নিউজ ডেস্ক, 20 আগষ্ট : ৰাজ্য চৰকাৰে শুকুৰবাৰে এক নিৰ্দেশ অনুসৰি কেইবাখনো জিলাৰ উপায়ুক্তক ৰদ বদল কৰাৰ উপৰিও প্ৰশাসনৰ শীৰ্ষ পৰ্যায়ত কেতবোৰ সালসলনি ঘটায়(Assam Governments Reshuffle) ৷ সেই অনুসৰি গুৱাহাটী পৌৰ নিগমৰ আয়ুক্ত দেৱাশিস শৰ্মাক মৰিগাঁৱৰ উপায়ুক্ত হিচাপে বদলি কৰা হৈছে । ইয়াৰ বিপৰীতে গুৱাহাটী পৌৰ নিগমৰ নতুন আয়ুক্তৰ দায়িত্ব দিয়া হৈছে মেঘা নিধি দাহালক(New Commissioner of GMC Megha Nidhi Dahal) ৷ ইয়াৰ পূৰ্বে শিৱসাগৰ জিলাৰ উপায়ুক্ত হিচাপে কাৰ্যনিৰ্বাহ কৰি আছিল দাহালে ।
আনহাতে শিৱসাগৰৰ নতুন উপায়ুক্ত হিচাপে বদলি কৰা হৈছে আদিত্য বিক্ৰম যাদৱক ৷ যাদৱে সাধাৰণ প্ৰশাসন বিভাগৰ যুটীয়া সচিব পদত কাৰ্যনিৰ্বাহ কৰি আছিল ৷ একেদৰে ৰাজ্য চৰকাৰৰ ট্ৰেঞ্চফৰ্মেছন এণ্ড ডেভেলপমেন্ট বিভাগৰ যুটীয়া সচিব ড৹ ছদনেক সিঙক ওদালগুৰিৰ উপায়ুক্ত হিচাপে বদলি কৰা হৈছে ৷ তেওঁক অতিৰিক্তভাৱে বিটিআৰৰ সচিবৰ দায়িত্বও অৰ্পণ কৰা হৈছে ৷
অনুৰূপভাৱে মৰিগাঁৱৰ উপায়ুক্তৰূপে কাৰ্যনিৰ্বাহ কৰি থকা প্ৰকাশ ৰঞ্জন ঘৰফলীয়াক গৃহ আৰু নগৰ পৰিক্ৰমা বিভাগৰ সচিব পদলৈ বদলি কৰা হৈছে ৷ একেটা নিৰ্দেশতে ওদালগুৰিৰ উপায়ুক্ত তথা বিটিআৰৰ সচিবৰূপে কাৰ্যনিৰ্বাহ কৰি থকা ড৹ পি উদয় পাৰবীনক গোলাঘাটৰ নতুন উপায়ুক্ত হিচাপে নিযুক্তি দিয়া হৈছে ৷ আনহাতে গোলাঘাটৰ উপায়ুক্ত মৃগেশ নাৰায়ন বৰুৱাক মুখ্যমন্ত্ৰী কাৰ্যালয়ৰ যুটীয়া সচিব পদলৈ বদলি কৰা হৈছে ৷
