ডিব্ৰুগড়,25 আগষ্ট : অৱশেষত মৃত্যুৰ ওচৰত হাৰ মানিলে নন্দিতা শইকীয়াই । চিকিৎসকে ১ বাজি ১৫ মিনিটত ঘোষণা কৰিলে মৃত্যুৰ কথা । নিজ মহাবিদ্যালয়ৰ পৰা পৰীক্ষা শেষ কৰি ঘৰলৈ উভতি ৰাজপথত ৰৈ থকাৰ সময়তে ধেমাজি নগৰত এজন যুৱকে চোকা অস্ত্ৰৰে প্ৰহাৰ কৰিছিল নন্দিতাক ।
তাৰপাছতে ২১ আগষ্ট পৰা ডিব্ৰুগড়ৰ ব্ৰহ্মপুত্ৰ নাৰ্চিং হোমত সংকটজনক অৱস্থাত চিকিৎসাধীন হৈ আছিল ধেমাজিৰ মৰিঢল মহাবিদ্যালয়ৰ ছাত্ৰী নন্দিতা শইকীয়া । নাৰ্চিং হোমৰ ভেন্টিলেটৰত সংকটজনক অৱস্থাত চিকিৎসাধীন হৈ আছিল যদিও অৱশেষত মৃত্যুৰ সৈতে যুঁজি হাৰ মানিলে নন্দিতা শইকীয়াই ।
ছাত্ৰীগৰাকীৰ প্ৰাণ ৰক্ষা কৰিবলৈ চিকিৎসকে আপ্ৰাণ চেষ্টা চলাই অৱশেষত নোৱাৰিলে । ঘটনাটো সংঘটিত হোৱাৰ পাচতে নন্দিতাৰ আশু আৰোগ্য কামনাৰে ৰাজ্যজুৰি সকলোৱে প্ৰাৰ্থনা কৰিছিল যদিও সেই প্ৰাৰ্থনাই প্ৰাণ ৰক্ষা কৰিব নোৱাৰিলে ছাত্ৰীগৰাকীৰ ।
মৃত্যুৰ পাচতে যোৱা ২১ আগষ্টৰ পৰা ডিব্ৰুগড় ব্ৰহ্মপুত্ৰ নাৰ্চিংহোমত চিকিৎসাধীন হৈ থকা নন্দিতা শইকীয়াৰ সকলো চিকিৎসাৰ খৰচ ৰেহাই দিয়াৰ কথা ঘোষণা কৰিছে চিকিৎসালয় কৰ্তৃপক্ষই । ব্যক্তিগত চিকিৎসালয় খনৰ স্বত্বাধিকাৰী হাফিজুৰ ৰহমান( মুন্না)ই জনাইছে এই কথা ।
লগতে পঢ়ক: মৃত্যুৰে যুঁজি অৱশেষত হাৰ মানিলে নন্দিতাই
আনহাতে নন্দিতাৰ মৃত্যুৰ বাতৰি বিয়পি পৰা লগে লগে নাৰ্চিংহোম খনত আছুকে ধৰি মহাবিদ্যালয় খনৰ সহপাঠী, আত্মীয় স্বজন উপস্থিত হয় । একেদৰে ডিব্ৰুগড় আৰক্ষী আৰু দণ্ডাধীশ উপস্থিত হৈ মৃতদেহটো অসম চিকিৎসা মহাবিদ্যালয়লৈ প্ৰেৰণ কৰে মৰণোত্তৰ পৰীক্ষা বাবে ।
উল্লেখযোগ্য যে, নন্দিতাৰ উন্নত চিকিৎসা বাবে চৰকাৰক দাবী জনাই অহাৰ পাচতো চৰকাৰে ছাত্ৰী গৰাকীৰ চিকিৎসাৰ বাবে কোনো ব্যৱস্থা গ্ৰহণ নকৰিলে ৷ তাৰোপৰি চৰকাৰৰ কোনো এগৰাকী জনপ্ৰতিনিধিয়ে পৰিয়ালৰ খবৰ নোলাৱাত তীব্ৰ প্ৰতিক্ৰিয়াৰ সৃষ্টি হৈছে । একাংশই চৰকাৰৰ প্ৰতি বিষোদগাৰ প্ৰকাশ কৰি কয় যে, নাৰী সুৰক্ষা কথা কোৱা চৰকাৰে নাৰী সুৰক্ষাৰ বাবে কোনো পদক্ষেপ গ্ৰহণ নকৰিলে ৷
সম্প্ৰতি অপৰাধীক কঠোৰ শাস্তি বিহিবলৈ দাবী জনাইছে বিভিন্ন দল সংগঠনৰ লগতে সচেতন ৰাইজে ৷ এতিয়া সময়তে লক্ষণীয় হ’ব আৰক্ষী প্ৰশাসনে কি ব্যৱস্থা গ্ৰহণ কৰে অপৰাধীৰ বিৰুদ্ধে ৷
