গুৱাহাটী,৬ জুন: গুৱাহাটীৰ সীমান্ত সুৰক্ষা বাহিনীৰ সীমান্ত মুখ্য কাৰ্যালয়ৰ মহাপৰিদৰ্শকৰ দায়িত্বত কমলজিৎ বন্যাল । সোমবাৰে দায়িত্ব গ্ৰহণ কৰে বন্যালে । দক্ষতাৰে বহুকেইটা উচ্চ পদত নিজৰ দায়িত্ব সম্পন্ন কৰাৰ পাছত এইবাৰ বন্যালক এই দায়িত্বত নিয়োজিত কৰা হৈছে ।
বন্যাল BSF কেডাৰৰ ১৯৮৬ বৰ্ষৰ বিষয়া আছিল । তেওঁ ১৯৮৬ চনৰ ১৮ আগষ্টত সহকাৰী কমাণ্ডেণ্ট হিচাপে BSFত কৰ্মজীৱন আৰম্ভ কৰিছিল । তেওঁ ভাৰত-পাকিস্তানৰ ফৰ্চ হেডকোৱাৰ্টাৰ আৰু ভাৰত-বাংলাদেশ আন্তঃৰাষ্ট্ৰীয় সীমান্ত, জম্মু-কাশ্মীৰৰ সন্ত্ৰাসবাদ প্ৰৱণ অঞ্চলৰ লগতে উৰিষ্যাৰ নক্সাল প্ৰভাৱিত অঞ্চলসমূহত বিভিন্ন উচ্চ পদত কাম কৰাৰ যথেষ্ট অভিজ্ঞতা আছে ।
মহাপৰিদৰ্শকৰ দায়িত্ব গ্ৰহণ কৰি বন্যালে ভাৰত-বাংলাদেশ আন্তঃৰাষ্ট্ৰীয় সীমান্তত অপৰাধ প্ৰতিৰোধৰ বাবে কাৰ্যকৰী সীমান্ত ব্যৱস্থাপনা প্ৰণালী প্ৰস্তুত কৰাৰ প্ৰয়োজনীয়তাৰ সন্দৰ্ভত গুৰুত্ব আৰোপ কৰে । লগতে তেওঁ দুয়োখন চুবুৰীয়া দেশৰ সীমান্ত ৰক্ষী বাহিনীৰ মাজত সৌহাৰ্দ্যপূৰ্ণ সম্পৰ্ক শক্তিশালী কৰাৰ লগতে সীমান্তৱৰ্তী অঞ্চলত বাস কৰা লোকসকলৰ মাজত নিৰাপত্তাৰ ভাৱনা বৃদ্ধি কৰাৰ প্ৰয়োজনীয়তাৰ ওপৰতো গুৰুত্ব আৰোপ কৰে ।
পূৰ্বতে সীমা সুৰক্ষা বল(BSF)ৰ ত্ৰিপুৰা সীমান্তৰ DIG ৰ দায়িত্বত কাৰ্যনিৰ্বাহ কৰি আছিল বন্যালে । সীমা সুৰক্ষা বল(BSF) ৰ গুৱাহাটী ফ্ৰন্টিয়াৰৰ আই জি (IG) সঞ্জয় সিঙ গেলটৰ স্থানত কমলজিৎ সিং বন্যালক বৰ্তমান দায়িত্ব অৰ্পন কৰা হয় ।
লগতে পঢ়ক: কাৰ্বি আংলঙত বিজেপি মিত্ৰজোঁটৰ জয় স্পষ্টঃ সৰ্বানন্দ সোণোৱাল