হোজাই, 31 অক্টোবৰ: 2024 ৰ লোকসভা নিৰ্বাচনলৈ সাজু হৈছে বদৰুদ্দিন আজমল নেতৃত্বাধীন এ আই ইউ ডি এফ দল ৷ এই সন্দৰ্ভত আজমলে কয় যে অসমৰ তিনিটা সমষ্টিত প্ৰাৰ্থী দিব AIUDF এ ৷ তাৰে দুটা সমষ্টিৰ এটা বদৰুদ্দিন আজমলে নিজে আৰু আনটোত চিৰাজুদ্দিন আজমলে খেলিব ৷ বাকী এটা সমষ্টিৰ বাবে প্ৰাৰ্থী বিবেচনা কৰি থকা হৈছে বুলি তেওঁ জানিবলৈ দিয়ে ৷
নগাঁও সমষ্টিৰ প্ৰাৰ্থী সন্দৰ্ভত তেওঁ চিৰাজুদ্দিন আজমলৰ নামটো পোনপটীয়াকৈ নকলেও আওঁপকীয়াকৈ চিৰাজুদ্দিন আজমলে খেলাটো এক প্ৰকাৰৰ নিশ্চিত বুলি তেওঁৰ বক্তব্যৰ পৰা জানিব পৰা গৈছে ৷ আনহাতে দলীয় বিসম্বাদ সন্দৰ্ভত তেওঁ কয় যে দলত কোনো বিসম্বাদ নাই ৷ আমিনুল ইছলাম আৰু জেহিৰুল ইছলামতকৈ নগাঁৱত চিৰাজুদ্দিন আজমলে ডেৰৰ পৰা দুই লাখ ভোট বেছি পাব বুলি তেওঁ দৃঢ়তা প্ৰকাশ কৰে ৷
ইফালে দিল্লীৰ মুখ্যমন্ত্ৰী অৰবিন্দ কেজৰিৱালক ED এ চমন জাৰি কৰাক লৈ এ আই ইউ ডি এফৰ সভাপতি তথা ধুবুৰী লোকসভা সমষ্টিৰ সাংসদ আজমলে প্ৰতিক্ৰিয়া প্ৰকাশ কৰে ৷ আজমলে কয় যে পূৰ্বে আপৰ নেতা মনীষ ছিছোদিয়াক, তাৰ পাছত সংসদ সঞ্জয় সিং গ্ৰেপ্তাৰ কৰিলে ৷ এতিয়া অৰবিন্দ কেজৰিৱালক গ্ৰেপ্তাৰ কৰিব ৷ এয়া প্ৰধানমন্ত্ৰী নৰেন্দ্ৰ মোদীৰ বাবে ভাল নহয় ৷ ইয়াৰ পাছত আৰু কাকো গ্ৰেপ্তাৰ কৰিব নোৱাৰে ৷ আপৰ নেতা সঞ্জয় সিং খুবেই ভাল মানুহ বুলি মন্তব্য আজমলৰ ৷
আনহাতে মমতা বেনাৰ্জী সন্দৰ্ভত তেওঁ কয় যে মমতা ভয় কৰা নেত্ৰী নহয় ৷ যিমানেই কেন্দ্ৰীয় চৰকাৰে ভয় নেদেখুৱাক মমতা ভয় কৰা বিধৰ নহয় ৷ অহা পাঁচ ৰাজ্যৰ নিৰ্বাচনত I.N.D.I.A. ৰ জয় হ’ব বুলি দাবী কৰে আজমলে ৷ তেওঁ কয় যে I.N.D.I.A. জিকিবই সেয়া নিশ্চিত ৷
লগতে পঢ়ক: Bhupen Bora on Lok Sabha election:বিৰোধী ঐক্যই কিমান আসন লাভ কৰিব,৩ ডিচেম্বৰত হ’ব ঘোষণা
