কাজিৰঙা,১৬ মে': গোলাঘাট জিলাৰ কাজিৰঙা ৰাষ্ট্ৰীয় উদ্যানৰ সমীপত নিশা ভয়ংকৰ পথ দুৰ্ঘটনা সংঘটিত হয় । নিয়ন্ত্ৰণ হেৰুৱাই ৰাজপথৰ কাষৰ দ' খাৱৈত বাগৰি পৰে এখন নৈশ বাছ । দুৰ্ঘটনাটোত বহুলোক আহত হয় ।
জানিব পৰা মতে এই দুৰ্ঘটনাটো কাজিৰঙাৰ কহঁৰা পে'ট্ৰল পাম্পৰ সমীপতে সংঘটিত হয় । দুৰ্ঘটনাত পতিত কৃতী নামৰ বাছখনৰ নম্বৰ AS-12-E-9381 । স্থানীয় লোকে জনোৱা মতে নিশা প্ৰায় ১২ মান বজাত এই দুৰ্ঘটনাটো সংঘটিত হয় । বাছখন তেজপুৰৰ পৰা তিনিচুকীয়ালৈ যাত্ৰা কৰি আছিল । ইফালে বাছখনত বহু কণ কণ শিশু আছিল বুলিও জানিব পৰা গৈছে । বাছখন বাগৰি পৰাৰ লগে লগে অঞ্চলটোত তীব্ৰ হুলস্থূল পৰিৱেশৰ সৃষ্টি হয় । বাছখনৰ যাত্ৰীসকলৰ মাজতো হাহাকাৰ পৰিৱেশৰ সৃষ্টি হয় । দুৰ্ঘটনাটোৰ খবৰ পোৱাৰ লগে লগে অঞ্চলটোৰ লোকসকলে ঘটনাস্থলীত উপস্থিত হয় আৰু কহঁৰা আৰক্ষীৰ সহযোগত উদ্ধাৰ অভিযান আৰম্ভ কৰে । দুৰ্ঘটনাটোত কোনো লোক নিহত হোৱা নাই যদিও কেইবাগৰাকী যাত্ৰী আহত হয় । আহত যাত্ৰীসকলক ততালিকে সমীপৰ শ্বহীদ বেজা বৈষ্ণৱ কহঁৰা আদৰ্শ চিকিৎসালয়ত ভৰ্তি কৰোৱা হয় ।
বাছখনত যাত্ৰা কৰি থকা একাংশ যাত্ৰীয়ে জনোৱা মতে বাছখনৰ ওপৰত আৰু ভিতৰতো যথেষ্ট পৰিমাণে পাচলি লৈ যোৱা হৈছিল । যাত্ৰীৰ সংখ্যাও বেছি আছিল ! কিন্তু বাছখন কেনেকৈ দুৰ্ঘটনাগ্ৰস্ত হ'ল সেয়া এতিয়াও পোহৰলৈ অহা নাই । একাংশই সন্দেহ কৰা মতে চালকজনৰ টোপনি অহাৰ বাবেই বাছখন নিয়ন্ত্ৰণহীন হৈ খাৱৈত বাগৰি পৰে । অৱশ্যে আৰক্ষীয়ে এই সন্দৰ্ভত এটা গোচৰ ৰুজু কৰিছে আৰু তদন্ত অব্যাহত ৰাখিছে । আৰক্ষীৰ উচিত তদন্তৰ পিচত হে বাছখনৰ দুৰ্ঘটনাৰ প্ৰকৃত কাৰণ জানিব পৰা হ'ব ।
