লখিমপুৰ, 6 ডিচেম্বৰ : লখিমপুৰৰ পানীগাঁও প্ৰগতি সংঘৰ উদ্যোগত আয়োজন কৰা হৈছে ৰাজ্যিক ভিত্তিত ভাওনা সমাৰোহ ৷ সংঘৰ শতবৰ্ষৰ সৈতে সংগতি ৰাখি আয়োজন কৰা হৈছে এই কাৰ্যসূচীৰ ৷ লখিমপুৰ নগৰৰ নাতি দূৰৈত অৱস্থিত পানীগাঁও এলেকাৰ এটি পুৰণি সামাজিক অনুষ্ঠান পানীগাঁও প্ৰগতি সংঘৰ উদ্যোগত বৃহস্পতিবাৰ অৰ্থাৎ ৭ ডিচেম্বৰৰ পৰা চাৰিদিনীয়া কাৰ্যসূচীৰে ৰাজ্যিক ভিত্তিত ভাওনা সমাৰোহৰ আয়োজন কৰা হৈছে ৷
1924 চনতে স্থাপিত হোৱা অনুষ্ঠানটোৱে শতবৰ্ষ উপলক্ষে এই কাৰ্যসূচী হাতত লৈছে ৷ বৃহস্পতিবাৰৰ পৰা পানীগাঁও উচ্চতৰ মাধ্যমিক বিদ্যালয়ৰ খেলপথাৰত অনুষ্ঠিত হ’ব ৰাজ্যিক ভিত্তিত ভাওনা সমাৰোহ ৷ বুধবাৰে উদ্যোক্তা সকলে এক সংবাদমেল যোগে এই ভাওনা সমাৰোহৰ প্ৰস্তুতিৰ বিষয়ে জানিবলৈ দিয়ে ৷ এই ভাওনা সমাৰোহ উদ্বোধন কৰিব উত্তৰ কমলাবাৰী সত্ৰৰ সত্ৰাধিকাৰ জনাৰ্দন দেৱ গোস্বামীয়ে ৷ সমাৰোহত যোৰহাটৰ বৃন্দাবন নাট্য গোষ্ঠী, গোলাঘাটৰ চতুৰ্থী সংগম শিল্পী সমাজ, নাৰায়ণপুৰৰ সত্ৰীয়া ৰংগালয়, দেৰগাঁৱৰ হৰগৌৰী সাংস্কৃতিক গোষ্ঠী আদিয়ে অংশগ্ৰহণ কৰি ভাওনা পৰিবেশন কৰিব ৷
এই সমাৰোহত ভাওনা সমূহ প্ৰতিযোগিতামূলক হ’ব বুলি উল্লেখ কৰি উদ্যোক্তাসকলে কয় যে, প্ৰথম পুৰস্কাৰ 50 হাজাৰ, দ্বিতীয় 40 হাজাৰ, তৃতীয় 30 হাজাৰ আৰু 25 হাজাৰ টকা থাকিব ৷ লগতে দলসমূহক পুৰস্কৃত কৰাৰ লগতে তেওঁলোকৰ যাতায়তৰ সকলো ব্যয় উদযাপন সমিতিয়ে বহন কৰিব বুলি জানিবলৈ দিয়ে ৷ অন্তিম দিনা দিনৰ ভাগত শিশুৰ দ্বাৰা এখন প্ৰদৰ্শনমূলক ভাওনা পৰিবেশন কৰা হ’ব বুলিও আয়োজক সকলে জানিবলৈ দিয়ে ৷
তেওঁলোকে প্ৰতিখন ভাওনা চাৰিঘন্টাৰ ভিতৰতে সামৰা হ’ব বুলি উল্লেখ কৰি এই সমাৰোহত সকলো ৰাইজৰ সহযোগিতা কামনা কৰে ৷ সংবাদমেলত পানীগাঁও প্ৰগতি সংঘৰ সম্পাদক শোণিত দত্ত বৰা, ভাওনা সমাৰোহৰ মুখ্য আহ্বায়ক নৰেন্দ্ৰ মহেশ্বৰী,আহ্বায়ক বিপুল বৰা, শতবর্ষ সমাৰোহৰ ব্যবস্থাপক দিলীপ শইকীয়া, সম্পাদক কুমুদ বৰুৱা আদিয়ে অংশগ্ৰহণ কৰে ৷ উল্লেখ্য এই প্ৰগতি সংঘৰ উদ্যোগতে 70 ৰ দশকতে পলাশৰ ৰং, ওপজা সোণৰ মাটি আদি অসমীয়া চলচ্চিত্ৰ নিৰ্মাণ কৰিইছিল ৷ তাহানিৰ দিনৰ পৰা সংস্কৃতিৰ ক্ষেত্ৰত এনেদৰে অনবদ্য বৰঙণি আগবঢ়াই অহা পানীগাঁও প্ৰগতি সংঘৰ শতবর্ষ সমাৰোহৰ কাৰ্যসূচী সফল কৰি তুলিবলৈ আঞ্চলস্থ ৰাইজ উবুৰি খাই পৰিছে ৷
লগতে পঢ়ক : জিলা গঠনৰ পাছত প্ৰথমবাৰৰ বাবে লখিমপুৰত মহিলা আয়ুক্তৰ যোগদান
