মৰাণ, 24 জুলাই : চৰকাৰে দিহিং পাটকাই ৰাষ্ট্ৰীয় উদ্যান(Dihing patkai national park) ৰাজ্যৰ সপ্তমখন ৰাষ্ট্ৰীয় উদ্যান হিচাপে ঘোষণা কৰা হৈছিল ৷ কিন্তু ৰাষ্ট্ৰীয় উদ্যান ঘোষণা হোৱাৰ পিছতো এতিয়া সুৰক্ষাহীন অৱস্থাত আছে দিহিং পাটকাই ৷ শেহতীয়াকৈ বন মাফিয়াৰ দ্বাৰা বন ধ্বংস চলি থকা অৱস্থাত বনকৰ্মীৰ সৈতে হোৱা মুখামুখি সংঘৰ্ষত এটা হাতীৰ মৃত্যুৰ হোৱাৰ খবৰ সংবাদ মাধ্যমত প্ৰকাশ পাইছিল ৷
এই ঘটনাৰ লগে লগে এতিয়া তীব্ৰ প্ৰতিক্ৰিয়া সৃষ্টি হৈছে দল-সংগঠন তথা সচেতন মহলৰ মাজত । শুকুৰবাৰে সদৌ অসম ছাত্র সন্থা(All Assam Students' Union) ৰ সাধাৰণ সম্পাদক শংকৰজ্যোতি বৰুৱা নেতৃত্বত এটা আছুৰ সঁজাতি দলে ঘটনাস্থলী পৰিদৰ্শন কৰে । আছুৰ সাধাৰণ সম্পাদক গৰাকীৰ সৈতে যোৱা সঁজাতি দলটোৱে ঘটনাস্থলী পৰিদৰ্শন কৰি এনে ঘটনা ৰোধ কৰিবৰ বাবে বনবিভাগ তথা চৰকাৰে বনকৰ্মীসকলক অত্যাধুনিক অস্ত্ৰৰে সু-সজ্জিত কৰি যি কোনো পৰিস্থিতিৰ সৈতে মোকাবিলা কৰিব পৰা ব্যৱস্থা কৰিবলৈ আহ্বান জনায় ।
ইফালে, দিহিং পাটকাই অসম-অৰুণাচল সীমান্তৰ শুকানজুৰি খণ্ড কাৰ্যালয়ৰ খোৱাপানী বিজুলীৰ অভাৱত থকা বনকৰ্মী সকলৰ এনে পুতৌ লগা অৱস্থা প্ৰত্যক্ষ কৰি আছুৰ সম্পাদক গৰাকীয়ে আন্তঃগাঁথনি উন্নত কৰাৰ বাবে চৰকাৰক আহ্বান জনায় ।
ইয়াৰ লগতে, ছাত্ৰ নেতাগৰাকীয়ে দিহিং পাটকাই ৰাষ্ট্ৰীয় উদ্যানক সুৰক্ষা দিয়াত চৰকাৰ ব্যৰ্থ হোৱাৰ অভিযোগ উত্থাপন কৰে । লগতে বন ধ্বংস ৰোধ কৰিবলৈ বিভাগীয় মন্ত্ৰী আমোলাক কঠোৰৰ পৰা কঠোৰতম পদক্ষেপ গ্ৰহণ কৰিবলৈ আহ্বান জনায় ৷ দিহিং পাটকাইক সুৰক্ষা দিব নোৱাৰিলে কম দিনৰ ভিতৰতে ইয়াৰ ৰাষ্ট্ৰীয় উদ্যানৰ যি বৈশিষ্ট্য সেয়া হেৰাই যাব বুলিও শংকৰজ্যোতি বৰুৱাই মন্তব্য কৰে ।
লগতে পঢ়ক : সীমান্ত বিবাদ সমাধানৰ উদ্দেশ্যে অসম-মেঘালয়ৰ মুখ্যমন্ত্ৰীৰ বৈঠক
