গুৱাহাটী, 31 আগষ্ট : ড্ৰাগছ মুক্ত অসম গঢ়িবলৈ যেন প্ৰতিশ্ৰুতিবদ্ধ অসম আৰক্ষী ৷ ৰাজ্যৰ বিভিন্ন প্ৰান্তৰ লগতে এইবাৰ পাৰ্টিসমূহত ড্ৰাগছৰ বিৰুদ্ধে অভিযান আৰম্ভ কৰিছে আৰক্ষীয়ে ৷ মহানগৰী আৰক্ষীয়ে দেওবাৰে পুৱতি নিশা এটা বাৰ্থডে পাৰ্টীত ড্ৰাগছ সেৱন কৰাৰ অভিযোগত দুজন অভিযুক্তক গ্ৰেপ্তাৰ কৰে ৷
মহানগৰ আৰক্ষীয়ে গ্ৰেপ্তাৰ কৰা ড্ৰাগছ সৰবৰাহকাৰী দুটা কৰম দাস আৰু সৰৰ্গম দাস বুলি জানিব পৰা হৈছে ৷ মহানগৰ আৰক্ষীয়ে গুৱাহাটীৰ চান্দমাৰী পূৱ শৰণীয়াত কিছুদিন পূৰ্বে এটা বাৰ্থ ডে' পাৰ্টিত ড্ৰাগছ সেৱন কৰি থকা অৱস্থাত আৰক্ষীয়ে চাৰিটা ড্ৰাগছ সৰবৰাহকাৰীক গ্ৰেপ্তাৰ কৰে ৷
চান্দমাৰী আৰক্ষী আৰু মধ্য আৰক্ষী জিলাৰ আৰক্ষীৰ বিশেষ অভিযানকাৰী দলে এই ঘটনাৰ মূল অভিযুক্ত কুখ্যাত ড্ৰাগছ মাফিয়া জনী আলীৰ স্বীকাৰোক্তিৰ ভিত্তিত দুই অভিযুক্তক আটক কৰে ৷
আৰক্ষীৰ দলটোৱে ফটাশিলৰ জ্যোতিকুছিৰ পৰা কৰম দাস আৰু কামাখ্যা গেটৰ দুৰ্গা সৰোবৰৰ এটা ভাড়াঘৰৰ পৰা সৰৰ্গম দাস নামৰ সৰবৰাহকাৰী দুটাক গ্ৰেপ্তাৰ কৰে । কৰম দাসৰ পৰা আৰক্ষীয়ে ২৭৯ গ্ৰাম ওজনৰ ২৩ পেকেট হেৰ’ইন, সাত লাখ পাছ হাজাৰ আঠশ ষাঠি টকা নগদ ধন আৰু AS 01 EV 0141 নম্বৰৰ এখন স্কুটী জব্দ কৰে । আনহাতে সৰৰ্গম দাসৰ পৰা ১৪৬ গ্ৰাম ওজনৰ ১২ পেকেট হেৰ’ইন, নগদ বাৰ হাজাৰ টকা আৰু এখন AS 01 DW 6046 নম্বৰৰ বিলাসী বাহন জব্দ কৰে ।
আৰক্ষীয়ে জব্দ কৰা ড্ৰাগছখিনিৰ বজাৰ মূল্য প্ৰায় ১ কোটি টকা হ’ব বুলি জানিবলৈ দিয়ে । সম্প্ৰতি চান্দমাৰী আৰক্ষীয়ে ড্ৰাগছ সৰবৰাহকাৰীকেইটাৰ পৰা অধিক তথ্যৰ বাবে জেৰা অব্যাহত ৰাখিছে ।
লগতে পঢ়ক : নগাঁও চহৰত গছত বান্ধি এগৰাকী মহিলাক চৰম নিৰ্যাতন
