গুৱাহাটী, 17 জুন: গুৱাহাটীৰ নুনমাটিৰ ডাবল মাৰ্ডাৰ ঘটনাৰ মূল অভিযুক্ত বন্দনা কলিতা আৰু তেওঁৰ দুই সহযোগীৰ জামিন আবেদন নাকচ ৷ উল্লেখ্য যে নিজ স্বামী আৰু শাহুক কাটি টুকুৰা-টুকুৰ কৰি প্ৰথমে ফ্ৰীজত ৰাখি পাছত মেঘালয়ৰ দুৰ্গম অঞ্চলত পেলাই দিছিল বন্দনা কলিতাই ৷ সাত মাহ পাছত পোহৰলৈ অহা এই ঘটনাই দেশজুৰি চাঞ্চল্যৰ সৃষ্টি কৰিছিল ৷ সেই গোচৰৰে তদন্তৰ অন্তত আৰক্ষীয়ে ন্যায়ালয়ত দাখিল কৰিছিল 1400 পৃষ্ঠাৰ অভিযোগনামা ৷
শনিবাৰে এই গোচৰৰ মূল অভিযুক্ত বন্দনা কলিতা আৰু তেওঁৰ সহযোগী অৰূপ ডেকা, ধনটি ডেকাক কামৰূপ সত্ৰ ন্যায়াধীশৰ আদালতত হাজিৰ কৰোৱা হয় ৷ আদালতে এই তিনিও হত্যাকাৰীৰে জামিন আৱেদন নাকচ কৰে ৷ তিনিওৰে বিৰুদ্ধে আই পি চিৰ 302, 201 আৰু 34 ধাৰাত ৰুজু হৈ আছে গোচৰ ৷ ইফালে আদালতে এই গোচৰৰ পৰৱৰ্তী শুনানিৰ দিন 1 জুলাই ধাৰ্য কৰিছে ৷ এই পৰৱৰ্তী শুনানিতে নথি প্ৰদানৰো সম্ভাৱনা আছে ৷
উল্লেখ্য যে বন্দনা কলিতাই তেওঁৰ স্বামী অমৰজ্যোতি দে' আৰু শাহু শংকৰী দে'ক হত্যা কৰি তেওঁলোকৰ মৃতদেহ কেইবা টুকুৰা কৰি পেলাই দিছিল মেঘালয়ৰ বিভিন্ন স্থানত ৷ তাৰ পাছতেই তেওঁ নিজেই আৰক্ষী থানাত স্বামী আৰু শাহু নিৰুদ্দেশ হোৱাৰ গোচৰ ৰুজু কৰিছিল ৷ আনকি স্বামী আৰু শাহুৰ সন্ধান উলিয়াব নোৱাৰাৰ বাবে বন্দনা কলিতাই আৰক্ষীকো জবাবদিহি কৰিছিল ৷ ইয়াৰ পাছতে শংকৰী দে’ৰ একাউণ্টৰ পৰা এ টি এমৰ জৰিয়তে ধন উলিওৱাৰ তথ্য লাভ কৰাৰ পাছতে আৰক্ষীয়ে বন্দনা কলিতাক গ্ৰেপ্তাৰ কৰিছিল আৰু জেৰাৰ অন্তত এই ভয়াৱহ ডাৱল মাৰ্ডাৰ ঘটনা পোহৰলৈ আহিছিল ৷
8 জুনতো বিশেষ আদালতত হাজিৰ কৰোৱা হৈছিল বন্দনা কলিতাক ৷ পুনৰ হত্যাৰ কথা অস্বীকাৰ কৰিছিল বন্দনা কলিতাই ৷ সময়ত সকলো খুলি কোৱাৰ ইংগিত দিছিল বন্দনা কলিতাই ৷ বন্দনা কলিতাৰ লগতে হাজিৰ কৰোৱা হৈছিল আন দুই অভিযুক্ত অৰূপ আৰু ধনটিক ৷ ইয়াৰ পূৰ্বেও বন্দনা কলিতাই কেইবাবাৰো আৰক্ষীক বিপথে পৰিচালিত কৰাৰ চেষ্টা চলাইছিল ৷ ইফালে বিগত 14 মে'ত আৰক্ষীয়ে প্ৰায় 3 মাহৰ অন্তত সমগ্ৰ গোচৰটোৰ চাৰ্জশ্বীট দাখিল কৰিছিল ৷
নুনমাটি আৰক্ষীয়ে এই হত্যাকাণ্ডৰ মূল অভিযুক্ত বন্দনা কলিতা আৰু তেওঁৰ দুই সহযোগীৰ বিৰুদ্ধে দাখিল কৰিছিল চাৰ্জশ্বীট ৷ আদালতত দাখিল কৰা চাৰ্জশ্বীটত সমগ্ৰ হত্যাকাণ্ডৰ প্ৰামাণ্য নথি-পত্ৰ দাখিল কৰি স্পষ্টকৈ উল্লেখ কৰা হৈছিল যে এই হত্যাকাণ্ড পৰকীয়া প্ৰেম আৰু সম্পত্তিৰ বাবে সংঘটিত কৰা হৈছিল ৷ বন্দনা কলিতাৰ নৃশংসতাৰ বলি হৈছিল তেওঁৰ স্বামী অমৰজ্যোতি দে' আৰু শাহু শংকৰী দে' ৷ এই দুয়োগৰাকীকে বন্দনা কলিতাই হত্যা কৰি তেওঁলোকৰ দেহ কেইবা টুকুৰা কৰি ফ্ৰীজত ৰাখি পাচত পেলাই দিছিল চুবুৰীয়া মেঘালয়ৰ বিভিন্ন অঞ্চলত ৷ উল্লেখ্য যে গোচৰটোৰ আৰক্ষীয়ে 1400 পৃষ্ঠাৰ অভিযোগনামা দাখিল কৰিছিল ৷
লগতে পঢ়ক: Goa Diwas: ৰাজ্যিক বিজেপিৰ মুখ্য কাৰ্যালয়ত গোৱা দিৱস উদযাপন
