হ'ব লাগিব বুলি সকিয়াই দিয়ে বীৰ লাচিত সেনা মৰিগাঁও জিলা সমিতিয়ে ।
লগতে পঢ়ক: Killing of endangered golden ducks: বিলুপ্তপ্ৰায় সোণালী হাঁহৰ নিধন ৰোধৰ বাবে সেনাৰ বৃহৎ পদক্ষেপ
