গুৱাহাটী, ২৭ জুলাই: বিজেপি দলৰ জ্যেষ্ঠ নেতা তথা প্ৰাক্তন সাংসদ ৰমেন ডেকাই বিত্তমন্ত্ৰী অজন্তা নেওগৰ পদত্যাগৰ দাবী উত্থাপন কৰিছে(Ramen Deka demanded resignation of Ajanta Neog) । তেওঁৰ এই দাবীৰ পিছতে অসমত আকৌ এবাৰ ন-বিজেপি আৰু পুৰণি বিজেপিৰ নেতাৰ মাজত সংঘাত বৃদ্ধি পোৱাৰ আশংকাই দেখা দিছে । সামাজিক মাধ্যমত দিয়া এটা পোষ্টৰ যোগেদি মন্ত্ৰী অজন্তা নেওগৰ পদত্যাগৰ দাবী কৰিছে প্ৰাক্তন সাংসদ ৰমেন ডেকাই ।
প্ৰাক্তন সাংসদগৰাকীয়ে উল্লেখ কৰিছে যে বিত্তমন্ত্ৰী অজন্তা নেওগৰ বাসগৃহত সংঘটিত হোৱা ঘটনাটো যথেষ্ট দূৰ্ভাগ্যজনক আৰু উদ্বেগজনক। সংবাদ মাধ্যমতো এই সম্পৰ্কত ধাৰাবাহিক বাতৰি প্ৰকাশ পাইছে । নিৰপেক্ষ তদন্তৰ স্বাৰ্থত অজন্তা নেওগে মন্ত্ৰীসভাৰ পৰা পদত্যাগ কৰা উচিত। নিৰপেক্ষ তদন্তৰ স্বাৰ্থত পদত্যাগৰ উদাহৰণ বিজেপিত কেইবাটাও আছে বুলি প্ৰাক্তন সাংসদগৰাকীয়ে সদৰি কৰে । মুখ্যমন্ত্ৰীক এই ক্ষেত্ৰত কঠোৰ স্থিতি গ্ৰহণ কৰিবলৈ তেওঁ অনুৰোধ জনায় ।
উল্লেখ যে দেওবাৰে মন্ত্ৰী অজন্তা নেওগৰ জালুকবাৰীস্থিত বাসগৃহৰ পৰা এগৰাকী মহিলা উদ্ধাৰ হৈছিল (Woman rescued from minister Ajanta Neog's residence in Jalukbari) । মন্ত্ৰীগৰাকীৰ নিৰাপত্তাৰক্ষীয়ে মহিলাগৰাকীক আৱদ্ধ কৰি ৰখাৰ অভিযোগ উত্থাপন হৈছিল আৰু এই সন্দৰ্ভত বাতৰি প্ৰচাৰ হৈছিল । অভিযোগ অনুসৰি চাকৰি দিয়াৰ প্ৰলোভন দি যৌনকৰ্মী হ’বলৈ বাধ্য কৰোৱাৰ অভিযোগ উঠিছে মন্ত্ৰী নেওগৰ নিৰাপত্তাৰক্ষীৰ বিৰুদ্ধে ।
কিন্তু এতিয়া মহিলাগৰাকীৰ কোনো শুংসূত্ৰ নোপোৱাত ঘটনাটো অধিক ৰহস্যৰ আৱৰ্তত সোমাই পৰিছে। সমগ্ৰ ঘটনাক লৈ ৰাজ্যজুৰি প্ৰতিক্ৰিয়াৰ সৃষ্টি হোৱাৰ সময়তে প্ৰাক্তন সাংসদ ৰমেন ডেকাই মন্ত্ৰীগৰাকীৰ পদত্যাগ দাবী কৰিলে ৷
লগতে পঢ়ক: Incidents of female abuse: মুকালমুৱাত স্বামীৰ পৰিয়ালে হত্যা কৰিলে মহিলাক !
