নেশ্যনেল ডেস্ক, 26 জুন : আমেৰিকা আৰু ইজিপ্তৰ পাঁচ দিনীয়া ভ্ৰমণৰ অন্তত দেওবাৰে নিশা দিল্লীত উপস্থিত হয় প্ৰধানমন্ত্ৰী নৰেন্দ্ৰ মোদী । বিদেশ ভ্ৰমণৰ অন্তত প্ৰধানমন্ত্ৰী মোদী দিল্লীত উপস্থিত হোৱাৰ পাচতে ভাৰতীয় জনতা পাৰ্টীৰ কৰ্মীসকলে তেওঁক পালাম বিমানবন্দৰত উষ্ম আদৰণি জনায় । প্ৰধানমন্ত্ৰীগৰাকীক আদৰণি জনোৱাৰ সময়ত বিজেপিৰ ৰাষ্ট্ৰীয় সভাপতি জে পি নাড্ডা, কেন্দ্ৰীয় ৰাজ্যিক মন্ত্ৰী মীনাক্ষী লেখী, হান্স ৰাজ হান্স, গৌতম গম্ভীৰকে ধৰি দিল্লী বিজেপিৰ সকলো সাংসদ উপস্থিত থাকে ।
আমেৰিকাৰ ৰাষ্ট্ৰপতি জ’ বাইডেন আৰু তেওঁৰ পত্নী জিল বাইডেনৰ আমন্ত্ৰণত আমেৰিকা ভ্ৰমণলৈ গৈছিল প্ৰধানমন্ত্ৰী মোদী । আমেৰিকা ভ্ৰমণৰ সময়ত তেওঁ ৰাষ্ট্ৰপতি জ’ বাইডেনৰ সৈতে কেবাটাও বিষয়ত আলোচনা কৰে আৰু আমেৰিকাৰ কংগ্ৰেছৰ যৌথ অধিৱেশনত ভাষণ প্ৰদান কৰে । ইয়াৰ পাচতে শনিবাৰে তেওঁ আমেৰিকাৰ ৰাজ্যিক ভ্ৰমণ সমাপ্ত কৰি ইজিপ্তৰ ৰাজধানী কায়ৰোত উপস্থিত হয় ।
ইজিপ্ত ভ্ৰমণৰ প্ৰথম আভাস প্ৰধানমন্ত্ৰী মোদীয়ে তেওঁৰ টুইটাৰ হেণ্ডেলত শ্বেয়াৰ কৰে । উক্ত ভিডিঅ’টোত তেওঁৰ আফ্ৰিকান দেশখনত উপস্থিত হোৱাৰ পাচতে ইজিপ্তৰ সমকক্ষ মুস্তাফা মাদবৌলী, ইজিপ্তৰ ৰাষ্ট্ৰপতি আব্দেল ফাত্তাহ আল চিছিৰ সৈতে সাক্ষাৎ কৰা আৰু ভাৰতীয় প্ৰব্ৰজনকাৰীৰ সদস্যসকলৰ সৈতে মত বিনিময় কৰা দেখিবলৈ পোৱা গৈছে ।
এই ভিডিঅ’টো টুইটাৰত শ্বেয়াৰ কৰি মোদীয়ে ভিডিঅ’টোৰ টেগত উল্লেখ কৰে, ‘‘ ইজিপ্ত ভ্ৰমণ মোৰ এক ঐতিহাসিক যাত্ৰা । এই যাত্ৰাই ভাৰত-ইজিপ্তৰ সম্পৰ্কত নতুন শক্তি প্ৰদান কৰিব ৷ লগতে আমাৰ দেশৰ জনসাধাৰণৰ বাবে ই সুফল কঢ়িয়াই আনিব । ৰাষ্ট্ৰপতি আল চিছিক ধন্যবাদ জনাইছো, মিচৰৰ চৰকাৰ আৰু জনসাধাৰণৰ মৰমৰ বাবে’’ ।
ৰাষ্ট্ৰপতি আব্দেল ফাত্তাহ এল চিছিৰ আমন্ত্ৰণত ইজিপ্তলৈ তেওঁৰ দুদিনীয়া ৰাজ্যিক ভ্ৰমণ আছিল 1997 চনৰ পিচত ভাৰতৰ প্ৰধানমন্ত্ৰীৰ প্ৰথমটো দ্বিপাক্ষিক ভ্ৰমণ । দেওবাৰে ৰাষ্ট্ৰপতি আল চিছিৰ সৈতে আলোচনাত মিলিত হৈ মোদীয়ে দুয়োখন দেশৰ মাজত কৌশলগত, অংশীদাৰিত্ব আৰু অধিক শক্তিশালী কৰাৰ উপায়ৰ বিষয়ে আলোচনা কৰে ৷ য’ত বাণিজ্য আৰু বিনিয়োগ, শক্তিৰ সম্পৰ্ক আৰু জনসাধাৰণৰ সম্পৰ্ক উন্নত কৰাৰ ওপৰত গুৰুত্ব আৰোপ কৰা হয় ।
ইজিপ্তত প্ৰধানমন্ত্ৰী মোদীয়ে গিজাৰ পিৰামিড আৰু কায়ৰোৰ আল-হাকিম মছজিদ পৰিদৰ্শন কৰে । আল-হাকিম মছজিদ পৰিদৰ্শন কৰাৰ পিচত প্ৰধানমন্ত্ৰী মোদীয়ে হেলিঅ’পলিছ যুদ্ধ কবৰস্থানলৈ গৈ প্ৰথম বিশ্বযুদ্ধৰ সময়ত সৰ্বোচ্চ বলিদান দিয়া ভাৰতীয় জোৱানসকলক শ্ৰদ্ধাঞ্জলি জনায় । শনিবাৰে প্ৰধানমন্ত্ৰী মোদীয়ে কায়ৰোত ইজিপ্তৰ সমকক্ষ মুস্তাফা মাদবৌলিৰ সৈতেও এক ঘূৰণীয়া মেজ মেলত অংশগ্ৰহণ কৰে ।
ৰাষ্ট্ৰপতি আল চিচিয়ে মোদীক ইজিপ্তৰ সৰ্বোচ্চ ৰাজ্যিক সন্মান ‘‘অৰ্ডাৰ অৱ নৈ’’ৰে সন্মানিত কৰে । প্ৰধানমন্ত্ৰী মোদীয়ে লাভ কৰা এয়া ত্ৰয়োদশ সৰ্বোচ্চ ৰাজ্যিক সন্মান । মোদীয়ে 20 জুনৰ পৰা পাঁচদিনীয়া ভ্ৰমণ আৰম্ভ কৰিছিল ৷ 21-24 জুনত তেওঁ আমেৰিকা ভ্ৰমণ কৰিছিল ।
তেওঁৰ আমেৰিকা ভ্ৰমণ নিউয়ৰ্কৰ পৰা আৰম্ভ হয়, য’ত তেওঁ 21 জুনত নৱম আন্তঃৰাষ্ট্ৰীয় যোগ দিৱস উপলক্ষে ৰাষ্ট্ৰসংঘৰ মুখ্য কাৰ্যালয়ত এক ঐতিহাসিক অনুষ্ঠানৰ নেতৃত্ব দিয়ে । পিচত ৱাশ্বিংটন ডি চিৰ ৰাষ্ট্ৰপতি জ’ বাইডেনে তেওঁক হোৱাইট হাউছত এক বৃহৎ আদৰণি জনায় ।
লগতে পঢ়ক : Modi visits Egypt : ইজিপ্তৰ ঐতিহাসিক আল-হাকিম মছজিদত প্ৰধানমন্ত্ৰী মোডী
