বাক্সাৰ শিমলবাৰীত গৰাখহনীয়াৰ ভয়ংকৰ ৰূপ

যিকোনো মূহুৰ্তত দৰঙা নৈৰ বুকুত জাহ যাব পাৰে অঞ্চলটোৰ বিস্তীৰ্ণ অঞ্চল

বাক্সা, 20 জুনঃ বাক্সা জিলাৰ তামুলপুৰ মহকুমাৰ অন্তৰ্গত শিমলবাৰীত তীব্ৰ গৰাহখহনীয়াই আতংকিত কৰি তুলিছে নৈপৰীয়া ৰাইজক৷ দেওবাৰে চুবুৰীয়া ৰাষ্ট্ৰ ভূটানে এৰি দিয়া পানীয়ে মহকুমাটোৰ আনন্দবজাৰ, নাগ্ৰীজুলী, ভোলাঝাৰ আদি ঠাইত বানপানীৰ সৃষ্টি কৰিছিল । যাৰ বাবে দৰঙাপাৰৰ শিমলবাৰীৰ নৈপৰীয়া ৰাইজে জনপ্ৰতিনিধিৰ ওপৰত তীব্ৰ ক্ষোভ উজাৰে৷ জানিব পৰা মতে দৰঙা নৈৰ গৰাখহনীয়াই শিমলবাৰীৰ গাঁওৰ বহু লোকৰ খেতি মাটি খহাই নিয়ে ৷

ইতিমধ্যে নৈখনে খহাই খহাই ক্ৰমান্বয়ে গাঁওখনৰ মাজভাগলৈ প্ৰৱেশ কৰিছেগৈ ৷ হাছান আলী নামৰ লোকজনৰ চোতালত পাইছেগৈ খহনীয়া ৷ আনহাতে ভূটানে এৰি দিয়া পানীয়ে
অঞ্চলটোৰ চাৰিটাকৈ পৰিয়ালৰ ভৰালৰ ধান তিয়াই নিয়াৰ ফলত লঘোণে দিন কটাবলগীয়া হৈছে পৰিয়াল কেইটাই ৷ এতিয়াও ৰাইজে গৰাহখনীয়া ৰোধৰ বাবে প্ৰশাসনৰ ওচৰত আশাৰে বাট চায় ৰৈছে ৷