মৰাণ, 25 অক্টোবৰ : সততে অসমৰ সমাজ জীৱনৰ প্ৰায়ভাগ সমস্যা সন্দৰ্ভত মাত-মাতি অহা পৰিলক্ষিত হৈছে বীৰ লাচিত সেনা অসম নামৰ সংগঠনটোক । দেওবাৰে বীৰ লাচিত সেনা অসমৰ সাংগঠনিক সম্পাদক শৃংখল চলিহাই ডিব্ৰুগড়ৰ টেঙাখাটত এখন সংবাদমেল সম্বোধন কৰে । সংবাদমেলত নেতাগৰাকীয়ে ডিব্ৰুগড় জিলাত থকা BCPLL, APDCL, Oil India আদি সকলো উদ্যোগত থলুৱা নিবনুৱা যুৱক-যুৱতীসকলক নিযুক্তি প্ৰদানৰ দাবী তোলে ৷
ইয়াৰ লগতে শৃংখল চলিহাই কয় যে, থলুৱা যুৱক-যুৱতীক বঞ্চিত কৰি বহিঃৰাজ্যৰ পৰা অন্য লোক আনি নিযুক্তি দিয়াৰ প্ৰক্ৰিয়া চলি থাকিলে বন্ধ কৰি দিয়া হ'ব উদ্যোগসমূহ । সকলো চৰকাৰী-বেচৰকাৰী কাৰ্যালয়ৰ লগতে ৰাজহুৱা স্থানত অসমীয়া ভাষা ব্যৱহাৰ কৰিবলৈও দাবী জনায় চলিহাই । ইয়াৰোপৰি বাংলা ভাষা কেতিয়াও ব্যৱহাৰ কৰিব নোৱাৰিব বুলি দাবী কৰে তেওঁ ৷
বীৰ লাচিত সেনা অসমৰ সাংগঠনিক সম্পাদক শৃংখল চলিহাই লগতে কয় যে, ৰাজহুৱা স্থানত যদিহে বাংলা ভাষা লিখা হয়, তাত ক’লা ৰং সনা হ'ব ৷ স্বাভাৱিকতেই চলিহাৰ এই মন্তব্যৰ পিছত সচেতন মহলত মিশ্ৰিত প্ৰতিক্ৰিয়াৰ সৃষ্টি হৈছে ৷
লগতে পঢ়ক : মিছন বসুন্ধৰাৰ জনপ্ৰিয়তা বৃদ্ধি : দৈনিক গড়ে প্ৰায় দুই হাজাৰ লোকৰ আবেদন
