ইণ্টাৰনেশ্যনেল ডেস্ক, ৮ ডিচেম্বৰ : ৰাছিয়াৰ ৰাষ্ট্ৰপতি ভ্লাডিমিৰ পুটিনে বৃহস্পতিবাৰে প্ৰধানমন্ত্ৰী নৰেন্দ্ৰ মোদীক প্ৰশংসা কৰি কয় যে তেওঁক ভয় খুৱাব নোৱাৰি বা ৰাষ্ট্ৰীয় স্বাৰ্থৰ বিপৰীতে সিদ্ধান্ত ল'বলৈ বাধ্য কৰিব নোৱাৰি । তেওঁ কয় যে প্ৰধানমন্ত্ৰী মোদীয়ে ৰাষ্ট্ৰীয় স্বাৰ্থ সুৰক্ষিত কৰাৰ ক্ষেত্ৰত কঠোৰ স্থিতি ল'বলৈও কুণ্ঠাবোধ নকৰে । "মই কল্পনাও কৰিব নোৱাৰো যে মোদীক ভয় খুৱাব, ভাবুকি দিব পাৰি বা কোনো সিদ্ধান্ত ল'বলৈ বাধ্য কৰিব পাৰি ।" পুটিনে কয় ।
পুটিনে প্ৰধানমন্ত্ৰী মোদীক প্ৰশংসা কৰি কয় যে বিশেষকৈ যেতিয়া কোনো সিদ্ধান্ত ভাৰত আৰু ভাৰতীয় জনসাধাৰণৰ ৰাষ্ট্ৰীয় স্বাৰ্থৰ বিপৰীত হয় তেতিয়া প্ৰধানমন্ত্ৰী মোদীক বাধ্য কৰিব নোৱাৰি । তেওঁ কয়, "মই কেতিয়াও এই বিষয়ে কোনো আলোচনা কৰা নাই, মই কেৱল ইয়াক বাহিৰৰ পৰা চাওঁ । সঁচা কথা ক'বলৈ গ'লে, কেতিয়াবা ভাৰতৰ স্বাৰ্থ সুৰক্ষিত কৰাৰ বাবে প্ৰধানমন্ত্ৰী মোদীৰ কঠোৰ স্থিতিত মই আচৰিত হওঁ ।"
পুটিনে চতুৰ্দশ ভিটিবি বিনিয়োগ মঞ্চ 'ৰাছিয়া কলিং'ক সম্বোধন কৰি এনেদৰে কয় । আনহাতে, ভাৰত আৰু ৰাছিয়াৰ মাজত দ্বিপাক্ষিক সম্পৰ্কৰ কথা উল্লেখ কৰি পুটিনে কয় যে দুয়োখন দেশৰ মাজৰ সম্পৰ্ক সকলো দিশতে 'ক্ৰমান্বয়ে বিকশিত' হৈ আছে । ৰাছিয়াৰ ৰাষ্ট্ৰপতিগৰাকীয়ে লগতে কয় যে প্ৰধানমন্ত্ৰী মোদীৰ নীতি দুয়োখন দেশৰ মাজৰ সম্পৰ্কৰ মুখ্য 'গেৰাণ্টৰ' । তেওঁ দ্বিপাক্ষিক বাণিজ্যৰ সম্প্ৰসাৰণ ত্বৰান্বিত কৰাৰ বাবে দুয়োখন দেশৰ দ্বাৰা কৰা প্ৰচেষ্টাৰ বিষয়েও উল্লেখ কৰে ।
পুটিনে আৰু কয়, "মই ক'ব বিচাৰোঁ যে ৰাছিয়া আৰু ভাৰতৰ মাজৰ সম্পৰ্ক ক্ৰমান্বয়ে সকলো দিশত বিকশিত হৈ আছে । প্ৰধানমন্ত্ৰী মোদীৰ নীতিয়ে ৰাছিয়া আৰু ভাৰতৰ মাজত বৰ্ধিত সম্পৰ্কৰ নিশ্চয়তা দিয়ে । তেওঁ বিশ্বৰ ৰাজনৈতিক ব্যক্তিত্বৰ উক্ত গোটৰ অন্তৰ্ভুক্ত, যাৰ বিষয়ে মই নাম নোলোৱাকৈয়ে কৈছিলোঁ ।"
ৰাছিয়াৰ ৰাষ্ট্ৰপতিয়ে লগতে কয় যে ভাৰত আৰু ৰাছিয়াৰ মাজত বাণিজ্য 'বৃদ্ধি পাই আছে' । যোৱা বছৰ ই প্ৰতিবছৰত ৩৫ বিলিয়ন ডলাৰ আছিল । এই বছৰৰ প্ৰথমাৰ্ধত ই ৩৩.৫ বিলিয়ন ডলাৰত উপনীত হৈছে । অৰ্থাৎ বিকাশ নিশ্চিত । "এইটো সঁচা যে ৰাছিয়াৰ শক্তি সম্পদৰ ৰাজসাহায্যৰ পৰা ভাৰত অধিক লাভান্বিত হৈছে । কিন্তু এয়াই সঠিক । প্ৰধানমন্ত্ৰী মোদীয়ে সঁচাকৈয়ে সঠিক কাম কৰি আছে ।" পুটিনে কয় । "যদি মই তেওঁৰ ঠাইত থাকিলোহেঁতেন, যদি পৰিস্থিতি এনেদৰে বিকশিত হ'লহেঁতেন, তেন্তে ময়ো তেনেকুৱাই কৰিম ।" তেওঁ লগতে যোগ দিয়ে ।
অৱশ্যে দুয়োখন দেশৰ সম্পৰ্ক ইয়াতেই সীমাবদ্ধ নহয় বুলি উল্লেখ কৰি পুটিনে কয় যে আমাৰ ওচৰত বহুতো সুযোগ আছে । উল্লেখ্য যে ক্ৰয় ক্ষমতা আৰু বজাৰৰ সামৰ্থ্য ৰেঙ্কিঙৰ ক্ষেত্ৰত ভাৰত বৰ্তমান তিনি নম্বৰত আছে । ৰাছিয়া আছে পঞ্চম স্থানত ।
লগতে পঢ়ক :গুৰপতৱন্ত সিং পান্নুন হত্যাৰ ষড়যন্ত্ৰ, ভাৰতক তদন্তত সহযোগিতাৰ আহ্বান আমেৰিকাৰ
