স্পৰ্টছ ডেস্ক, ২৫ মে': ভাৰতীয় ক্ৰিকেট ইতিহাসৰ এজন সফলতম বলাৰৰ ভিতৰত হৈছে অফ স্পীনাৰ হৰভজন সিং। শেহতীয়াকৈ খেলুৱৈগৰাকীয়ে পুনৰ ৰাষ্ট্ৰীয় দলত খেলাৰ ইচ্ছা প্ৰকাশ কৰি মন্তব্য় আগবঢ়ায় । খেলুৱৈগৰাকীয়ে কয়, বৰ্তমান সময়ত মই আইপিএলত অংশগ্ৰহণ কৰি আছো । সেয়েহে মই ভাৰতৰ বাবে আন্তঃৰাষ্ট্ৰীয় টি-২০ খেলাৰ বাবে প্ৰস্তুত ।
উল্লেখ্য় যে, আইপিএলত সৰ্বাধিক উইকেট দখল কৰা বলাৰৰ ভিতৰত যুটীয়াভাৱে তৃতীয় স্থানত আছে হৰভজন । হৰভজনৰ নামত আইপিএলত আছে ১৫০ টাকৈ উইকেট । হৰভজনে ভাৰতৰ বাবে অন্তিমখন মেচত অংশগ্ৰহণ কৰিছিল ২০১৬ চনৰ এছিয়া কাপত ।
ক্ৰিকেট সন্দৰ্ভত বলাৰগৰাকীয়ে কয়, মই সম্পূৰ্ণ ৰূপে সাজু । মই আইপিএলত ভাল প্ৰদৰ্শন কৰিবলৈ সক্ষম হৈছো, য'ত বলাৰৰ বাবে অধিক প্ৰত্যাহ্বান । কাৰণ তাত খেলপথাৰৰ আকাৰ যথেষ্ট সৰু । আইপিএলত বিশ্বৰ সকলো নামি-দামী খেলুৱৈয়ে অংশগ্ৰহণ কৰে । তেওঁলোকৰ বিৰুদ্ধে বলিং কৰা প্ৰত্যাহ্বানমূলক । যদি তেওঁলোকৰ বিৰুদ্ধে আইপিএলত ভাল প্ৰদৰ্শন কৰিবলৈ সক্ষম হৈছো তেন্তে আন্তঃৰাষ্ট্ৰীয় ক্ৰিকেটটো ভাল প্ৰদৰ্শন কৰিবলৈ সক্ষম হ'ম ।
অৱশ্যে আইপিএলত ভাল প্ৰদৰ্শন কৰাৰ পাচতো ভাৰতীয় দলীয় নিৰ্বাচক মণ্ডলীয়ে তেওঁক গুৰুত্ব প্ৰদান নকৰাত দুখ প্ৰকাশ কৰে খেলুৱৈগৰাকীয়ে ।
তেওঁ উল্লেখ কৰে, নিৰ্বাচক মণ্ডলীয়ে মোৰ ফালে দৃষ্টি নিক্ষেপ কৰা নাই, তেওঁলোকৰ মতে মই বুঢ়া হৈ পৰিছো । লগতে মই ঘৰুৱা ক্ৰিকেটতো অৱতীৰ্ণ হোৱা নাই । বিগত চাৰি-পাঁচ বছৰত তেওঁলোকে মোৰ ফালে এবাৰো চোৱা নাই, আইপিএলত ভাল প্ৰদৰ্শন কৰাৰ পাচতো । মই উইকেট লাভ কৰিবলৈ সক্ষম হৈছো, মোৰ সৈতে মোৰ ৰেকৰ্ডছ আছে ।
