কোকৰাঝাৰ, ১২ জুন : আজি ১২ জুন ৷ নিখিল বড়ো ছাত্ৰ সন্থাৰ উদ্যোগত আৰম্ভ হোৱা বড়োলেণ্ড আন্দোলন ইতিহাসৰ এটা অতিকে গুৰুত্বপূৰ্ণ দিন ৷ কিয়নো ১৯৮৭ চনৰ আজিৰ দিনটোত অৰ্থাৎ ১২ জুন তাৰিখে দুস্কৃতিকাৰীৰ আক্ৰমণত মৃত্যু হৈছিল পৃথক বড়োলেণ্ড আন্দোলনৰ প্ৰথম শ্বহীদ সুজিত নাৰ্জাৰীৰ ৷
তথ্য অনুসৰি, গুৱাহাটী মহানগৰীৰ এক গণ সমাৱেশত অংশগ্ৰহণ কৰি ঘৰমুৱা উভতনি যাত্ৰাত দুস্কৃতিকাৰীৰ আক্ৰমণত শ্বহীদ হৈছিল সুজিত নাৰ্জাৰী ৷ সেই দিনৰ পৰাই নিখিল বড়ো ছাত্ৰ সন্থাৰ উদ্যোগত প্ৰত্যেক বছৰে আজিৰ দিনটোক বড়োলেণ্ড শ্বহীদ দিৱস উদযাপন কৰি অহা হৈছে ৷
বিগত বৰ্ষসমূহৰ লেখিয়াকৈ এইবাৰো কোকৰাঝাৰ চহৰৰ নিলগৰ ভাটিপাৰাস্থিত শ্বহীদ সুজিত নাৰ্জাৰীৰ সমাধি ক্ষেত্ৰত এবছুৰ উদ্যোগত সোমবাৰে আয়োজিত কৰা হৈছে ৩৬ সংখ্যক বড়োলেণ্ড শ্বহীদ দিৱস ৷ শ্বহীদ দিৱসৰ কাৰ্যসূচী অনুসৰি, এবছুৰ পতাকা অৰ্ধনমিতভাৱে উত্তোলন কৰা হয় ৷ তাৰ পাচতে সংগঠনটোৰ কোকৰাঝাৰ জিলা সমিতিৰ সভাপতি কৃপেশ দৈমাৰীৰ লগতে শ্বহীদ বেদীত পুষ্পাঞ্জলি অৰ্পণ কৰে ইউ এন একাডেমীৰ সঞ্চালক কৃষ্ণ গোপাল বসুমতাৰীয়েও ৷
লগতে পঢ়ক : BJP leader suspicious dead : গোৱালপাৰাত বিজেপি নেত্ৰী জোনালী নাথক হত্যা !
শ্বহীদ দিৱসৰ কাৰ্যসূচীত ইউপিপিএলৰ বিধায়ক ক্ৰমে লৰেন্স ইছলাৰী, বিধায়ক জিৰণ বসুমতাৰী, বড়োলেণ্ড বিশ্ববিদ্যালয়ৰ পঞ্জীয়ক ড৹ সুবুংছাৰ বসুমতাৰী, বিপিএফৰ পাৰিষদ দনেশ্বৰ গয়াৰীয়ে উপস্থিত থাকি শ্বহীদ সুজিত নাৰ্জাৰীলৈ শ্ৰদ্বাঞ্জলি জ্ঞাপন কৰে ৷ লগতে এবছুৰ কোকৰাঝাৰ জিলা সমিতিৰ সাধাৰণ সম্পাদক খাম্ফা বসুমতাৰীৰ উপৰিও বড়ো সাহিত্য সভা, বড়ো সমাজ আদি দল-সংগঠনৰ নেতৃবৃন্দইয়ো অংশগ্ৰহণ কৰি অশ্ৰুশিক্ত নয়নেৰে পুষ্পাঞ্জলি অৰ্পণ কৰি শ্বহীদ সুজিত নাৰ্জাৰীলৈ একাজলি শ্ৰদ্বাঞ্জলি জ্ঞাপন কৰে ৷
উল্লেখ্য যে, বড়োলেণ্ড আন্দোলনৰ প্ৰথমগৰাকী শ্বহীদৰ পিতৃ আছিল কোকৰাঝাৰ চহৰৰ ভাটিপাৰা নিৱাসী প্ৰয়াত মংগলসিং নাৰ্জাৰী আৰু মাতৃ লামেশ্বৰী নাৰ্জাৰী ৷
লগতে পঢ়ক : Cyclone Biparjoy updates : ধুমুহা আৰু বৃষ্টিপাতৰ কৱলত গুজৰাটৰ কেইবাখনো জিলা
