টিংখাং, 1 ডিচেম্বৰঃ ডিব্ৰুগড় জিলাৰ টিংখাঙৰ ঔফুলীয়া চাহ বাগিচাৰ পৰা এটি শিশুক অপহৰণ কৰি নিয়াৰ ঘটনাৰ পাচতে বাগিচাখনত চাঞ্চল্যৰ সৃষ্টি হৈছে । 12 দিন উকলি যোৱাৰ পাচতো অপহৃত শিশুটিৰ কোনো শুংসূত্ৰ লাভ কৰিবলৈ সক্ষম হোৱা নাই ৷ বাগিচাখনৰ ফেক্টৰী লাইনৰ সন্তোষ দৰ্জীৰ ৯ বছৰীয়া পুত্ৰ বগাধৰ দৰ্জীক কোনো অচিনাকী যুৱকে যোৱা ১৯ নৱেম্বৰত ঘৰৰ পৰাই অপহৰণ কৰি নিয়ে ।
ঘটনাৰ বিৱৰণী অনুসৰি, যোৱা ১৮ নৱেম্বৰত এজন অচিনাকী আদিবাসী যুৱকক নিশাটোৰ বাবে নিজ বাসগৃহত আশ্ৰয় দিছিল শ্ৰমিক সন্তোষ দৰ্জীয়ে । ইয়াৰে সুযোগ লৈ পিছদিনা পুৱা ভাগত প্ৰায় ৯ বজাত দিকচম বাগিচাৰ পৰা আহিম বুলি কৈ সন্তোষৰ নতুন বাইচাইকেলসহ পুত্ৰ বগাধৰ দৰ্জীক লগত লৈ যায় । সন্ধিয়ালৈকে যুৱকজন ঘূৰি নহাত পৰিয়ালৰ লোকে সকলোতে খা-খবৰ কৰিও কোনো শুংসূত্ৰ লাভ নকৰিলে । ইতিমধ্যে পৰিয়ালটোৱে বামুনবাৰী আৰক্ষী চকীত এই সন্দৰ্ভত এখন এজাহাৰ দাখিল কৰিছে । এজাহাৰৰ ভিত্তিত আৰক্ষীয়েও অনুসন্ধান অব্যাহত ৰাখিছে যদিও কোনো সম্ভেদ লাভ কৰা নাই । শিশু অপহৰণকাৰী ঘটনাৰ সৈতে এক দুষ্ট চক্ৰ অঞ্চলটোত পিয়াপি দি আছে বুলি ৰাইজে সন্দেহ প্ৰকাশ কৰিছে ।
