গুৱাহাটী, 16 মে': অসমৰ লগতে চুবুৰীয়া ৰাজ্যকেইখনত অব্যাহত থকা মুষলধাৰ বৰষুণৰ ফলত ফেনে-ফুটুকাৰে ওফন্দি উঠা ব্ৰহ্মপুত্ৰ আৰু ইয়াৰ উপ-নৈসমূহৰ পানীয়ে ৰাজ্যত বাৰিষাৰ প্ৰথমটো বানৰ সৃষ্টি কৰিছে (First wave Assam floods affects 6 districts) । সোমবাৰেও বানৰ ভয়াবহতাৰ বিশেষ পৰিৱৰ্তন হোৱা নাই । আনহাতে, নেৰানেপেৰা বৰষুণৰ ফলত পাৰ্বত্য জিলা ডিমা হাচাওৰ বিভিন্ন স্থানত ভয়ংকৰ ভূমিস্খলন হৈ ৰেল আৰু ঘাইপথেৰে যাতায়াত ব্যাহত হৈ পৰিছে ।
ডিমা হাচাওত সৃষ্টি হৈছে ভয়ংকৰ পৰিস্থিতি । ডিমা হাচাও ৰেল ষ্টেচনত বানত আৱদ্ধ হৈ থকা লোকসকলক উদ্ধাৰৰ বাবে হেলিকপ্টাৰ ব্যৱহাৰ কৰিবলগীয়া হৈছে । চিমেন, গাই, সোৱণশিৰি, জীয়াঢল, ৰঙানদী আদিৰ পানীয়ে বিপদসীমা অতিক্ৰম কৰিছে । আনহাতে, বৰষুণৰ ফলত হোৱা জলস্তৰ বৃদ্ধিৰ পৰিপ্ৰেক্ষিতত নীপকোৰ ৰঙানদী প্ৰকল্প আৰু উমৰংছ' প্ৰকল্পৰ কপিলী আৰু খানদং বান্ধৰ ‘গেইট’ খুলি দিয়াৰ ফলত দুয়োটা প্ৰকল্পৰ নামনি অংশত বহু অঞ্চল জলমগ্ন হৈছে । একেদৰে কাৰ্বি-লাংপি জলবিদ্যুৎ প্ৰকল্পৰ বান্ধৰ পৰা চাৰিখন ‘গেইট’ৰে এৰি দিয়া পানীয়ে হোজাই, কামপুৰ আদি অঞ্চলৰ বহু গাঁও জলমগ্ন কৰিছে । কৰিমগঞ্জত কুশিয়াৰা আৰু কাছাৰত গোমৰা নৈৰ বাঢ়নী পানীয়ে সৃষ্টি কৰিছে তাণ্ডৱ ।
আনহাতে, নোৱা দিহিং, লোহিত, চিয়াং, বুঢ়ীদিহিং, দিখৌ, ধনশিৰি, কপিলী, পুঠিমাৰী, পাগলাদিয়া, মানাহ, বেঁকী, গৌৰাং আদি নৈৰ জলস্তৰো ক্ৰমাৎ বৃদ্ধি হৈ থকা বুলি জল আয়োগে প্ৰকাশ কৰিছে । বান আৰু ভূমিস্খলনৰ ফলত এতিয়ালৈ পাঁচজন লোকৰ মৃত্যু হোৱা বুলি সদৰি কৰিছে অসম দুৰ্যোগ ব্যৱস্থাপনা প্ৰাধিকৰণে । ৰাজ্যৰ পাঁচ ঠাইত মথাউৰি চিগাৰ তথ্য অসম দুৰ্যোগ ব্যৱস্থাপনা প্ৰাধিকৰণে সদৰি কৰিছে । বানত এইপৰ্যন্ত ৰাজ্যৰ আঠখন জিলা ক্ৰমে কাছাৰ, ধেমাজি, হোজাই, পশ্চিম কাৰ্বি-আংলং, নগাঁও, বৰপেটা, নলবাৰী আৰু কামৰূপ মহানগৰ জিলা ক্ষতিগ্ৰস্ত হোৱাৰ লগতে ২৩০খন গাঁও বানত ক্ষতিগ্ৰস্ত হৈছে ৷ এই বানত ক্ষতিগ্ৰস্ত হৈছে ৫৬,৭৬৯জন লোক । ১০,৩২১.৪৪ হেক্টৰ কৃষিভূমি বানত ক্ষতিগ্ৰস্ত হৈছে ।
গুৱাহাটীৰ আঞ্চলিক বতৰ বিজ্ঞান কেন্দ্ৰৰ তথ্য মতে অহা ২৪ ঘণ্টাত অসমৰ প্ৰায় সকলা ঠাইতে মজলীয়া বৰষুণ হোৱাৰ সম্ভাৱনা আছে । অহা ২৪ ঘণ্টাত অসমৰ দুই এঠাইত বিজুলী বজ্ৰপাতৰ সতর্কবাণীও দিয়া হৈছে । অসমৰ দুই এঠাইত প্ৰৱলৰ পৰা অতিশয় প্ৰৱল বৰষুণ হোৱাৰো সম্ভাৱনা আছে । অহা ২৪ ঘণ্টাত প্ৰৱল বৰষুণ হোৱাৰ সম্ভাৱনা থকা জিলাসমূহ হ'ল বাক্সা, বঙাইগাঁও, বৰপেটা, নলবাৰী, ধেমাজি আৰু লখিমপুৰ ।
ৰাজ্যত সোমবাৰৰ সৰ্বনিম্ন তাপমাত্ৰা উত্তৰ লক্ষীমপুৰত ১৯.৬ ডিগ্ৰী ছেন্টিগ্ৰেড হৈছে । যোৱা ২৪ ঘণ্টাত উল্লেখনীয় পৰিমাণৰ বৰষুণ হোৱা ঠাইসমূহ হ'ল (১০ ছেন্টিমিটাৰ বা ততোধিক) টংলা-২০ ছে.মি., কোকৰাঝাৰ-১৯ ছে.মি., বহলপুৰ-১৭ ছে.মি., বৰপেটা-১৭ ছে.মি. ,মাজবাট-১৫ ছে.মি., ওদালগুৰি-১৫ ছে.মি, পাণবাৰী-১২ ছে.মি., বাকসা -১০ ছে.মি., মাজুলী -১১ছে.মি, বদতিঘাট -১০ ছে.মি., ঢেকীয়াজুলি-১০ ছে.মি.,বিলাসীপাৰা-১০ছে.মি, গহপুৰ-১০ ছে.মি. আৰু তামুলপুৰ -১০ ছে.মি ।
